Fas Presidensi Mesej
Hem I Girap Bakegen long Ded
Wan testemoni abaot trutok ia blong Laef Bakegen long Ded blong Jisas Kraes i wan stamba blong, tugeta, hop mo strong tingting. Mo i save olsem wetem evri pikinini blong God. Hem i bin olsem long mi long wan dei blong sama long Jun 1969 taem we mama blong mi i bin ded, mo i bin olsem long mi blong plante yia, mo bae i olsem kasem we mi save luk hem bakegen.
Fasin blong stap hapi i riplesem sore we yumi harem from smol taem we i seperetem yumi long olgeta we oli ded. Hem i moa long wan hop blong wan hapi kam tugeta. From se Lod i bin soemaot mo talemaot plante samting tru ol profet blong Hem, mo from Tabu Spirit i bin konfemem trutok blong Laef Bakegen long Ded long mi, mi save luk long maen blong mi se bae i olsem wanem blong kam tugeta wetem olgeta we yumi lavem we oli bin laef bakegen long ded mo oli kam tabu:
Olgeta ia, oli olgeta we bambae oli girap long laef bakegen long ded blong ol stret man. …
Olgeta ia, oli olgeta we nem blong olgeta, oli raetem long heven, ples we God mo Kraes oli jaj blong evri man.
Olgeta ia, oli olgeta we oli ol stret man we oli kam stret gud evriwan tru long Jisas, we i man blong toktok from niu kavenan, we i tekem i kam atonmen ia we i stret gud evriwan tru long blad blong hem we i ron (Luk long D&C 76:65, 68–69).
From se Jisas Kraes i bin brekem ol rop blong ded, evri pikinini blong Papa long Heven we i bon i kam long wol bae oli girap bakegen long ded insaed long wan bodi we bae i neva save ded. So testemoni blong mi mo yu abaot trutok ia we i gat glori i save karemaot sting blong ol famle memba o fren blong yumi we yumi lavem we oli ded finis wetem wan bigfala glad mo wan strong tingting.
Lod i bin givim long yumi evriwan presen blong laef bakegen long ded, long taem we ol spirit blong yumi i joen bakegen wetem ol bodi we oli klin aot long evri samting we i no stret (luk long Alma 11:42–44). Mama blong mi bae i kam yang mo naes, ol taem blong olfala mo ol yia blong ol harem nogud bae i nomo gat. Hemia bae i kam long hem mo long yumi olsem wan presen.
Be olgeta long yumi we oli wantem stap wetem hem blong oltaem, oli mas mekem ol joes blong kwalifae from rilesensip ia, blong stap long ples we Papa mo Pikinini blong Hem we Hem i lavem tumas mo i laef bakegen long ded, tufala i stap long hem long glori. Hemia i wan ples ia nomo we famle laef i save gohed blong taem we i no save finis. Wan testemoni blong trutok ia i mekem strong tingting blong mi i kam antap blong mi mas kwalifae mo olgeta we mi lavem oli mas kwalifae blong kasem hae digri blong selestial kingdom tru long Atonmen blong Jisas Kraes we i stap wok long laef blong yumi (luk long D&C 76:70).
Lod i givim long yumi wan gaed long rod ia blong lukaotem laef we i no save finis tru long ol sakramen prea we i helpem mi mo i save helpem yu. Oli invaetem yumi blong riniu ol kavenan blong yumi blong baptaes long evri sakramen miting.
Yumi promes blong oltaem tingbaot Sevya. Ol simbol blong sakrifaes blong Hem i helpem yumi blong talem tangkyu from hae praes we Hem i bin pem blong brekem ol rop blong ded, blong givim yumi sore, mo givim fogivnes from evri sin blong yumi sapos yumi jusum blong sakem sin.
Yumi promes blong kipim ol komanmen blong Hem. Taem yumi ridim ol skripja mo ol toktok blong ol profet we oli stap laef tedei mo stap lisin long ol spika we oli kasem insperesen long ol sakramen miting blong yumi, i mekem yumi tingbaot bakegen long ol kavenan blong mekem olsem. Tabu Spirit i tekem i kam long ol maen mo hat blong yumi ol komanmen we yumi nidim moa blong kipim long dei ia.
Insaed long ol prea blong sakramen, God i promes blong sendem Tabu Spirit blong i stap wetem yumi (luk long Moronae 4:3, 5:2; D&C 20:77, 79). Mi bin faenem long taem ia se God i save givim long mi wanem we i olsem wan intaviu blong miwan. Hem i mekem mi save wanem nao mi bin mekem we Hem i laekem, nid blong mi blong sakem sin mo fasin blong fogiv, mo ol nem mo ol fes blong pipol we Hem i gat blong mi givim seves long olgeta long bihaf blong Hem.
Truaot ol yia, eksperiens ia, we i bin ripit, i tanem hop i kam long ol filing blong jariti mo i givim wan filing blong mi save stret se sore i stap oltaem blong mi tru long Atonmen mo Laef Bakegen long ded blong Sevya.
Mi testifae se Jisas i Kraes ia we i bin girap bakegen, Sevya blong yumi, mo eksampol blong yumi we i stret evriwan mo gaed blong go long laef we i no save finis.
Yusum Mesej Ia blong Tij
Yumi mas yusum evri skripja long laef blong yumi, blong hem i save stap blong helpem mo lanem yumi (1 Nifae 19:23). Gat tingting ia blong ridim ol sakramen prea, we oli stap long Doctrine and Covenants 20:76–79. Afta ridim ol tijing blong Presiden Aering abaot ol sakramen prea, ating bae yu wantem blong invaetem olgeta we yu stap tijim blong tingbaot ol wei we ol prea ia i save givhan long ol laef blong olgeta mo helpem olgeta blong gobak blong stap bakegen wetem Papa long Heven mo Jisas Kraes.
Foto i kam long Matiu Raea; Hem I Girap Bakegen long Ded,} i kam long Del Pason, we yu no save kopi