2013
Bujen ko an Tampeļ
Eprōļ 2013

Naan in Katak an Kōrā

Bujen ko an Tampeļ

Lukkuun ekkatak katak in im, n̄e ekkar, kōnono kake ippān kōrā ro jeim ak jatim kwoj loļo̧k. Kōjerbal kajjitōk ko n̄an jipan̄ eok kōkkajoorļo̧k kōrā ro jeim im jatim, im n̄an kōm̧m̧an bwe Doulul eo an Kōrā en m̧ōttan eo emourur an mour eo am make. N̄an meļeļe ko reļļapļo̧k, etal n̄an reliefsociety.lds.org.

Jiiļ eo an Doulul eo an Kōrā

Tōmak, Baam̧le, Deeor

“Kain̄i in lo̧mo̧o̧r ko būki ilowaan tampeļ eo ej kōtļo̧k ad juon raan jepļaak n̄an Jemedwōj Ilan̄ ilo juon jem̧jerā an baam̧le indeeo im n̄an maron̄ bōk menin letok kwojarjar eo ippān kōjeram̧m̧an ko im kajoor jān ijo eutiej tata rej aorōk in aolep kaarmejete im kijejeto,”1 Būreejtōn Thomas S. Monson eaar ba. Eļan̄n̄e kwoj jan̄in pād ilo tampeļ eo, kwomaron̄ in kōppopo n̄an bōk kain̄i ko an tampeļ ko rekwojarjar jen:

  • Tōmak ilo Jemedwōj Ilan̄, Jisōs Kraist, im Jetōb Kwojarjar.

  • Kaddōkļo̧k juon naan in kam̧ool kōn Pinmuur eo an Jisōs Kraist im jepļaaktok eo an ko̧jpeļ eo.

  • Rejtake im ļoor rikanaan eo emour.

  • Karbab n̄an juon peba in mālim an tampeļ jen kōļļā juon m̧ōttan jon̄oul, mour erreo, m̧ool, kōjparok Naan in Māletlet, im mour inem̧m̧an ippān katak ko an Kabun̄ in.

  • Leļo̧k iien, tōļan, im jipan̄ ko n̄an jipan̄ kalōk aelōn̄ in kiin̄ eo an Irooj.

  • Bōk kuņaad ilo jerbal in menmenbwij an baam̧le.2

Būreejtōn Monson eaar katakin, “Ilo ad keememej bujen ko jaar kōm̧m̧ani ilowaan [tampeļ eo], naaj ļapļo̧k ad maron̄ kijoone aolep mālijjon̄ im n̄an eļļā ioer kajjojo.”3

Jān Jeje ko Rekwojarjar

Doctrine and Covenants 14:7; 25:13; 109:22

Jān Bwebwenato eo Ad

“Elōn̄ ļo̧k jān 5,000 Rikwojarjar ro raar kuktok ippān doon ilo Nauvoo Temple ālkin kōjeram̧m̧an eo an. …

“Maron̄ eo, kajoor eo, im kōjeram̧m̧an ko an bujen ko an tampeļ [raar kemour] Armej ro Rekwojarjar ilo Raan-ko Āliktata iien em̧m̧akūt eo aer n̄an [turōk], ke raar [en̄taan] kōn m̧ōļo, bwil, kwōle, jeramōl, nan̄inmej, akjitōn ko, im mej.”4

Āinļo̧k wōt elōn̄ sister ro ilo Doulul eo an Kōrā, Sarah Rich eaar jerbal āinwōt juon rijerbal an tampeļ. Eaar kōnono kōn en̄jake eo an: “Eļan̄n̄e en kar jab tōmak im jeļāļo̧kjeņ eo eaar itok iood ilo tampeļ eo jen … Jetōb an Irooj, ial eo ad enaaj kar āinwōt juon eo ej bōk jerbal eo im ejjab jeļā wāween an kōtōprake. … Ak eaar wōr ad tōmak ilo Jemedwōj Ilan̄, … en̄jake bwe jaar armej ro kāleti … , im ijjelo̧kin būrom̧ōj, kōm̧ ar en̄jake lan̄lōn̄ raan eo kōn waļo̧k eo eaar itok.”5

Diwōjļo̧k eo eaar jab juon jerbal eo im ejjab jeļā wāween an kōtōprake n̄an kōrā ro Rekwojarjar ilo Raan-ko Āliktata retiljek. Raar rejtak jen bujen ko an tampeļ ko aer.

Kakeememej ko

  1. Thomas S. Monson, “Tameļ eo Ekwojarjar—Juon Meram n̄an Laļ in,” Kweilo̧k eo Eļap, Eprōļ 2011, 51.

  2. Lale Daughters in My Kingdom: The History and Work of Relief Society (2011), 21.

  3. Thomas S. Monson, Liahona, May 2011, 93.

  4. Daughters in My Kingdom, 29–30.

  5. Sarah Rich, ilo Daughters in My Kingdom, 30.

Jem̧ļo̧kin Parley Street, jen Glen S. Hopkinson, jab maron̄ kapeik