Olsem Wanem blong Givim Seves long Ol Prishud Koling
I Kam long wan toktok blong jeneral konferens blong Epril 1987.
Long laef blong yu, yu bin tingting hevi finis long wanem nao praes blong sol blong man? Long laef blong yu, yu bin gat askem yuwan abaot paoa we yumi save kasem yet blong mekem samting, we i stap insaed long wanwan long yumi?
Wan taem, mi bin go long wan stek konfrens taem foma stek presiden blong mi Pol K. Jael i bin tanem i go long Doctrine and Covenants 18 mo stat blong ridim ples we Lod i bin talem se praes blong ol sol oli bigwan tumas long ae blong God (luk long D&C 18:10).
Afta Presiden Jael i askem, “wanem nao praes blong sol blong man?” Hem i traem blong no singaotem wan bisop, stek presiden, o hae kaonsela blong givim wan ansa. Be, hem i jusum presiden blong wan kworom blong ol elda.
Man ia, wetem fes we i sek, i bin stap kwaet nomo blong wanem we i luk olsem wan taem we i no save finis, mo afta hem i talem, “Praes blong sol blong man hem i hamas hem i save mekem blong kam olsem God.”
Evriwan we i bin stap i bin tingting hevi long ansa ia. Presiden Jael i bin gohed wetem mesej blong hem, be mi, mi stap gohed blong tingtingbak long ansa ia we i kam tru long insperesen.
Blong go aot, blong tij, blong tajem ol spesel sol we Papa blong yumi long Heven i bin rere long olgeta from mesej blong Hem, i wan bigfala wok. Sakses, oltaem, hem i no simpol. Oltaem, bifo long sakses ia, i gat wota blong ae, ol tes, tras, mo testemoni.
Ol wokman blong God oli kasem kamfot long stret tok blong Masta we i talem: “Bambae mi stap wetem yufala oltaem” (Matiu 28:20). Bigfala mo naes promes ia i sastenem yufala, ol brata blong Aronik Prishud, we oli singaotem yufala long ol posisen blong kam lida long ol kworom blong ol dikon, ol tija, mo ol pris. Hem i leftemap tingting blong yufala long taem we yufala i stap rere blong go givim seves long misin graon. Hem i kamfotem yufala long ol smol taem ia we tingting i givap, we i kam long evriwan.
Lod i talem se yumi no mas wari blong mekem gud samting, from yumi stap putum fandesen blong wan bigfala wok. Mo aot long ol smol samting, ol bigfala samting oli kamaot long hem.
Lod i nidim wan hat mo wan maen we i wantem mekem samting (luk long D&C 64:33–34). Wan strong fet, wan tras we i stap oltaem, mo wan strong tingting blong wantem mekem samting, oltaem, oli ol fasin we oli blong olgeta we oli givim seves long Lod wetem evri hat blong olgeta.
Sapos eni brata we i stap harem voes blong mi, mo filim se hem i no rere, o i no save mekem inaf blong ansa long singaot ia blong givim seves, blong sakrifaes, blong blesem ol laef blong ol narafala man, nao tingbaot trutok ia, se: “Huia we God i singaotem, God i mekem hem i kwalifae.
Foto pikja i kam long Kodi Bel © IRI