M̧ae iien Jenaaj Bar Ioon Doon
Idaak jān To̧o̧r eo
Jisōs Kraist ej unin dān in mour.
N̄e jej kōnono kōn aiboojoj eo an tampeļ ko, ekkā ad kōnono kōn ekkan̄ ko ilōn̄, wuntō ko, im pija killep ko idipin. Jej kōnono ilo kauteij kōn jikin peptaij ko, ruum̧ in bōk menin letok kwojarjar ko, ruum̧ im liāp ko, im ruum̧ ko an aiboojoj eo eutiej tata.
Bōtaab n̄e juon rikanaan ej aje juon tampeļ n̄an Irooj, ej ajeļo̧k aolepān m̧weo, jab m̧ōttan ko wōt raiboojoj me aolep rej kili. Ilo jar in aje eo n̄an Kansas City Missouri Tampeļ eo, Būreejtōn Thomas S. Monson eaar ba: “Kōmij aje bwidej in me tampeļ in ej jutak ie. Kōmij aje aolep m̧ōttan ko an m̧win eaiboojoj, jān pedped eo jab loe n̄an annan̄ eo ekabwilōn̄lōn̄ an Moronai eo ej pād ilo m̧ōttan eo eutiej tata.”1 Ke Būreejtōn Joseph Fielding Smith eaar kwaļo̧k jar in aje eo n̄an Ogden Utah Tampeļ eo, eaar aje “pedped ko, depdep ko, būļoor ko, bōro̧o̧j ko, tawōr eo, im aolepān m̧ōttan ko an m̧weo,” im eaar jar kōn kōjparok an “ aolep m̧ōttan ko kōjerbal jarom, tōma im paip ko kōm̧m̧ani, jejtōm in kadelo̧ņ im kadiwōj kotō im erpeta ko, im aolep men ko rej ekkeijel n̄an m̧win.”2
N̄aij m̧ōņōņō bwe Irooj eaar im̧we rikanaan ro An n̄an aje aolep m̧ōttan ko an aolep tampeļ. Men̄e juon injej in kōjām ak juon jikin tōm̧a ealikkar eaar juon un edikļo̧k jān juon lokatok ilo juon ruum̧ in liāp, m̧ōttan kein reddikļo̧k rej jipan̄ jibadbad eo an tampeļ eo, jibadbad eo an mour āinwōt Anij.
Juon iaan m̧ōttan kein reddik eaar jipan̄ eō katak juon katak eaitok kitien. Ikar pād ilo Salt Lake Tampeļ eo juon raan, kōppopo n̄an etal n̄an ruum̧ in kanuknuk eo ālkin bōk kuņaō ilo juon kain̄i n̄an rimej. Kūleļo̧k juon kein idaak, Iaar kūle bwe Iaar maro, kōn menin eaar m̧ōkaj aō m̧al laļ ļo̧k n̄an idaak. Juon ennaan eaar itok n̄an kōlmenļo̧kjeņ eo aō:
Kwoj idaak dān in ilo tampeļ, bōtaab kwoj lukkuun ke idaak dān in mour eo me epād ijin?
Ekar jab juon liaakļo̧k—baj juon kajjitōk emeļak im eim̧we juon jetōb.
Uwaak eo aō n̄an kajjitōk eo ekar jaab. Iaar jab lukkuun idaak dān in mour eo an tampeļ eo. Iaar aikuj kwaļo̧k bwe kōlmenļo̧kjeņ eo aō ekar jebwabwe minit ko im̧aan ilo Aō kar bōk kain̄i ko n̄an ro remej. Men̄e Iaar kōm̧m̧ane juon jerbal em̧m̧an n̄an armej ro raar aikuji jipan̄ eo aō, Iaar jab kōtļo̧k eō make n̄an bōk aolep jipan̄ ko iaar aikuji.
Kiiō, aolep iien Ij etal n̄an tampeļ, Ij pukōt juon kein idaak im bōjrak n̄an daak. Iaar kajjitōkin eō make ewi jon̄an m̧wilaļ in Aō idaak jān unin dān in mour eo. Uwaak eo aō: Ej jabwe wōt an m̧wilaļ. Bōtaab aō maro ej ļapļo̧k.
Pija © iStockphoto.com/Amphotora