Ol Yang Woman mo Rilif Sosaeti Jeneral Lida Oli Tua long Eria blong Esia
Blong naen dei long Novemba 2012, Meri N. Kuk, fas kaonsela long Yang Woman jeneral presidensi, Linda S. Rivs, seken kaonsela long Rilif Sosaeti jeneral presidensi, i bin tijim mo givim inspiresen long ol sista, yangfala mo olfala, raon long Eria blong Esia.
Trip ia i bin hapen long sem taem we oli bin anaonsem niufala yut kurikulum, Kam, Folem Mi, we Ol Yang man, Yang Woman, mo yut Sandei Skul klas bae oli stat yusum long Jenuware 2013. Niufala kurikulum ia, oli mekem blong helpem ol tija blong tij moa olsem Sevya i bin mekem, mo developem ol strong rilesensip wetem ol memba blong klas.
Folem visit blong Sista Kuk mo Sista Rivs long Eria blong Esia, plante yut blong Esia mo ol papa mo mama blong olgeta oli ting se naoia oli kam moa strong blong klinim gud mo lukluk bakegen long ol laef blong olgeta, mo kam ol eksampol long ol lokol komiuniti blong olgeta.
Long Hong Kong, Sista Rivs i bin promesem ol yut: “Sapos bae yu stap klin long laef blong yu, yu save stanap wetem tras long fored blong eniwan!”
Tru long ol toktok blong hem, 12 yia Tang Kak Kei i bin mekem toktok ia afta long miting: “Mi save se mi nidim blong ridim Buk blong Momon evri dei. Blong stap lanem blong sakem sin mo laef long stret mo gud fasin i wanem buk ia, Blong Ol Yut Oli Kam Strong i bin tijim mi blong mekem, blong Laet blong Kraes mo tru hapines i save fulumap mi.”
Long India, Sista Kuk i bin mit wetem ol memba long niu mitinghaos long Jenai India Distrik mo wetem ol memba blong niu Haederabad India Stek mo talem long ol yang adalt blong rere from fiuja. “Kwalifaem yufalawan long saed blong edukesen,” hem i talem strong, “wetem ol skil blong helpem yufala blong bildimap kingdom. Lukluk moa long famle blong yufala mo wanem yufala i save mekem blong blesem ol memba blong famle blong yufala, mo long fasin blong yufala blong rere long saed blong spirit mekem se bae yufala i save stap klin inaf blong save filim spirit, mo olsem ia nao bae yufala i save wea blong go mo wanem blong mekem.”
Long Indonesia, Sista Rivs i bin tekempat long fas stek konfrens blong niu Surakarta Indonesia Stek. “Mifala i bin filim hat blong olgeta we i stap daon mo ol spirit blong lav blong olgeta. Oli bin ol fetful memba!” Hem i talem.
Afta Sista Rivs i bin visitim Malesia, longwe hem i toktok raon wetem wan grup blong ol Rilif Sosaeti sista abaot wan impoten topik blong Rilif Sosaeti olsem wan oganaesesen long Malesia mo olsem wanem Jos i save givim help mo inspiresen.
Long Taiwan, Sista Rivs i bin tokbaot paoa mo dedikesen blong ol lokol memba. Hem i talem: “Mifala i glad tumas blong save abaot ol fetful laef blong olgeta mo olsem wanem oli stap go oltaem long tempol. … Ol memba oli eksampol blong lav long ol fren mo neiba blong olgeta.”
Long Taiwan, Meri N. Kuk mo Linda S. Rivs i mitim ol eria atoriti mo ol prishud lida mo memba blong Taiwan.
Foto i kam long Yang Jie-wen