Kolosap long Tempol
Blong plante pipol, tempol i givim i kam ol filing we oli kam long heven we kwiktaem yu save filim insaed long hat.
Bifo oli singaotem mi wan memba blong Seken Kworom blong Olgeta Seventi, mi mo waef blong mi i bin spendem sam yia blong wok long ol tempol blong Kampinas mo Sao Polo Brasil. Long tugeta tempol, oltaem mi sapraes se pipol we oli pas long saed blong tempol, bae oli kam kolosap long tempol mo bae oli stop, go insaed mo askem moa abaot tempol.
Taem oli go insaed, mifala i talem long olgeta se bae oli no save go moa from oli mas folem stret fasin blong rere gud. Afta bae mifala i eksplenem stamba tingting blong tempol, serem sam stamba doktrin blong gospel, mo invaetem olgeta blong mitim ol misinari. Blong plante gud pipol, tempol hemwan i olsem wan misinari from i givim ol filing we i kam long heven we i save kwiktaem go long hat.
Mi mo waef blong mi Elisabet i save mo witnesem stret,paoa blong ol kaen filing ia. Kolosap 40 yia i pas finis, wan gudfala fren mo wan we i wok wetem mi, wan memba blong Jos, i bin stat blong tokbaot gospel wetem mifala long wan nomol storian. Long wanwan taem, hem i bin sendem ol misinari blong visitim mifala. Mifala i bin laekem ol misinari mo agri blong tekem ol lesen, be mifala i no intres tumas long wanem oli gat blong tijim.
Samting ia i bin jenis long Oktoba 1978, taem we fren blong mi i invaetem sam fren, wetem mifala, i go long open haos blong Sao Polo Brasil Tempol. Hem i bin rentem sam bas we hemwan i pem blong mekem se ol fren blong hem i save joenem hem long tempol, kolosap 80 kilomita longwe.
Taem Elisabet i bin go insaed long ples we oli stap mekem baptaes long hem, hem i bin filim wan samting we hem i neva gotru long hem bifo, wan samting we hem i luksave afta olsem Tabu Spirit. Filing ia i bin wan bigfala glad long hat blong hem. Hem i bin save long taem ia se Jos i bin tru mo i bin Jos ia nao we hem i bin wantem joenem.
Wan sem filing olsem i bin kam long mi long en blong open haos, taem oli bin tekem mifala i go long siling rum mo kasem tijing long ol famle we i no save finis. Doktrin ia i bin tajem mi. Mi bin gat sakses wetem wok blong mi, be mi bin filim sol blong mi i emti. Mi no bin save wanem nao bae i fulumap emti spes ia, be mi filim se i mas gat wan samting wetem famle. Be longwe, long siling rum, ol samting i stat blong kam klia long maen mo hat blong mi.
Blong sam dei, ol misinari i bin kontaktem mifala bakegen. Taem ia nao mifala i bin intres bigwan blong harem mesej blong olgeta.
Ol elda i bin leftemap tingting blong mifala blong prea wetem glad abaot trutok. Mi plan se hemia i bin wan wei ia nomo we mi save prea long hem. Mi bin save se mi no save mekem wan komitmen blong joenem Jos sapos mi nogat wan testemoni. Mi bin wari blong go kolosap long Papa long Heven blong askem wan konfemesen long Hem, be long semtaem, mi bin sua se Hem i save ansarem mi. Mi bin serem wetem Hem ol samting we mi wantem tumas we i stap insaed long hat blong mi mo askem Hem blong givim mi wan ansa we bae i mekem mi filim sua se joenem Jos i bin wan stret rod.
Long nekis wik long Sandei Skul, fren blong mifala we i bin invaetem mifala i go long open haos blong tempol i bin sidaon bihaen long mi. Hem i lei i kam long fored mo stat blong toktok long mi. Ol toktok we hem i bin talem i bin stret samting we mi bin prea from blong save. Mi no bin gat tu tingting se Papa long Heven i bin stap toktok long mi tru long hem. Long taem ia, mi bin wan strong mo had man, be hat blong mi i bin sopsop mo mi bin stat blong krae. Taem we fren blong mi i finis blong toktok, hem i bin invaetem waef blong mi mo mi blong kasem baptaes. Mitufala i bin akseptem.
Long 31 Oktoba 1978, sam wik afta long eksperiens blong mifala long Sao Polo Tempol, mifala i bin kasem baptaes mo konfemesen. Long nekis dei, mitufala i bin tekempat long nambatu sesen blong dedikesen blong Sao Polo Brasil Tempol. Wan yia afta, mitufala i bin gobak long tempol wetem tufala boe blong mitufala we bae oli sil yet long mitufala olsem wan famle. Evri trifala taem ia i bin naes tumas, mo oli ol memori we bae mifala i no save fogetem. Mifala i bin gohed blong gat ol filing ia taem mifala i stap go mekem tempol wosip truaot long ol yia.
Twante-eit yia afta long dei afta baptaes blong mifala, mi mo waef blong mi i bin stanap bakegen long Sao Polo Brasil Tempol. Oli jes singaotem mi olsem tempol presiden. Hem i bin wan naes eksperiens blong mitufala blong wokbaot long ol veranda blong haos blong Lod mo blong filim bakegen naes filing we i olsem stamba samting long jenis blong laef blong mitufala.
Tempol i gohed blong karem i kam, long mi mo waef blong mi, wan bigfala glad. Taem mitufala i luk wan yang kapol i go insaed long tempol blong sil olsem wan famle we i no save finis, mitufala i filim bigfala hop.
Plante pipol raon long wol oli stap rere blong harem mesej blong gospel. Oli bin filim se oli tosta semmak long wanem we mi bin filim moa bitim 30 yia i pas finis. Tempol mo ol odinens blong hem, oli fulap long paoa we i save mekem man we i tosta i nomo tosta mo fulumap ol spes.
Foto i kam long Loreni Fosetto