Meļeļe kōn Peptaij

Jen Marissa Widdison

Māākjiin ko an Kabun̄

Wōn eo enaaj peptaiji eō?

Jabdewōt eo ej peptaiji eok eaikuj in kabwijer priesthood eo—kajoor eo n̄an jerbal ilo etan Anij. Ke Jisōs eaar kōņaan peptaij, Eaar etal n̄an ippān Jon Ripeptaij eo eaar kabwijer priesthood eo (lale Matu 3:13).

Armej eo me enaaj peptaiji eok naaj bōk mālim jān bisop eo ak branch būreejtōn eo.

Ij ke aikuj tūlo̧k ium̧win dān jān peptaij?

Jisōs ar peptaij kōn tūlo̧k ium̧win dān, ej meļeļein bwe E ar tulo̧k ium̧win dān im m̧ōkaj an ato (lale Matu 3:16). En̄in ej wāween eo kwonaaj peptaij. Peptaij ilo wāween in ej kakeememej kōj bwe jej likūt mour eo ad m̧okta im jino juon mour in wūlepļo̧k eo ekāāl n̄an jerbal n̄an Anij im ajri ro Nejin.

Ta kallim̧ur ko Ij kōm̧m̧ani n̄e Ij peptaij?

N̄e kwoj peptaij, kwoj kōm̧m̧ane juon bujen, ak ruo wāween kallim̧ur, ippān Jemedwōj Ilan̄. Kwoj kallim̧ur E bwe kwonaaj kōm̧m̧ani men ko, im Ej kallim̧ur n̄an kōjeram̧m̧an eok. Bujen in ej kōmeļeļeik ilo jar in kwojkwoj eo me rej jar kake kajjojo Jabōt (lale D&C 20:77–79). Kwoj kallim̧ur:

N̄an keememej Jisōs Kraist.
N̄an kōjparok kien ko An.
N̄an bōk ioom etan Kraist, meļeļein n̄an likūt jerbal eo An m̧oktata ilo mour eo am im kōm̧m̧ane ta eo Ekōņaan ijjelo̧kin ta eo laļ in ekōņaan.

Ilo am dāpij kallim̧ur in, Jemedwōj Ilan̄ ej kallim̧ur bwe Jetōb Kwojarjar eo enaaj pād ippam̧ im bwe jerawiwi ko am naaj jeorļo̧ki.

Ta eo Jetōb Kwojarjar?

Menin letok eo an Jetōb Kwojarjar ej juon menin letok eo an Jemedwōj Ilan̄. Peptaij eo am kōn dān ej jan̄in dedeļo̧k m̧ae em̧m̧aan ro rej kabwijer Melkisedek Priesthood eo rej lewaj juon kōjeram̧m̧an n̄an bōk Jetōb Kwojarjar (lale Jon 3:5).

Jetōb Kwojarjar ej juon m̧ōttan Doulul in Anij. Ej kam̧ool kōn Jemedwōj Ilan̄ im Jisōs Kraist im jipan̄ kōj jeļā m̧ool eo. Ej jipan̄ kōj kajoor ilo jetōb. Ej kakkōļ kōj jen jorrāān. Ej jipan̄ kōj katak. Jetōb Kwojarjar eo emaron̄ jipan̄ kōj en̄jake iakwe eo an Anij.

N̄e kwoj kapen āinwōt juon membōr in Kabun̄ in, Jetōb Kwojarjar eo emaron̄ in pād ippam̧ aolep iien n̄e kwoj kālet jim̧we eo.

Etke ij aikuj ralitōk iiō rūtto n̄an peptaij?

Irooj ej katakin bwe ajri ro rejjab aikuj in peptaij m̧ae rej rūtto n̄an meļeļe oktak eo ikōtaan jim̧we im bōd, eo jeje ko rekwojarjar rej ba ralitōk iiō (lale Moronai 8:11–12; D&C 29:46–47; 68:27).