Uwaake Kūr eo n̄an Kalōn̄ļo̧k Mijenede ro: Ejaake juon M̧wil an Mijenede ilo M̧weo im ilo Kabun̄ eo
Bisop Victor Nogales an Parque Chacabuco Ward, Buenos Aires Argentina Congreso Stake, ej jijet itum̧aan ilo juon bulletin boot eobrak kōn pija in 37 likao ro im jiron̄ ro ilo ward eo an. Ke juon iaer eaar em̧m̧akūt n̄an juon mijen, ej door juon kakeememej turin pija eo.
“Rūm̧m̧an ded ro aō rej lukkuun in itoklimo n̄e rej itok n̄an opiij eo aō im lo pija ko im kakeememej ko,” eaar ba. “Ej ļujir er n̄an m̧aanjabpopo n̄an mijen ko aer make.”
Ward in ilo Buenos Aires ej waanjon̄ak in jetōb in jerbal in mijenede. Ilo allōn̄ ko jiljino im̧aan an 2012, 19 jodikdik ro—14 iaer raar rioktak ro—kar ilo̧k jān kapijuknen ko aer n̄an jerbale mijen ko aolep raan ilo ralitōk laļ ko. Elōn̄ļo̧k jān 80 bōjāān in jodikdik ro rej maron̄ jerbal kar kallim̧ur n̄an jerbali mijen ko.
Ilo iiō ko m̧o̧ktaļo̧k ritōl ro an Kabun̄ in raar kōm̧m̧ani jet kajjitōk ko bwe en lōn̄ļo̧k jodikdik ro ren jerbali mijen ko.
Ilo Eprōļ 2005 kweilo̧k eo eļap, ālkin wōt an Kabun̄ in kwaļo̧k Preach My Gospel: A Guide to Missionary Service, Elder M. Russell Ballard jen Doulul eo an Jon̄oulruo Rijilōk ro eaar kapilōk baam̧le ko im ritōl ro n̄an ejaake juon jetōb in mijenede im kōpooj elōn̄ļo̧k likao im jiron̄ ro n̄an jerbal ilo utiej kōn jipan̄ er meļeļe wōn er im jān katakin er katak eo (lale “One More,” Liahona, May 2005, 69).
Būreejtōn Thomas S. Monson eaar kwaļo̧k ilo Oktoba 2012 kweilo̧k eo eļap kōn iiō in jerbal in mijenede eo naaj dikļo̧k āinwōt bar kakeememej bwe Irooj ej kōmkaj jerbal in An.
Rainin elōn̄ baam̧le ko im ritōl ro an Kabun̄ in rej lukkuun bōk ennaan kein im ejaake juon iminene an jerbal in mijenede eļap ilo eria ko aer.
Jipan̄ Jodikdik ro Meļeļe Wōn Er
Ilo uwaake kajjitōk in, “Ewi wāween am̧ kar maron̄ kōpooj elōn̄ iaan jodikdik ro am̧ n̄an m̧ōņōņō in jerbal?” Bisop Nogales eaar uwaak, “Ke iaar kūr āinwōt juon bisop, n̄ūrbōktak eo aō jinoin tata eaar kōn rūm̧m̧an ded ro ilo ward eo aō, im iaar kalikar n̄an ritōl ro jet ilo ward eo ke kōmij aikuj in kar erom m̧ōttan mour ko aer.”
N̄an waanjon̄ak, aolep mijenede ro ilo Chacabuco raar kabwijer kūr ko ilo ward eo m̧ae aer em̧m̧akūt. Emakijkij an rioktak ro rekāāl im membōr ro rejaniknik kar kūr n̄an jerbal āinwōt rūkaki, eo eaar jipan̄ kōpooj er n̄an kwaļo̧k ko̧jpeļ eo.
Bisop Nogales eaar barāinwōt karōk n̄an jodikdik ro n̄an m̧aanjabpopo ilo jetōb n̄an juon mijen kōn jerbal ippān mijenede ro rej jerbal aolep raan ijo rej jokwe ie.
Āinwōt ritōl ro an Kabun̄ in ijo jokwe ie im membōr ro em̧ōj aer wūjļepļo̧k er n̄an jodikdik ro an ward eo, kar nōbar er kōn lo jetōb eo an mijenede ej ļap an eddōkļo̧k.
Juon Baam̧le Ewōr Ļōmņak in Mijenede ie
Garth im Eloise Andrus jān Draper, Utah, USA, rejeļā ta meļeļe in n̄an wōr juon baam̧le ewōr ļōmņak in mijenede ie. Ewōr 17 jibwieer ļaddik ro raar jerbale mijen ko, im raar jerbale jiljino mijen ko kōn er make.
Ejaake juon jetōb in jerbal in mijenede ilo baam̧le eo am̧ ej juon men eo me ej ijjino jān tōre eo ajri ro rej iddik, Būratōr Andrus ar ba.
Sister Andrus ar errā. “Kōtmene eo an jerbale juon mijen ej juon men eo me aikuj in kōnono kake, bōtaab kwon kōnono n̄an ajri ro nejūm im jibūm̧ kake āinwōt juon men kwōj kōtmene renaaj jerbal juon mijen—n̄e kwoj etal n̄an mijen eo am̧, ejjab eļan̄n̄e,” liin ar ba.
