Etal n̄an Tampeļ eo
N̄an elōn̄ armej ro rem̧m̧an, tampeļ eo ej im̧we en̄jake ko me remaron̄ kajju deiil bōro.
M̧okta jen aō kar kūr āinwōt juon membōr in Doulul eo Kein Karuo an Jiljilimjuonn̄oul eo, kōrā eo pāleeō im n̄a kar joļok jet iiō ko jerbal ilo Cmapinas im Tampeļ ko ilo São Paulo Brazil. Ilo jim̧or tampeļ ko, emakijkij aō bwilōn̄ bwe armej ro rej itok turin tampeļ eo remaron̄ lukkuun in kepaak leļo̧k aer jon̄an rej bōjrak, deļo̧n̄e, im kajjitōk kake.
N̄e rej deļo̧n̄, kōm kar karōn̄ er bwe rej jab maron̄ deļo̧n̄ļo̧k wōt ilo an ejjeļo̧k kōppopo eo ejejjet. Innām kōm̧ ar kōmeļeļeik unleplep in tampeļ eo, kwaļo̧k jet pedped in katak ko an ko̧jpeļ, im karuwaineneik er n̄an ioon mijenede ro. N̄an elōn̄ armej ro rem̧m̧an, tampeļ eo ej im̧we en̄jake ko me remaron̄ kajju deiil bōro.
Kōrā eo pāleeō, Elizabeth, im n̄a rej jeļā jān kajoor in en̄jake in am̧ make. Enan̄in 40 iiō ko rem̧ootļo̧k, juon eo jeram̧ im m̧ōttam̧ em̧m̧an, juon membōr in Kabun̄ in, kar jino kōnono kōn ko̧jpeļ eo ippam̧ ilo juon iien am̧ bwebwenato bajjōk. Ilo jet iien ko, eaar jilkintok mijenede ro n̄an lotok kōm̧. Kōm̧ ar kōņaan mijenede ro im kar errā n̄an bōktok katak ko ak kōm̧ ar jab lukkuun itok limo kōn ta eo rej katakin kake.
Oktak in eaar ilo Oktoba 1978, ke eo m̧ōtta eaar kūr tok jet m̧ōttan, ekoba kōm̧, n̄an kōppeļļo̧k eo an São Paulo Brazil Temple. Eaar reen e jet bus ko kōn jāān ko an make bwe ro m̧ōttan ren kobaļo̧k ippān ilo tampeļ eo, emaron̄ 50 maiļ ko (80 km) ettoļo̧k.
Ke Elizabeth eaar deļo̧n̄e jikin peptaij eo, eaar en̄jake juon men eaar jab en̄jake m̧okta, juon men tokālik eaar en̄jake āinwōt Jetōb Kwojarjar. En̄jake eo ear juon lan̄lōn̄ eļap ilo būruwōn. Eaar jeļā ilo iien eo wōt bwe Kabun̄ in eaar m̧ool im bwe eaar Kabun̄ eo eaar kōņaan pād ie.
Ejja en̄jake eo wōt eaar itok n̄an eō ilo jem̧ļo̧kin iien kaloojoj eo, ke kar tōl ļo̧k kōm̧ n̄an ruum̧ in liāp eo im kar katakin katak eo an baam̧le ko indeeo. Katak eo eaar un̄n̄ūr eō. Iaar wejepdik ilo jerbal eo aō, bōtaab kar en̄jake ejjeļo̧k kobban ilo jetōb eo aō ium̧win juon tōre aitok. Iaar jab jeļā ta eo emaron̄ kanne ijo ejjeļo̧k kobban, bōtaab arromeļo̧k bwe eaar juon men n̄an kōm̧m̧an ippān baam̧le eo aō. Ijeņ, ilo ruum̧ in liāp eo, men ko raar meļeļe kaki ilo ļōmņak eo aō im būruwō.
Ilowaan wōt jet raan ko, mijenede ro raar ioon kōm bar juon alen. Iien in kōm̧ ar lukkuun itok limoim n̄an ron̄jake ennaan eo aer.
