Katak kōnono ko an Kweilo̧k eo Eļap Ippān Doon

Jen Greg Batty

Greg Batty ej jokwe ilo Utah, USA.

Ukōt wāween am etale kweilo̧k eo elukkuun kōkōm̧anm̧anļo̧k ekōnono in ko̧jpeļ eo am āinwōt juon baam̧le.

Ilo iiō ko jaar lan̄lōn̄ ilo riiti jen kōnono eo an kweilo̧k eo āinwōt juon baam̧le, juon bwebwenato ilo juon iien. Ke kōm̧ ar jinoe, kōm̧ kijon̄ kuktok ippān doon iturin tebōļ eo im ilo bōk koņaan doon riiti juon pārokūreep. Ak kōm̧ ar loe bwe kōm̧ ar riiti n̄an eļļā jāne, ijjelo̧kin bōjrak n̄an dibdiki ennaan ko.

Bwe jen maron̄ bōk eļapļo̧k jen ta eo kōm̧ ar riiti, kōrā eo pāleeō im n̄a kar wiak juon kape in bok in kweilo̧k eo n̄an kajjojo membōr in baam̧le eo im kar karōki jete kōnono kōm̧ij aikuj in ekkatak kajjojo wiik bwe kōm̧in maron̄ riiti aolepāer m̧okta jen kweilo̧k eo eļap tok juon. Jet wiik kōm̧ naaj riiti juon kōnono, im wiik ko jet enaaj ruo, ak aolep raar aikuj ekkatak kōn kōnono im kōkkaļeik m̧ōttan ko em̧m̧an ippāer. Innām n̄an nokon in jota eo an baam̧le, kōm̧ naaj kar katakin doon jān m̧wen̄an ko kōm̧ kar kōkkaļeik.

Kōm̧ij peļļo̧k n̄an ekōnono ko am emakijkij ilo an ajri ro nejim wōr aer kajjitōk, ak kōrā eo pāleeō im n̄a kar kajjitōk kajjitōk ko jān ekkatak ko am. Kōm̧ij kaorōk ron̄jake jodikdik ro nejim aer kōmeļeļeik uwaak ko aer n̄an kajjitōk ko, kwaļo̧ki men ko raar ekkatak ilo jemenere, ilo m̧ōn jar eo, ak ilo ekkatak ko aer make. Menin ej erom juon wāween eļap n̄an ron̄jake naan in kam̧ool an ro jet ilo juon iien ilo juon mejatoto eainōm̧m̧an, im meļak.

Ejjab etto kōm̧ ar loe bwe katak jeje ko rekwojarjar in jibbon̄ eo am eaar juon wōt ilo en̄jake. Jet raan kōm̧ij maron̄ tōpar jejjo wōt eoon m̧okta jen an m̧aat awa eo jān ekonono eo kōn eoon ko im ewi wāween aer jerbal n̄an ta eo ej waļo̧k ipeļaakid.

Jibbon̄on̄ ko am rej obrak kōn ekōnono, ettōn̄, im ippān doon m̧okta jen am diwōjļo̧k n̄an jerbal ko am kajjojo. Ewōr am naan in kam̧ool ko rekajoor kōn kapilōk eo an rikanaan eo ad n̄an ekkatak im jar ippān doon aolep iien. Baam̧le eo am eaar oktakļo̧k n̄an juon eo me ej ekkatak jān im kōkajoorļo̧k doon. Aolepān menin ej juon waļo̧k in kōņaan in bōk jidik jen kweilo̧k eo eļap.