Stap Dring long Wel

I Kam long Aron L. Wes

Edita, Jos Printing Seves

Jisas Kraes i wel blong wota we i givim laef.

Taem yumi tokbaot ol samting we i naes long ol tempol, yumi tokbaot ol sap poen antap long tempol, ol windo, mo ol peinting. Yumi tokbaot wetem fasin blong stap revren ol ples blong baptaes, ol rum blong endaomen, mo ol selestial rum.

Be taem wan profet i dediketem wan tempol i go long Lod, hem i dediketem ful bilding ia, i no pat nomo we i naes we ol man i luksave. Long prea blong dedikesen blong Kansas Siti Misuri Tempol, Presiden Tomas S. Monson i bin talem: “Yumi dediketem graon ia we tempol i stanap long hem. Yumi dediketem evri pat blong naesfala bilding ia, stat long faondesen blong bilding we mifala i no save luk i go kasem bigfala statu blong Moronae we i stap long en blong sap poen.”¹ Taem Presiden Josef Filding Smit i bin givimaot dedikesen prea long Ogden Yuta Tempol, hem i bin dediketem “ol fandesen, ol wol, ol floa, ol siling, taoa antap, mo ol nara pat blong bilding ia,” mo hem i bin prea from proteksen blong “evri samting we i mekem bilding i wok olsem ol laet mo ol fenija, ol fan sistem mo ileveta, mo evri samting we i stap insaed long bilding ia.”²

Mi talem tangkyu we Lod i givim inspiresen long ol profet blong Hem blong dediketem evri pat blong evri tempol. Nomata sapos hem i wan inj blong doa o wan smol fenija we i no impoten olsem wan olta long wan siling rum, ol smol pis samting ia i mekem tempol i save kasem stamba tingting blong hem we i blong mekem yumi save kam olsem wan god.

Wan long ol pis we i no impoten ia, i bin helpem mi blong lanem wan lesen we bae i stap wetem mi oltaem. Mi bin stap long Sol Lek Tempol wan dei, mi rere blong aot long rum blong jenis afta we mi bin mekem wan odinens blong wan we i ded finis. Mi luk wan ples blong dring wota, mo mi luksave se mi tosta, mekem se mi bendaon blong dring kwik. Wan mesej i kam long maen blong mi:

Yu dring wota ia long tempol, be yu bin dring gud long wota blong laef we i stap long ples ia?

Hem i no wan kwestin blong mekem mi harem nogud o spolem mi—be wan kwaet fasin blong tok strong long mi mo wan kwestin we i kasem gud sol blong mi.

Ansa blong mi long kwestin ia i bin, no. Mi no bin dring gud wota blong laef we i stap long tempol. Mi mas talem tru se maen blong mi i bin go aot smol taem mi stap mekem ol odinens blong ol dedman. Nomata mi bin mekem gud wok blong ol pipol we oli nidim help blong mi, mi no bin letem miwan blong kasem evri help we mi nidim.

Naoia, evri taem we mi go long tempol, mi lukaotem wan ples blong dring wota mo stop blong mi mas dring wota. Mi askem miwan se mi dring wota ia blong laef i dip olsem wanem. Ansa blong mi: I no dip inaf yet. Be tosta blong mi i stap kam bigwan moa.