Elder ro raar rōjan̄ kōm̧ n̄an jab mōk in jar kōn m̧ool. Iaar pepe bwe en̄in eaar iaļ eo de in ij aikuj jar. Iaar jeļā bwe ijjab maron̄ kōm̧m̧ane juon kallim̧ur n̄an kobatok ilo Kabun̄ in ijjelo̧kin wōr juon naan in kam̧ool eo em̧ool. Iaar kijoror kōn kepaak Jemedwōj Ilan̄ n̄an kajjitōk kōn juon kapen jān E, ak ilo ejja iien eo wōt, iaar jeļā bwe Enaaj uwaake eō. Iaar kwaļo̧k n̄an E m̧wilaļ in kōņaan ko an būruwō im kajjitōk Ippān n̄an letok n̄an eō juon uwaak me ekōņaan bwe in kobatok ilo Kabun̄ in n̄e ar iaļ eo ejim̧we.
Ilo wiik eo tok juon ilo Jabōt Jikuuļ, eo m̧ōttam me eaar karuwaineneik kōm̧ n̄an iien kaloojoj eo an tampeļ eo ekar jijet itulikū. Eaar mal m̧aantak im jino kōnono n̄an eō. Naan ko eaar ba eaar uwaak in ta eo iaar jar kake n̄an jeļā. Eaar ejjeļo̧k aō pere ke Jemedwōj Ilan̄ eaar kōnono n̄an eō kōn e. Ilo iien eo, iaar juon armej ekije, pen, bōtaab iaar jino in en̄jake eļapļo̧k jouj n̄an ro jet im iaar jino jan̄. Ke eaar m̧ōj an eo m̧ōtta kōnono, eaar karuwaineneik kōrā eo pāleeō im n̄a n̄an peptaij. Kōm̧ ar errā.
Ilo Oktoba 31, 1978, ālkin juon allōn̄ in en̄jake eo am̧ ilo São Paulo Temple, kōm̧ ar peptaij im kapen. Raan eo juon kōm̧ ar bōk koņaam ilo m̧wen̄an in aje eo kein karuo an São Paulo Temple. Juon iiō tokālik kōm̧ ar bar jepļaak ļo̧k n̄an tampeļ eo ippān ļaddik ro ruo nejūm̧ n̄an liāp āinwōt juon baam̧le. Aolepān iien kein jilu raar aiboojoj, ememļo̧kjeņ in en̄jake ko rem̧m̧an. Kōm̧ ar wōnm̧aanļo̧k n̄an kajeeded en̄jake ko kōn kabun̄jar an tampeļ eo ium̧win iiō ko.
Ron̄oul ralitōk iiō ko n̄an raan in peptaij eo am̧, kōrā eo ippa im n̄a kar bar juon alen jutak ilo São Paulo Temple. Ej kab m̧ōj kar kūr eō āinwōt tampeļ būreejtōn eo. Eaar juon en̄jake em̧m̧an n̄an kōm̧ etetal ilo jikin etetal ko an m̧weo im̧ōn Irooj im n̄an en̄jake en̄jake ko rekāāl me raar kanooj kareel oktak eo am.
Tampeļ eo ej wōnm̧aanļo̧k wōt n̄an bōktok n̄an kōrā eo pāleeō im n̄a lem̧ōņōņō eļap. N̄e kōm̧ij lo juon ripālele edik ej deļo̧n̄e tampeļ eo n̄an liāp āinwōt juon baam̧le indeeo, kōm̧ij en̄jake eļap kōjatdikdik.
Elōn̄ armej ro ipeļaakin laļ in rej kōppopo n̄an ron̄jake ennaan eo an ko̧jpeļ eo. Rej en̄jake kōņaan kōn ejja ta eo iaar en̄jake elōn̄ļo̧k jen 30 iiō ko. Tampeļ eo im kain̄i ko ebwe aer kajoor n̄an kwaļo̧k kōņaan eo im kanne ijo aer ejako.
Pija jen Laureni Fochetto