Pukōt Lan̄lōn̄ ilo Mour
Karen Rockwood, Idaho, USA
Ilo juon iien iaar riiti juon ennaan an kweilo̧k eo eļap jen Elder Richard G. Scott jen Doulul eo an Jon̄oulruo Rijilōk ro. Men̄e iaar ron̄ im riiti ennaan in m̧okta, juon eoon eaar im̧we eō im pād ilo kōļmenļo̧kjeņ eo aō.
Jejjo awa ko tok ālik ļaddik eo nejū, eo ej jokwe ilo juon apartmen ippān ro m̧ōttan kar lotok. Eaar jerbale juon mijen elikio im ar bōk jejjo semester ko ilo kaļōj. Eaar jab lukkuun jeļā ta eo eaikuj in ekkatak ilo jikuuļ im ta iaļen kōttōpar eo eaikuj in bōke. Kōnke eaar inepata im en̄jake bwe jikuuļ eo, n̄an kiiō, kar joļo̧k waan iien im jāān, eaar bōjrak jān an ekkatak ko an im kar jino jerbal aolep raan.
Eaar jiron̄ eō bwe juon iaan ro m̧ōttan eaar ba bwe ren etal n̄an juon āne ilo Bahamas ak Caribbean, n̄an kapok jerbal, im limo ium̧win jejjo allōn̄ ko. Ļaddik eo nejū ar lukkuun itok limo in kōn ļōmņak eo. Emaron̄ pidodo aō loe wāween an kaitoktok limo juon en̄jake enem̧m̧an n̄an juon likao.
Innām, ennaan eo em̧m̧an an Elder Scott eaar itok n̄an ļōmņak eo aō. Iaar kotak lōn̄tak Ensign im riiti menin n̄an ļaddik eo nejū: “Kwoj pād ioon laļ in kōn juon unleplep eo ekwojarjar. Unin ej ejjab n̄an erom kam̧ōņōņō eo ejjeļo̧k jem̧ļo̧kin ak n̄an ālij ilo likio in jibadbad eo an m̧ōņōņō. Kwoj pād ijin n̄an kajjieon̄, n̄an kwaļo̧k n̄an eok make bwe kwomaron̄ bōk eļapļo̧k kōjeram̧m̧an ko ewōr ippān Anij n̄an eok. Wāween ko rejelet kadikļo̧k kijenmej rej menin aikuj” (“Finding Joy in Life,” Ensign, May 1996, 25).
Ilo an jab ba juon naan, ļaddik eo nejū eaar bōk māākjiin eo, etal, im riiti aolepān kōnono eo. Tokālik men eo eaar ba eaar bwe ej jamin etal limo ioon āne eo ānen.
Ak eaar deļo̧n̄e jikuuļ in police, juon iaļ me eaar tōl e n̄an ioon kōrā eo ippān ilju im jekļaj. Raar m̧are ilo Mesa Arizona Temple im rainin ewōr jilu nejier ajri ro raiboojoj. Ilo 2010 eo ļaddik eo nejū eaar kadedeļo̧k bachelor degree eo an im em̧ool “Pukōt lan̄lōn̄ ilo mour.”
Tūreep in limo eo an ļaddik eo nejū ekar kwaļo̧k ke emaron̄ kar juon en̄jake eo em̧m̧an, ilo jekjek eo juon, emaron̄ in kar juon eo ekauwōtata ilo jetōb. Kajjojo iien ij kōļmenļo̧kjeņ kōn en̄jake in, Jetōb eo ej un̄ūr būruwō.
Ij kam̧oolol kōn nana ko an rikanaan ro im bwe iaar im̧we n̄an keememej juon kōnono eo me eaar jipan̄ eō leļo̧k tōl. Ij lukkuun barāinwōt kam̧oolol kōn ļaddik eo nejū kōn an ron̄jake juon ennaan jen Irooj im kōtļo̧k bwe Jetōb en im̧we e. Ijeļā bwe elōn̄ kōjeram̧m̧an ko im tiriam̧o ej itok n̄e jej ron̄jake im ļoor katak ko an Rilo̧mo̧o̧r im rikarejaran ro An.