Stap Stadi long Ol Toktok blong Konfrens Tugeta

I Kam long Grek Bati

Greg Bati i stap long Yuta, YSA.

Blong stap jenisim ol wei blong stap luklukbak long konfrens i mekem storian raon long gospel olsem wan famle i kam moa gud.

Blong sam yia mifala i bin glad blong stap ridim tru ol konfrens magasin olsem wan famle, wan stori long wan taem. Taem mifala i stat, bae mifala i jes kam tugeta raon long tebol mo wanwan i gat taem blong ridim wan paragraf blong ridim strong. Be mifala i faenem se mifala i bin stap rid i go tru nomo, mo nomo stop blong tekem gud ol mesej ia.

Blong kasem moa long wanem we mifala i stap ridim, waef blong mi mo mi i bin pem wan kopi blong konfrens magasin blong wanwan memba blong famle mo plan blong hamas toktok we bae mifala i nidim blong stadi evri wik, olsem bae mifala i save ridim evriwan bifo nekis jenerol konfrens. Blong sam wik, bae mifala i ridim wan toktok, mo ol nara wik bae i tu toktok, be evriwan i stadi long toktok ia mo makem ol pat we oli bin laekem. Afta, blong famle haos naet, bae mifla i tijim mifala wanwan long ol seksen we mifala i bin makem.

Plante taem ol pikinini blong mifala oli gat ol kwestin we bae i openem storian blong mifala, o waef blong mi mo mi i askem ol kwestin long stadi blong mitufala. Mitufala i laekem tumas blong harem ol yangfala blong mitufala oli eksplenem ol ansa blong olgeta long ol kwestin ia, serem ol samting we oli bin lanem long seminari, long jos, o long stadi blong olgetawan. Hem i bin kam wan gudfala wei blong harem ol testemoni blong wanwan oltaem long wan ples we i gud tumas.

I no longtaem mifala i faenem se sem samting i hapen long moning skripja stadi blong mifala. Sam dei bae mifala i rid tru sam ves nomo bifo taem i finis blong toktok raon long ol ves ia mo olsem wanem oli go wetem wanem i stap hapen raon long mifala.

Ol moning blong mifala naoia i stap fulap wetem storian, laf, mo yuniti bifo mifala i go long wanwan rod blong mifala. Mifala i gat ol strong testemoni long kaonsel blong profet blong yumi blong stadi mo prea tugeta evri dei. Famle blong mifala i bin jenis i go long wan we i stap lanem samting mo stap mekem wanwan i kam strong moa. Evri samting ia, i wan ansa blong wantem blong save gud smol moa aot long jeneral konfrens. ◼