Ol Ten Wei blong Save Se Yu Bin Jenisim Laef

I Kam long Teila Oton

Teila Oton i stap long Java, Indonesia.

Mi bin lanem long prishud miting se wan long ol stamba tingting blong Aronik Prishud i blong helpem mifala “i jenisim laef i kam long gospel blong Jisas Kraes mo laef folem ol tijing blong Hem.”¹ Mi no bin sua se i minim wanem blong “jenisim laef i kam long gospel blong Jisas Kraes.” Mi askem papa mo mama blong mi mo ol bigfala brata mo sista blong mi blong talem wanem oli ting se i minim, mo tugeta, mifala i bin toktok raon long plante wei we yu save luk sapos yu bin jenisim laef.

Ating i gat plante narawan, be hemia ol 10 wei we mifala i bin kam antap wetem. From se fasin blong jenisim laef i wan rod we i longfala, yumi no nid blong kam stret evriwan long wanwan long ol eria ia naoia, be oli save helpem yumi save sapos yumi stap mekem progres.

Taem we yu bin jenisim laef, yu no bin save nomo wanem yu mas mekem, be tu, yu bin wantem tumas blong mekem raet samting. Hem i no inaf blong jes no mekem wan samting we i rong from yu fraet blong oli kasem yu, o panisim yu. Taem yu jenisim laef tru, yu rili wantem blong jusum raet.
Wan nara saen blong kam blong jenisim laef, i we yu nomo wantem nating blong mekem rong samting. Ol Antae Nifae Lihae oli gudfala eksampol blong samting ia. Taem oli bin jenisim laef i go long gospel blong Kraes, oli bin “mekem wan kavenan wetem God blong wok blong hem mo holem ol komanmen blong hem” (Mosaea 21:31). Olsem ol pipol blong Nifae we oli bin kasem tijing long King Benjamin, oli “nomo wantem blong mekem nogud fasin” (Mosaea 5:2). Oli bin jenisim laef fulwan i go long gospel blong Kraes, mo ol temtesen blong Setan i no bin gat paoa ova olgeta.

Blong soem se bae oli stap tru long ol kavenan blong olgeta blong laef folem gospel, ol pipol blong Leman oli bin berem ol tul blong faet blong olgeta (luk long Alma 24).
Taem yu jenisim laef, yu wari moa long wanem nao tingting blong God bitim wanem we ol narafala man oli ting abaot yu. Long skul blong mi long Indonesia, ol studen i stap drink tumas. Samtaem bae i temtem mi blong go aot mo pati taem evriwan i stap mekem olsem mo stap laf long yu taem yu no go. Brata blong mi, oli i bin invaetem hem blong dring mo pati plante taem, be hem i neva bin mekem—hem i bin stanap from wanem we hem i biliv long hem. I bin had, mo hem i bin spendem plante naet long hom hemwan nomo. Taem ol studen oli stap talem tata long graduesen blong hem, sam pipol i bin talem long hem olsem wanem oli sapraes se hem i no save akseptem fos blong ol fren blong skul, mo blong stap tru long ol standet blong hem. Oli bin talem long hem hamas oli bin lukluk hem antap from samting ia. Hem i bin soem olsem wanem hem i bin jenisim laef taem hem i bin stanap agensem fos we i kam long ol studen fren blong hem.
Taem yu jenisim laef, yu traem bes blong laef folem gospel oltaem—i no long ol Sandei nomo o taem we i stret, be i mas evri taem. Ol aksen blong yu oli no jenis folem huia yu stap wetem o folem huia i stap lukluk yu. Taem ol fren blong yu oli talem wan rabis fani tok o wantem lukluk wan rabis muvi, yu no go folem nomo from yu ting se i no gat man i stap lukluk yu; be yu stanap from wanem we yu yu biliv.
Taem yu jenisim laef, yu kam moa kaen mo gat lav mo sore taem yu dil wetem ol narawan. Yu no mas jaj o tokbaot man o gosip. Yu kam blong save moa long ol filing blong ol naraman, mo i kam wan nomol samting blong faenem ol wei blong givim seves mo help. Sapos yu stap wokbaot daon long holwei blong skul blong yu mo wan studen i mestem ol buk blong hem, yu no nid blong tingbaot wanem blong mekem. Yu stop semtaem mo help.
Taem yu jenisim laef, fasin blong yu blong wantem prea i kam antap mo bae yu filim olsem we yu stap toktok stret wetem God taem yu prea. Bae yu oltaem faenem taem blong prea nomata yu filim olsem wanem o wanem i stap hapen long laef blong yu. Presiden Esra Taf Benson (1899–1994) i bin talem long yumi, “Sapos yumi no filim blong prea, nao yumi mas prea kasem we yumi filim blong prea.”²
Taem yu jenisim laef, yu lukluk fored long Sandei from hem i Sabat. Taem Sandei i kam, yu no tingting se: “O man, i wan dei we mi no save go aot wetem ol fren blong mi o go long muvi,” be yu tingting se: “Gud tumas, wan dei we mi save go long jos mo tingting long ol samting long saed blong spirit mo spendem taem wetem famle blong mi!”
Taem yu jenisim laef, yu kipim ol komanmen mo yu no lukaotem ol eskius, faenem risen blong ol rong fasin blong yu, o traem blong faenem ol spesel risen blong brekem ol komanmen. No traem blong go bitim wanem we i raet; simpol nomo, yu obei long ol komanmen from yu save se hem i moa gud wei.
Taem yu jenisim laef, yu lukluk fored blong pem taeting blong yu. Yu luk hemia olsem wan spesel janis mo filim se 10 pesen i no tumas, speseli taem yu komperem wetem ol blesing mo ol harem gud we yu kasem. Ol blesing ia oli moa bitim mane yu pem.
Taem yu jenisim laef, yu wantem tumas blong helpem ol narafala man blong save trutok mo fasin blong stap hapi we yu bin faenem. Wan gud eksampol insaed long ol skripja hem i drim blong Lihae we hem i wantem tumas blong serem ol swit frut blong tri blong laef wetem famle blong hem. Taem hem i tekem frut ia, hem i bin tingbaot fastaem blong no tekem tumas blong hemwan be blong lukaotem famle blong hem blong oli save tekem frut ia tu mo gat semmak fasin blong stap hapi (luk long 1 Nifae 8:12).

Long sot, yu save se yu stap jenisim laef taem yu stat blong laef folem loa we i hae moa, we i gospel blong Jisas Kraes. Yu laef folem spirit blong loa ia semmak olsem yu laef folem toktok blong loa. Yu laef folem gospel long evri saed blong laef blong yu. Yu laef folem gospel fulwan, i no from yu mas mekem be from yu wantem blong mekem. Yu yu wan man we yu moa hapi mo naes, mo yu wantem blong kam man we Papa long Heven i wantem yu blong kam. Yu wantem kam olsem Jisas Kraes mo folem eksampol blong Hem. Taem yu kam man ia, yu bin rili jenisim laef blong yu fulwan.

Antap: foto pikja © IRI; coins © isStockphoto.com/Thinkstock; Visen blong Lihae Abaot Tri blong Laef we i kam long Robin Luch © IRI