Katakin jodikdik ro wōn er jen kōm̧m̧ane juon waanjon̄ak an jerbal in mijenede ej barāinwōt aorōk. Būratōr im Sister Andrus raar bōk kūr eo aer jino in tata ilo 1980, ilo an kar ļaddik eo edik tata nejier kar ilo̧k ilo mijen eo an.
Juon jibū ļaddik ar jeje n̄an er ālkin bōk juon menin leļo̧k raar jilkinļo̧k n̄an jipan̄ e kōppopo n̄an mijen eo an. “Eaar kam̧oolol kōm̧ [kōn menin leļo̧k eo], ak ar ba, ‘Men eo eaorōkļo̧k ej n̄an kam̧oolol kom̧ kōn waanjon̄ak eo me kom̧ kar kwaļo̧ke,’” Sister Andrus ar ba.
Kwaļo̧k Katak eo
“Jodikdik ro ad ewōr aer jim̧we n̄an kōtmene bwe ro jineer im jemeer im ritōl ro aer ilo Kabun̄ in im rūkaki ro naaj lale bwe ren jeļā im meļeļe ko̧jpeļ eo an Jisōs Kraist,” Elder Ballard ar ba. “Jetōb Kwojarjar naaj kapen m̧ool eo n̄an būruweer im naaj kabbōl Meram eo an Kraist ilo aer. Innām kom̧ naaj bar juon mijenede eo ekanooj pojak” (M. Russell Ballard, “One More,” 71).
Elōn̄ļo̧k jān 6,000 m̧aiļ ko (9,600 km) rettoļo̧k jān Buenos Aires, rural Horsehoe Bend Branch eo epaake Boise, Idaho, USA, raar barāinwōt lo juon eddōkļo̧k eo ekabwilōn̄lōn̄ kōn jerbal in mijenede āinwōt an baam̧le ko im ritōl ro kapen kōttōpar ko n̄an kwaļo̧k kojpeļ eo n̄an jodikdik ro aer.
Jān juon branch edik uwaan 75 membōr ro, ratimjuon rūm̧m̧an ded rej jerbale mijen ko.
Elder Russell M. Nelson jen Doulul eo an Jon̄oulruo Rijilōk ro eaar āliji un ko kōn im jeram̧m̧an ko an jerbal. “Aolep mijenende ro … rej jerbal kōn juon ikdelel epen rej kōm̧m̧an bwe mour en em̧m̧anļo̧k n̄an armej ro jet,” eaar ba. “Jokālet eo n̄an jerbale juon mijen naaj kareel mejānkajik in jetōb eo an mijenede eo, ļeo ak lio pālele, im ro ineer n̄an epepen ko rej itok. Juon ikdelel n̄an jerbal ej juon piktokin waļo̧k in an juon oktak, erreo, im m̧aanjebpopo” (“Kajjitōk Ippān Mijenede ro! Er Remaron̄ Jipan̄ Eok!” Liaona, Nob. 2012, 18).
Martin Walker, būreejtōn eo an Emmett Idaho Stake, ar errā. “Jerbale juon mijen ej door juon likao ioon juon iaļ me enaaj jelet epepen ko,” ar ba. “Āinwōt juon stake, kōmij kōm̧m̧ane jabdewōt men eo kōm maron̄e n̄an kōpooj jodikdik ro n̄an jerbal in mijenede.”
M̧ōttan kōppopo in ekoba katakin jodikdik ro katak eo. Jodikdik ro ilo Horseshoe Bend Branch eo ewōr aer juon kūlaj in kōppopo n̄an mijenede kajjojo wiik ej katakin jān kar juon mijen būreejtōn—kaminene eo me ej jipan̄ kaminene mijenede eo kar kōm̧m̧ane jān kaminene eo an jodikdik allōn̄ otemjeļo̧k jān stake eo im Aaronic Priesthood Camp eo iiō otemjeļo̧k.
LaRene Adam—juon iaan Brother ro im ajri ro jiljino jibun̄ Sister Andrus—eo eaar jerbal ippān, Jim, ilo Copenhagen Denmark Mission jān 2007 n̄an 2009. Liin ar kam̧ool kōn aorōk eo an katakin ajri ro ko̧jpeļ eo ilo m̧weo.
“Juon iaan men ko reļļap komaron̄ in kōm̧m̧ane n̄an jipan̄ ajri ro nejūm̧ ejaake juon naan in kam̧ool kōn jerbal in mijenede ej n̄an kōm̧m̧an nokon in jota eo an baam̧le eo am im an baam̧le eo ekkatak jeje ko rekwojarjar,” liin ar ba. “Elan̄n̄e kwonaaj leļo̧k n̄an er pedped eo ekajoor an ekkatak ko̧jpeļ eo im jeļāļo̧kjeņ an ko̧jpeļ eo, eļapļok aer kanooj kōppopo im jeļā eļapļo̧k kōn ko̧jpeļ eo.”
Bisop Victor Nogales ar jutak ilo bulletin boot eo me ej kwaļo̧k aolep jodikdik ro ilo ward eo an, ekoba ro rej jerbale mijen ko.
Pija ettā an Paul L. Garvin