Stap Helpem Ol Pikinini blong Rere blong Kasem Baptaes
Man, taem blong laef blong hem taem hem i pikinini yet, i wan taem blong stap glad taem hem i fas taem blong hem blong kasem samting. Fas taem we i ron long basket, go long skul, o traem wan niufala kaekae; olgeta samting ia oli sam long ol taem we i mekem laef blong wan pikinini i jenis. Olsem ol adalt, yumi gat janis blong helpem ol pikinini blong folem rod blong mitim ol jenis. Olsem ol adalt insaed long Jos, yumi gat janis tu blong helpem olgeta blong gro insaed long gospel (luk long D&C 68:25). Wanem nao yumi save mekem blong mekemsua se baptaes blong wan pikinini—fas kavenan we wan man i mekem wetem Papa blong yumi long Heven we i lavem yumi—i wan naes taem we i gat bigfala mining?
“Hem i stamba tingting blong Jos ia blong tijim ol yut: faswan long hom mo afta long jos,” Presiden Boed K. Peka i bin tijim.1
Long ol eksampol we oli stap ia, ol papa mo mama oli serem olsem wanem oli bin rere long ol pikinini blong olgeta from ol tabu odinens mo kavenan blong kasem baptaes mo konfemesen.
Mifala I Stat Eli
“Long yia we wanwan pikinini i kasem seven yia i wan taem blong selebret,” Lori i talem, wan mama we I gat fo pikinini. Hem wetem hasban blong hem i tijim ol pikinini blong tufala abaot baptaes stat long dei we oli bon. Be, taem wanwan pikinini i kasem seven yia, famle blong olgeta i statem wan program we i moa spesel. Oli gat wan famle haos naet lesen evri manis abaot ol defren topik we i abaot baptaes, olsem ol kavenan mo eksampol blong Jisas.
Lori i talem se ol lesen long manis we ol pikinini i kasem eit yia betdei blong olgeta i moa spesel. Hem i soem ol pikinini ol klos we oli bin werem taem oli bin kasem wan nem mo wan blesing, mo hem i tokbaot dei we odinens ia i bin tekem ples.
“Hem i taem we i stret gud blong lukluk long ol blesing blong tempol kavenan,” Lori i talem. “Oltaem mifala i mekem wan poen blong tijim se joes blong kasem baptaes, hem i fas step blong stap rere from ol blesing blong tempol.”
Mifala I Mekem I Kam Wan Famle Bisnis
Monika, wan mama we i gat fo pikinini, i talem se i gud blong yusum ol pikinini we oli moa olfala blong oli gat pat, sapos i posibol, blong oli helpem ol yangfala brata mo sista blong rere. “Taem oli stap harem ol yangfala brata mo sista oli testifae mo serem eksperiens blong olgeta, i rili givim paoa,” hem i talem. Lori i talem bakegen se samtaem oli askem ol pikinini we oli rere blong baptaes blong tijim wanem we oli bin lanem long ol yang brata mo sista blong olgeta.
Mifala I Yusum Hemia Olsem Wan Misinari Tul
Taem gel blong Daniel i kasem eit yia, hem i bin save se bae gel blong hem i wantem serem dei ia blong baptaes blong hem wetem ol fren we oli no memba blong Jos. Mekem se famle blong olgeta i bin agri blong givimaot ol invitesen blong baptaes blong Alison long ol fren blong skul mo raon long ples we oli stap long hem. Oli bin askem ol fren ia blong karem i kam long taem blong baptaes ol ves long Baebol we oli laekem. Afta long baptaes, Alison i makem ol ves long niufala skripja blong hem mo raetem nem blong ol fren blong hem long saed blong ves ia.
“I tru, olsem famle blong hem, mifala i bin tekpat long dei ia. Be mifala i bin lego hem tu i stap nomo wetem ol fren smol taem afta i talem long olgeta olsem wanem hem i filim,” Daniel i talem. “I bin wan spesel taem blong luk pikinini blong mifala i stap soem wan eksampol.”
Mifala I Praktisim Intaviu blong Bisop
Kimbeli, wan mama blong ol pikinini we i stap kam long yia blong kasem baptaes, i tingbaot taem hem i wokbaot i go long ofis blong bisop blong kasem intaviu blong baptaes taem hem i bin gat eit yia. “Mi bin fraet!” Kimbeli i talem.
Naoia hem i traem blong mekemsua se ol pikinini blong hem oli no fesem ol filing ia blong fraet. Hem mo hasban blong hem i bin toktok long ol pikinini blong tufala abaot intaviu blong bisop mo askem olgeta ol kwestin abaot baptaes long wan wei olsem we oli stap gat tru intaviu. Ol intaviu ia i mekem moa bitim we blong mekem ol pikinini i save gud wetem ol wei blong intaviu—oli leftemap tingting blong ol pikinini blong tingting hevi long wanem kavenan blong baptaes i minim long olgeta.
Mifala I Gat Wan Gudfala Janis
Ol papa mo mama ia, oli kwik blong poenemaot se oli no bin mekem eni samting we i tumas blong rere ol pikinini blong olgeta blong kasem baptaes mo konfemesen, be plante long olgeta i bin yusum ol toktok olsem “wetem kea” mo “i semmak oltaem” blong tokbaot ol lesen we oli bin tijim truaot ol yia. “Mifala i mekemsua ol pikinini blong mifala oli bin andastanem se hemia i bin wan impoten step long ol laef blong olgeta, mo i wan impoten samting,” Kimbeli i talem. “Mifala i bin mekemsua se mifala nao i bin rere long olgeta, mo no stap hop se ol Praemeri tija i bin stap tijim olgeta.”
Hem i wan gudfala janis we mifala i bin kasem blong helpem mekem ol pikinini we mifala i lavem oli rere blong kasem baptaes mo konfemesen! Taem bae mifala i mekem wetem prea, Lod bae i stap wetem mifala blong mekem gud ol fas eksperiens ia blong mekem kavenan i kam wan strong fandesen blong save gro gud long saed blong spirit long fiuja.
Foto Pikja we i kam long Jon Luk, Kreg Daemon, mo Kodi Bel