Ia eo Imaron̄ Bōke juon Māākjiin Āinwōt in?
Sharon Rather, Nevada, USA
Ilo juon aō kar tūreep ippān baam̧le eo aō jān Nevada, USA, n̄an Alaska, USA, iaar jino juon bwebwenato ippān juon kōrā eaitok, toojļo̧k, ejouj iturājet in jikin etetal eo.
Liin eaar kajjitōk ippa ia eo ij ilo̧k n̄an e, im iaar jiron̄ e kōm̧ij etal n̄an Juneau, Alaska, n̄an loļo̧k ļaddik eo nejūm̧ im baam̧le eo an. Liin eaar ba n̄an eō ej jān Las Vegas. Innām, ej jino peļļo̧k, liin eaar ba bwe ej etal n̄an Juneau n̄an loļo̧k ro jinen im jemān ļeo pāleen n̄an kōm̧m̧ane juon jerbal in ememļo̧kjeņ kōn ļeo pāleen, eo eaar m̧areki ium̧win 20 iiō ko. Ej kab m̧ōj an mejļo̧k jān kānjer.
Iaar kalimjōk jikin etetal eo im kar ļōmņak ippa make ewi jon̄an aō kar jeram̧m̧an bwe ijeļā kōn karōk in lo̧mo̧or eo im juon rijerbal an tampeļ eo ilo Las Vegas Nevada Temple. Iaar ļōmņak ta eo imaron̄ kōm̧m̧ane n̄an kōrā in n̄an jipan̄ kainōm̧m̧an e.
Ilo jab kōtmene, āinwōt an lukkuun alikkar, iaar keememej juon kout jen Būreejtōn Joseph Smith iaar ajije ilo Doulul eo an Kōrā. Ke eaar ejake Doulul eo an Kōrā, eaar lo bwe sister ro “renaaj ekairir in leļo̧k jipan̄ n̄an eo eruwaimejet; ro renaaj likūt weil im wain n̄an bōro rerub an ro rej inepata; renaaj kōmōrāik dānin kōm̧jaļļal an ratamjinemjen im kōm̧m̧an bwe būruwōn eo emej pāleen en m̧ōņōņō” (Teachings of Presidents of the Church: Joseph Smith [2007], 452).
Iaar kalimjōk jikin etetal eo bar juon alen. Iaar lo juon ruwaimejet einepata, juon kōrā emej ļeo pāleen erub būruwōn. Ij keememej bwe iaar riiti Juļae 2011 Ensign raan eo m̧oktaļo̧k. Epād ie jet naan in rōjan̄ ko iaar ļōmņak in leļo̧k n̄an liin jet naan in rōjan̄ im kaenōm̧m̧an.
Iaar kobaik aolep aō peran, kōppeļļo̧k māākjiin eo n̄an bwebwenato eo, im ba bwe en riit. Iaar kalimōj ļo̧k wōt e im kar bwilōn̄ bwe eaar riiti aolep kajjojo ļain—ilo kōņaan. Ke eaar dedeļo̧k, liin ar bar riiti bar juon bwebwenato.
Juon men em̧ool eaar ūn̄ūr būruwōn kōrā eo. Liin ar bo̧kwōj mākjiin eo ilo ubōn im irļo̧k dān in kōmejaļaal jān mejān.
“Ia eo Imaron̄ Bōk juon Māākjiin Āinwōt in?” Liin eaar kajjitōk ippa. Iaar ba n̄an e emaron̄ bōke wōt. Innām liin eaar riiti bar jidik.
Ke kōm̧ij tōkeakļo̧k ilo Juneau, lio eaar jibwe peiū, kalimjōk tok meja, im ba, “Kom̧ool.”
Iaar katak juon katak eaorōk jān en̄jake jab in. Jej jepo̧o̧l kōn ruwaimejet ro kōn bōro ko rekinejnej ro raikuj naan in rōjan̄ im ro raikuj n̄an jeļā ta eo kōj Armej ro Rekwojarjar ilo Raan-ko Āliktata rejeļā.