Olsem Wanem I Impoten blong Gat Ol Gud Fren

Ol fren oli gat wan strong paoa long ol aksen blong yumi, speseli long yangfala blong yumi. “Bae oli lidim olsem wanem yu tingting mo mekem samting, mo tu, oli helpem blong pusum yu long wanem kaen man o woman yu save kam.” Mo taem yu jusum ol gud fren, “bae oli kam wan we i mekem yu strong moa mo kam wan blesing long yu. … Bae oli helpem yu blong kam wan moa gud man o woman mo mekem i moa isi long yu blong laef long gospel blong Jisas Kraes.”²

Long ol pej 52–53 blong namba ia, Ilein S. Dalton, Yang Woman Jeneral Presiden, i tijim se i impoten blong stap lukaotem mo kam wan gud fren. “Lukaotem wan samting we i moa gud long wan naraman hem i impoten long wan tru frensip,” hem i talem.

Taem wan i stap bildim ol frensip long ol prinsipol ia bae i helpem ol yut blong gat wan rilesensip mo ol sosol skil we oli save stap blong longtaem moa i bitim blong jes kam “ol fren” long ol sosol netwok long intanet. Olsem wan papa o mama, yu save helpem ol pikinini blong yu oli andastanem from wanem i impoten blong kam wan gud fren mo blong jusum ol fren we bae i leftemap tingting blong olgeta blong laef folem gospel. Sam tingting long ples i save help.

Sam Tingting blong Tijim Ol Yut

Olsem wan famle, lukaotem ol skripja we oli givim ol eksampol blong ol gud fren. Toktokraon long wanem kwaliti nao i mekem ol frensip ia oli strong. Tingbaot Deved mo Jonatan (luk long 1 Samuel 18–23), Rut mo Naomi (luk long Ruth 1–2), mo Alma wetem ol boe blong Mosaea (luk long Mosaea 27–28; Alma 17–20).³
Luklukbak long seksen blong ol fren long buk blong Blong Ol Yut Oli Kam Strong. Serem wetem ol yangfala blong yu olsem wanem fasin blong mekem fren i lidim laef blong yu. Invaetem olgeta blong serem olsem wanem oli bin lidim ol fren blong olgeta mo olsem wanem ol fren blong olgeta i bin lidim olgeta.
Ridim stori blong Sista Dalton long namba ia. Tokbaot gol we gel blong hem, Emi i bin putum blong lukaotem ol gud fren. Helpem ol pikinini blong yu blong setem ol gol abaot ol kaen fren we oli wantem gat mo kaen fren we oli wantem kam.
Tingting blong gat wan famle haos naet blong serem ol tingting blong bildim ol frensip, olsem: “Blong gat ol gud fren, yu mas kam wan gud fren. Soem tru intres long ol narawan; smael mo lego olgeta oli save se yu kea long olgeta. Tritim evriwan wetem fasin blong stap kaen mo respek, mo stopem fasin blong jajem mo tokbaot olgeta we oli stap raon long yu.”⁴

Sam Tingting blong Tijim Ol Pikinini

Stap wan fren i minim tu blong helpem ol narawan. Ridim “Stanap long Saed blong Kaleb” long Maj 2009 Liahona mo toktok wetem ol pikinini blong yu abaot ol wei we oli save stap kaen long evriwan we oli mitim.
Long evri situesen, yumi mas disaed wanem kaen fren bae yumi kam. Singsing tugeta “Mi Traem blong Kam Olsem Jisas,”⁵ mo afta, toktok wetem ol pikinini blong yu abaot olsem wanem oli save jusum blong kam wan gud fren, olsem Sevya, long plante defren ples.

Pikja i kam long Taia Moli