Taļboon eo Eaar Kun
Seda Meliksetyan, Armenia
Ilo M̧aaj 1997, ke iaar jokwe ilo Russian city Rostov-on-Don, ļeo ippa im n̄a kar peptaij ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata.
Ke ij ekkatak katak ko an Kabun̄ in, elōn̄ iaan kajjitōk ko aō raar uwaak. Eaar kaitoktok limo n̄an katak kōn karōk in lo̧mo̧o̧r eo, ekoba jerbal in peptaij n̄an ro remej. Iaar bwilōn̄ n̄an jeļā katak bwe kōm̧ maron̄ kar peptaij kōn rūtto ro am raar mej.
Ālkin juon iiō in peptaij eo am, mijen būreejtōn eo eaar karuwaineneik kōm̧ n̄an kōppopo n̄an etal n̄an tampeļ eo. Āinwōt m̧ōttan kōppopo eo am̧, kōm̧ ar jino kōm̧m̧ani menmenbwij im kappok baam̧le. Juon raan ke iaar ļōmņak kōn jerbal in, taļbon eo ar riin̄. Eaar kōrā eo jinen ļeo ippa. Iaar kajjitōk ippān eļan̄n̄e emaron̄ kar jilkintok juon laajrak in rūtto ro raar mej ilo baam̧le eo an ļeo pāleeō. Liin eaar bwilōn̄ im kar jiron̄ eō bwe peptaij kōn ro remej ejjab katak ko an Kraist ak ijjelo̧kin juon men Mormon ro raar kōm̧m̧ane. Iaar jab lukkuun jeļā n̄an uwaak e kōnke iaar jab lukkuun jeļā eoon in jipan̄ ko me rej rie ļo̧k katak eo.
Ke ij ļōmņak kōn wāween aō uwaak, taļboon eo eaar kun. Iaar jab lukkuun jeļā ium̧win juon minit ta eo eaar waļo̧k, bōtaab iaar door laļ ļo̧k taļboon eo im etal n̄an ruum̧ in kiki eo aō. Iaar bōk kallim̧ur Ekāāl ilo pā ko peiū, bukwelōlō n̄an jar, im kar kajjitōk ippān Jemedwōj Ilan̄ n̄an kwaļo̧k n̄an eō ia eo imaron̄ lo uwaak eo.
Ilo jem̧ļo̧kin jar eo aō, iaar kōppeļļo̧k Baibōļ eo. Iaar en̄jake āinwōt n̄e ewōr juon ar jiron̄ eō bwe in riiti eoon 2 ilo ejja peij eo iaar kōppeļļo̧ke. Iaar pād ilo jepta 15 in 1 Korint, eo ej kōnono kōn katak eo kōn peptaij kōn ro remej.
Iaar m̧weiur im kar bwilōn̄ bwe Jemedwōj Ilan̄ eaar uwaake jar eo aō ilo iien eo wōt. Ekar juon en̄jake eo em̧m̧an.
Iaar lukkuun kejōkļo̧kjeņ kōn en̄jake in ke taļboon eo eaar bar riin̄. Eaar kōrā eo jinen ļeo ippa, ar kajjitōkin eō etke taļboon eo eaar kun. Iaar ba ijjab jeļā bōtaab iaar kajjitōk bwe en kōppeļļo̧k Baibōļ eo an im riiti 1 Korint 15:29.
Jet raan tokālik juon laajrak in ro remej nukun raar pād ioon tebōļ eo aō. Kōrā eo jinen ļeo pāleeō eaar riiti eoon eo im kiiō tōmak bwe Rilo̧mo̧o̧r eo, kōn Rijilōk Paul, kar katakin katak eo an peptaij kōn ro remej.
Anij eaar kallim̧ur kōn kōjeram̧m̧an ko reļļap n̄an ro rej kōm̧m̧ane jerbal in lo̧mo̧o̧r in. Ijeļā menin em̧ool.