Ol Tempol Kwestin mo Ansa

From wanem yumi gat ol tempol?

Ol tempol blong Jos blong Jisas Kraes blong Ol Lata-dei Sent oli ol tabu ples we yumi lanem ol trutok we i no save finis mo tekpat long ol tabu odinens.

Insaed long tempol, i olsem wanem?

Tempol i wan ples blong pis, blong stap revren mo i wan naes ples. Evriwan insaed long tempol i klin mo wok long oda. Evriwan i werem waet klos mo toktok wetem ol voes we oli kwaet.

Wanem i stap hapen insaed long ol tempol?

Wan waef i save sil long hasban blong hem, mo ol pikinini oli save sil long papa mo mama blong olgeta. Siling i mekem i isi blong ol famle blong stap tugeta blong taem we i no save finis. Long tempol, ol man mo woman tu oli kasem wan presen we i ol blesing long saed blong spirit we oli singaotem endaomen. Oli save kasem endaomen blong olgeta mo save sil long bihaf blong olgeta we oli bin ded be oli no bin mekem ol tempol kavenan.

Wanem moa i stap hapen insaed long ol tempol?

Wetem siling mo endaomen, i gat ol nara odinens we oli mekem insaed long ol tempol. Ol pipol oli save kasem baptaes mo konfemesen long bihaf blong olgeta we oli no bin save joenem Jos taem oli bin stap laef. Taem yu kasem 12 yia mo yu klin inaf blong go insaed long tempol, yu save gat janis blong kasem baptaes mo kasem konfemesen long bihaf blong olgeta we oli bin ded be oli no bin save gospel.

Wanem i hapen sapos famle blong mi i no go long tempol yet?

Papa long Heven i save mo lavem yu mo famle blong yu. Hem i wantem evriwan blong gat ol blesing blong ol tempol odinens. Laef klin inaf blong go insaed long tempol. Putum wan gol naoia se bae yu kasem endaomen mo mared insaed long tempol sam dei. Papa blong yu long Heven bae i blesem yu mo famle blong yu.

Pikja i kam long Brad Teare