Wanem Yumi Bilivim

Tabu Spirit I Givim Kamfot, Inspiresen, mo I Testifae

Presen we i Tabu Spirit, hem i wan long ol bigfala blesing we yumi kasem long laef ia, from Tabu Spirit i givim kamfot, inspiresen, woning, i klinim gud, mo i givhan long yumi. Hem i save fulumap yumi “wetem hop mo lav we i stret evriwan” (Moronae 8:26). Hem i tijim “trutok blong evri samting” (Moronae 10:5). Yumi kasem revelesen mo ol presen long saed blong spirit i kam long God tru longTabu Spirit. Moa impoten, yumi kasem ol testemoni blong yumi long Papa long Heven mo Jisas Kraes tru longTabu Spirit.

Bifo yu bin baptaes, yu bin save filim Tabu Spirit wanwan taem. Be nomo taem yu kasem presen ia we i Tabu Spirit afta long baptaes blong yu, yu bin save glad blong gat oltaem kampani blong Tabu Spirit, hemia sapos yu klin inaf. Presen ia, yumi kasem tru wan we i gat Melkesedek Prishud taem i putum ol han blong hem antap long hed blong yu (luk long Ol Wok 19:6; luk long D&C 33:15). Afta long hemia, evri Sabat dei yu save riniu ol kavenan blong yu blong baptaes taem yu tekem sakramen, mo long wei ia, yu kasem blesing ia blong Lod we i blong yu save oltaem gat Spirit blong Hem i stap wetem yu (luk long D&C 20:77).

Tabu Spirit, we plante taem yumi save long hem olsem Spirit, hem i nambatri memba blong Godhed. Profet Josef Smit i bin tijim se Papa i gat wan bodi blong mit mo bun we oli save tajem, semmak olsem hemia blong man; Pikinini blong Hem tu; be Tabu Spirit, hem i no gat wan bodi blong mit mo bun, be hem i wan we i Spirit. Sapos i no olsem, bae Tabu Spirit i no save stap insaed long yumi (luk long D&C 130:22).

“From Spirit blong Lod i no stap long ol tempol we i no tabu” (Hileman 4:24), yumi mas klin inaf blong gat kampani blong Hem. Yumi stap klin inaf taem we, wetem ol nara samting, yumi gat ol klin tingting, yumi laef wetem fasin blong stap tru, mo yumi stap lukaot blong obei ol komanmen.

Afta we yumi kasem presen ia we i Tabu Spirit, yumi save mekem plante samting blong invaetem paoa blong Hem long ol laef blong yumi:

• Prea

• Stadi ol skripja.

• Stap klin inaf blong tekem sakramen.

• Wosip long tempol.

• Lukluk ol gudfala media, yusum klin lanwis, mo gat ol tingting we oli klin gud.

Blong moa infomesen, luk long 2 Nifae 31:13, 17;32:5;3 Nifae 27:20; Moronae 10:5–8; Joseph Smith—History 1:70.

Yumi No Mas Tekem Presen Ia Olsem Samting Nating

“Olsem evri nara presen, presen ia, yumi mas kasem mo akseptem mo stap glad long hem. Taem ol han blong prishud oli stap antap long hed blong yu blong konfemem yu wan memba blong Jos, yu bin harem ol toktok ia, ‘Kasem Tabu Spirit.’ Hemia i no minim se Tabu Spirit bae i stap oltaem olsem kompanion blong yu. Ol skripja i wonem yumi se Spirit blong Lod bae ‘i no stap oltaem wetem man’ (Jenesis 6:3). Taem oli konfemem yumi, yumi kasem raet ia blong gat kampani blong Tabu Spirit, be hem i wan raet we yumi mas gohed blong winim tru long fasin blong stap obei mo stap klin inaf.”

Elda Josef B. Witlin (1917–2008) blong Kworom blong Olgeta Twelef Aposol, “The Unspeakable Gift,” Liahona, 28 Mei 2003.

Foto Pikja we i kam long Kristina Smit, Iv Taff, Kodi Bel, mo Matiu Raea.