Olsem Wanem Nao Mi Save
Invitesen blong Mi long Fasin blong Sevem Man
Pikja i kam long Roja Motskus
Olsem wan yang man, mi bin visitim plante jos mo mi bin konfius from wanwan i bin tijim defren intepretesen blong ol skripja. Mi no bin filim gud long fasin blong jik we mi faenem long sam long olgeta, mekem se mi givap nomo blong traem faenem wan jos blong go long hem.
Sam yia afta, wan fren blong mi, Kleiton Lima, i bin baptaes long Jos blong Jisas Kraes blong Ol Lata-dei Sent. Hem i no bin talem long mi nomata we mitufala i bin gud fren, be sam taem afta, mi stat blong luk ol jenis long hem. Long ol Sandei, mi bin stap go oltaem long haos blong hem long moning blong mifala i save pleiplei futbol, be mi no save faenem hem long hom. Hemia i bin hapen tu o tri Sandei i folfolem olgeta. I kam long taem we Kleiton i bin talem long mi se bae hem i nomo save pleiplei futbol long ol Sandei from hem i stap givim ona long dei blong Lod. Mi bin talem long hem, “Jos ia i mekem yu krangke.”
Afta, Kleiton i bin invaetem mi blong go long jos. Mi bin givim hem wan eskius from mi no bin hapi yet wetem relijin. Blong 10 manis, Kleiton i bin tekem ol misinari i kam blong tijim mi, be oltaem, mi gat eskius blong miwan o talem long olgeta se mi bin bisi. Be hem i neva givap.
Wan dei long Jun, hem i bin invaetem mi blong go long wan danis blong Jos. Mi jikim hem, “Bae i gat plante kakae we i fri mo plante gel?” Wetem laf, hem i talem yes!
Mi mas talem se bel blong mi i winim mi. Mi bin visitim jos mo mi lavem. Evriwan i bin welkamem mi, mi bin kakae plante, mo mi bin gat intres blong atendem wan miting. Taem mi bin kam long jos long Sandei, mi bin mitim plante pipol mo mi bin harem ol testemoni blong olgeta. Mi no bin save Buk blong Momon, be mi bin filim Spirit blong Lod taem sam long ol memba blong Jos oli bin testifae, “Mi save se Buk blong Momon i tru, se hemia i Jos blong Jisas Kraes, mo we Josef Smit i bin wan profet we God i singaotem.” Mi neva bin filim gud olsem. Mi no wantem mitim ol misinari yet, be testemoni miting ia i bin tajem mi.
Long nekis wik, Kleiton i invaetem mi bakegen blong go long jos. Mi no save go from mi bin gat sam samting blong mekem. Mi save luk fes blong hem we i harem nogud taem mi bin talem long hem se mi no save sapos mi save go o no.
Be long Sandei moning, mi bin wekap wetem wan tingting blong wantem go long jos. Mi wekap long 6:50, we i bin had long mi, mo mi bin rere mo wet long Kleiton blong kam. Hem i bin sapraes taem hem i bin luk mi mi jenis gud mo stap wet. Long Sandei ia, bisop i bin tij abaot prishud. Mi bin filim strong Spirit mo gat wan filing se mi mas tekem ol misinari lesen. Long en blong Ol Yang Man miting, mi bin save se bae mi kasem baptaes.
Taem jos i finis, mi talem long Kleiton, “Mi wantem kasem baptaes!”
Hem i bin ting se mi bin stap tok fani nomo. Be afta, hem i talem: “Sapos mi singaotem ol elda, bae yu save mitim mi wetem olgeta?” Mi bin ansa yes.
Mi bin kasem tijing long tu gudfala elda. Taem mi bin harem mesej blong Restoresen, mi kasem strong konfemesen se mi mas kasem baptaes. Be mi wantem blong save miwan sapos Buk blong Momon i tru. Ol elda oli bin makem Moronae 10:3–5 long Buk blong Momon blong mi mo invaetem mi blong prea mo askem God sapos hem i tru.
Long nekis naet, mi bin tingbaot se mi no bin ridim Buk blong Momon yet. Taem mi stat blong rid, mi bin filing wan strong spirit. Mi bin prea mo bifo mi finis, mi bin save se Buk blong Momon i tru. Mi glad tumas long God blong save givim ansa long prea blong mi. Mi bin baptaes long Julae 2006.
Samtaem afta mi bin sev olsem wan misinari long Brasil Kuiaba Misin, mo fren blong mi Kleiton i bin sev long Brasil Santa Maria Mision. Mitufala i bin mekem wanem we Kleiton i bin mekem blong mi: invaetem pipol blong kam long Kraes mo helpem olgeta blong kasem gospel we i bin kambak taem oli yusum fet long Jisas Kraes, stap sakem sin, kasem baptaes, mo kasem presen we i Tabu Spirit. Hemia i tru rod ia nao blong kasem fasin blong sevem man.
Oltaem, bae yumi invaetem ol fren mo ol famle blong yumi blong lanem abaot gospel ia, from Sevya i bin invaetem evriwan taem Hem i talem: “Kam long mi” (Matiu 11:28). Mi save se hemia i Jos blong Jisas Kraes, mo we naoia, i taem blong invaetem evriwan blong kam long Hem.