Telefon I Of
Seda Meliksetian, Amenia
Long Maj 1997, taem we mi stap long siti blong Rasia long Rostov on Don, mi mo hasban blong mi i bin kasem baptaes long Jos blong Jisas Kraes blong Ol Lata-dei Sent.
Taem mi bin stap stadi ol doktrin blong Jos, mi bin kasem ansa long plante long ol kwestin blong mi. Mi bin intres blong lanem abaot plan blong fasin blong sevem man, hemia wetem praktis blong baptaes blong olgeta we oli ded. Mi bin sapraes blong lanem se yumi save kasem baptaes from ol olfala blong yumi we oli bin ded longtaem finis.
Wan yia afta long baptaes blong mitufala, misin presiden i bin invaetem mitufala blong rere blong go long tempol. Olsem pat blong mekem mitufala i rere, mitufala i stat blong mekem famle histri wok. Wan dei taem we mi stap tingting blong mekem wok ia, telefon i ring. Mama blong hasban blong mi i ring. Mi bin askem hem sapos hem i save sendem wan lis blong ol olfala long saed blong famle blong hasban blong mi we oli ded finis. Hem i bin sapraes mo talem se baptaes blong ol dedman i no doktrin blong Kraes, be i wan samting we ol Momon nomo oli mekemap. Mi no bin sua se bae mi ansarem hem olsem wanem from mi no save gud ol skripja we i abaot doktrin ia.
Taem mi stap tingbaot olsem wanem blong ansa, telefon i of. Blong wan minit mi no sua long wanem i bin hapen, be mi putumdaon telefon mo go long bedrum blong mi. Mi tekem Niu Testeman long ol han blong mi, mi nildaon blong prea, mo askem Papa long Heven blong soem long mi wea nao bae mi save faenem ansa.
Long en blong prea blong mi, mi openem Baebol. Mi bin filim olsem se wan man i bin talem long mi blong ridim ves 29 long stret pej we mi bin openem i stap. Mi bin stap long japta 15 blong Fas Korin, we i tokbaot doktrin blong baptaes blong ol ded man.
Papa long Heven i bin ansarem prea blong mi long sem taem ia nomo mo hemia i bin tajem mi mo i mekem mi sapraes. Hem i bin wan gudfala filing.
Mi bin stap tingting plante abaot eksperiens ia taem mi sek nomo se telefon i ring bakegen. Hem i bin mama blong hasban blong mi we i askem se from wanem telefon i bin of. Mi talem long hem se mi no bin save, be afta mi askem hem blong openem Baebol blong hem mo ridim Fas Korin 15:29.
Sam dei afta, wan lis blong ol famle we oli ded finis i bin stap long tebol blong mi. Mama blong hasban blong mi i bin ridim skripja ia, mo naoia hem i bilivim se Sevya, tru long Aposol Pol, i bin tijim doktrin blong baptaes blong olgeta we oli ded.
God i bin promesem ol bigfala blesing long olgeta we oli mekem wok blong pemaot man. Mi save se hemia i tru.