Ennaan eo an Būreejtōnji eo Kein Kajuon
E Em̧ōj an Jerkak
Juon naan in kam̧ool em̧ool kōn Jerkakpeje eo an Jisōs Kraist ej juon jipan̄ jim̧or ilo kōjatdikdik im kōttōpar. Emaron̄ in āindein barāinwōt n̄an jabdewōt ajri ro nejin Anij. Ekar āinwōt n̄a ilo juon raan in jōm̧ar ilo Juun 1969 ke jinō eaar mej, eaar āindein ilo aolepān iiō kein, im enaaj āindein m̧ae ij loe e bar juon alen.
Lukkuun būrom̧ōj jān jepelļo̧k in ekadu eaar m̧ōkaj bōk jikin kōn lem̧ōņōņō. Eaar ļapļo̧k jān juon kōjatdikdik n̄an juon koba ippān doon eo elem̧ōņōņō. Kōnke Irooj eaar kwaļo̧k tok eļap jen rikanaan ro An im kōnke Jetōb Kwojarjar eo eaar kapen m̧ool eo an Jerkakpeje eo n̄an n̄a, imaron̄ loe ilo ļōmņak eo aō elmen n̄an maron̄ bar koba ippān doon ippān jitōn bōro ro ad rekwojarjar im rejerkakpeje:
Rein rej ro renaaj wōnm̧aantak ilo jerkakpeje eo. …
Rein rej ro āt ko āter raar jeje ilan̄, ijo Anij im Kraist rej ri ekajet an aolep.
Rein rej armej ro raar wāppen jen Jisōs rijojomar eo an kien eo ekāāl, ro raar karreo jen pinmuur eo jen kōtto̧o̧rļo̧k bōtōktōk eo an make (lale D&C 76:65, 68–69).
Kōnke Jisōs Kraist eaar kōtļo̧k to ko an mej, aolep ajri ro nejin Jemedwōj Ilan̄ kar ļotak tok ilo laļ in naaj jerkakpeje ilo juon ānbwin eo ej jamin naaj mej. Kōn menin naan in kam̧ool eo aō im ko ami kōn m̧ool in eaiboojoj maron̄ bōkļo̧k metak eo kōn jako an juon membōr ejitōn bōro an baam̧le eo ak m̧ōttad im ņajikin kōn lan̄lōn̄ eo kōtmene im lōke eo epen.
Irooj eaar letok n̄an kōj aolep menin letok eo an jerkakpeje, bwe jetōb ko ad ren pād ilo ānbwin ko remaron̄ deeor jān wabanban in kanniōk (lale Alma 11:42–44). Jinō enaaj waļo̧k tok em̧m̧an ded im meram, jekjek ko rejelet dettan im iiō in an ānbwin en̄taan naaj jako. Menin enaaj itok n̄an e im n̄an kōj āinwōt juon menin letok.
Ak kōj aolep ro raar to aer kōņaan in pād ippān n̄an indeeo aikuj kōm̧m̧ani kālet ko n̄an maron̄ karbab n̄an iaio in, n̄an mour ijo Jemād im Nejin Jitōn Bōro Nejin M̧aan eo eaar jerkakpeje rej pād ilo aiboojoj. En̄in ej jikin eo wōt ijo mour an baam̧le maron̄ in wōnm̧aanļo̧k ie n̄an indeeo. Juon naan in kam̧ool kōn m̧ool eo emōj an kōļapļo̧k jibadbad in aō n̄an kōkarbab n̄a make im ro otemjej ij iakwe n̄an jikin eo ilōn̄ tata an laļ eo an celestial jen Pinmuur eo an Jisōs Kraist eo ej jerbal ilo mour ko ad (lale D&C 76:70).
Irooj ej letok n̄an kōj juon tōl ilo ial in n̄an mour indeeo ilo jar in kwojkwoj ko rej jipan̄ eō im maron̄ jipan̄ eok. Kar karuwaineneik kōj n̄an kōkāāl bujen peptaij ko ad ilo aolep kweilo̧k in kwojkwoj ko.
Jej kalim̧m̧ur n̄an aolep iien keememej Rilo̧mo̧o̧r eo. Kōkkaļļe ko an katok eo An rej jipan̄ kōj kam̧oolol kōn ļap in en̄taan eo An n̄an kōtļo̧k to ko an mej, n̄an letok n̄an kōj tiriam̧o, im n̄an letok jeorļo̧k bōd n̄an aolep jerawiwi ko ad eļan̄n̄e jaar kālet n̄an ukweļo̧k.
Jej kallim̧ur n̄an kōjparok kien ko An. Riiti jeje ko rekwojarjar im naan ko an rikanaan ro remour im ron̄jake rikōnono ro reim̧we ilo kweilo̧k in kwojkwoj ko ad ej kakeememej kōj kōn bujen ko ad n̄an kōjparoki barāinwōt. Jetōb Kwojarjar eo ej letok n̄an kōļmenļo̧kjeņ ko ad im bōro ko ad kien ko remenin aikuj n̄an ad kōjparoki raan eo.
Ilo jar in kwojkwoj eo, Anij ej kallim̧ur n̄an jilikintok Jetōb Kwojarjar eo n̄an pād ippād (lale Moronai 4:3; 5:2; D&C 20:77, 79). Iaar loe ilo iien in bwe Anij emaron̄ letok n̄an eō ta eo ij en̄jake āinwōt juon iien intōrpiu an juon make. Ej letok bwe in kile ta eo iaar kōm̧m̧ane eo ej kam̧ōņōņōik E, aikuj eo aō n̄an ukweļo̧k im jeorļo̧k bōd, im āt ko im mejān armej ro Ekōņaan bwe in jipan̄ er n̄an E.
Ium̧win iiō ko, en̄jake in ālij eaar ukōt kōjatdikdik n̄an en̄jake in iakwe em̧ool im bōktok juon kam̧ool bwe tiriam̧o eaar kōppeļļo̧k n̄an eō jen Pinmuur eo an Rilo̧mo̧o̧r eo im Jerkakpeje eo.
Ij kam̧ool bwe Jisōs ej Kraist eo eaar jerkakpeje, ad Rilo̧mo̧or, im ad waanjon̄ok ewāppen im ej tōlļo̧k n̄an mour indeeo.
Katakin jān Ennaan In
Jej aikuj “karōki tok aolep jeje ko n̄an kōm, bwe en n̄an am maron̄ jerammōn im jeļā” (1 Nipai 19:23). Ļōmņak in riiti jar in kwojkwoj eo, loe ilo Doctrine and Covenants 20:76–79. Ālkin riiti katak ko jen Būreejtōn Eyring kōn jar in kwojkwoj eo, kwomaron̄ in kōņaan in karuwainene ro otemjej kwoj katakin n̄an ļōmņak kōn wāween ko me jar kein remaron̄ in tōl mour ko aer im jipan̄ er jepļaaktok bar juon alen ippān Jemedwōj Ilan̄ im Jisōs Kraist.
Pija jen Matthew Reier; E Emōj An Jerkak, jen Del Parson, jab maron̄ kapeiki