Ritōl ro Routiej an Doulul eo an Jiron̄ ro im Doulul eo an Kōrā ro raar Loļo̧k Eria eo ilo Asia
Ium̧win ratimjuon raan ko ilo Nobōm̧ba 2012, Mary N. Cook, rikakpilōklōk eo kein kajuon ilo būreejtōnji eo eutiej an Doulul eo an Jiron̄ ro, im Linda S. Reeves, rikakpilōklōk eo kein karuo ilo būreejtōnji eo eutiej an Doulul eo an Kōrā ro, kar katakin im kar im̧we sister rūm̧m̧an ded ro im ro rōrūttoļo̧k ilo aolepān Asia Eria en.
Tūreep in eaar kōm̧m̧an ilo ejja iien eo wōt kar kōjeļļā kōn oktak eo an laajrak in kein katak eo an jodikdik ro, Come, Follow Me, eo me Doulul eo an Likao ro, Doulul eo an Jiron̄ ro, im kūlaj ko an Jabōt Jikuuļ an Jodikdik ro naaj jino kōjerbale ilo Jānwōde 2013. Laajrak in kein katak eo ekāāl ar kōm̧m̧an n̄an jipan̄ rūkaki ro katak eļapļo̧k āinwōt an kar Rilo̧mo̧o̧r eo kōm̧m̧ane im kōkajoorļo̧k jem̧jerā ko ippān ro uwaan kūlaj eo.
Ālkin loļo̧k eo an Sister Cook im Sister Reeves n̄an Asia Eria eo, elōn̄ jodikdik in Asia ro im ro jineer im jemāer raar ļōmņak bwe ren kiiō ļapļo̧k aer ellowetak n̄an karreoik im bar kalimjōk mour ko aer im erom waanjon̄ak ko n̄an jukjukinpād ko aer ijo jokwe ie.
Ilo Hong Kong, Sister Reeves ar kallim̧uri jodikdik ro, “Elan̄n̄e kom̧ naaj erreo wōt ilo mour eo ami, kom̧ maron̄ jutak kōn leke im̧aan jabdewōt!”
Im̧we kōn naan ko an, Tang Kak Kei 12-iiō dettan ar ba ālkin kweilo̧k eo, “Ijeļā bwe ij aikuj in riiti Bok in Mormon eo kajjojo raan. Katak n̄an ukweļo̧k im mour jim̧we ej ta eo Non Kokajur Jodrikdrik Ro eaar katakin eō n̄an kōm̧m̧an bwe Meram in Kraist im m̧ōņōņō eo em̧ool en maron̄ kobrak eō.”
Ilo India, Sister Cook ar ioon membōr ro ilo im̧ōn jar eo ekāāl ilo Chennai India District im ippān membōr ro ilo Hyderabad India Stake eo im kar kakkōļ rūm̧m̧an ded ro n̄an m̧aanjebpopo n̄an ilju im jekļaj eo. “Jeļā kōkōrbab eok make,” liin ar kapilōk, “kōn kapeeļ ko n̄an jipan̄ eok kalōk aelōn̄ in kiin̄ eo. Pedped ioon baam̧ļe eo am̧ im ta eo kwomaron̄ kōm̧m̧ane n̄an kōjeram̧m̧an ro uwaan baam̧le eo am̧, im kōppopo eo am̧ ilo jetōb bwe kwonaaj erom erreo kōn im̧we ko an jetōb im bwe kwonaaj jeļā ia eo n̄an etal n̄ane im ta eo n̄an kōm̧m̧ane.”
Ilo Indonesia, Sister Reeves ar bōk kūņaan ilo kweilo̧k eo an stake kein kajuon ilo stake eo ekāāl an Surakarta Indonesia Stake. “Kōm kar en̄jake ettā eo aer im jetōb ko aer reiakwe. Membōr ro retiljek!” liin ar ba.
Innām Sister Reeves eaar loļo̧k Malaysia, ijo eaar ekōnono ippān juon kumi in Doulul eo an Kōrā ro kōn unin kōnono ko rekanooj aorōk n̄an Doulul eo an Kōrā ro āinwōt juon doulul ilo Malaysia im ekōjkan an Kabun̄ in maron̄ leļo̧k tōl im im̧we.
Ilo Taiwan, Sister Reeves ar kwalo̧k kōn kajoor im wūjeļepļo̧k eo an membōr ro ijo jokwe ie. “Kōm̧ij lukkuun m̧ōņōņō n̄an jeļā kōn tōm̧ak in mour ko aer im emakijkij in aer pād ilo tampeļ. … Membōr ro rej waanjon̄ak ko rem̧m̧an n̄an ro m̧ōttaer im ro rūturier,” liin ar ba.
Ilo Taiwan, Mary N. Cook im Linda S.Reeves kar ioon routiej ro an eria eo im ritōl ro an priesthood ilo Taiwan im membōr ro.
Pija jen Yang Chieh-wen