Stap Jusum Pat Ia we I Moa Gud

I Kam long Matiu D. Fliton

Ol Magasin blong Jos

Samtaem yu mas livim sam gud samting from samting we i moa gud.

Wan dei Soltan Suks blong Seged, Hungari, i bin sapraesem kayak koj blong hem mo talem long hem se bae hem i no go long Jemani blong wan kompetisen.

“Hem i bin long sem dei blong baptaes blong mi, mekem se mi talem no,” Soltan i talem.

Long 17 yia, Soltan i bin winim plante kompetisen long kayak. Hem i wan popula spot long Hungari, mo Soltan i bin gud—gud inaf blong mekem se janis blong kam wan profesonol i save kam ril. Be i no blong mestem wan kompetisen nomo, Soltan i no longtaem afta, bae i givap long kayak fulwan. Hem i gat wan samting we i moa gud blong mekem.

Kaya i bin wan gud samting blong Soltan. Afta plante yia we hem i stap wok wetem koj blong hem, hem i bin lanem blong kontrolem hemwan, blong stap obei, mo blong stap wokhad. Soltan i bin lanem tu blong no akseptem ol samting mo fasin we i save spolem wanem we hem i stap hadwok from. I no bin wan isi laef; hem i stap hemwan, mo blong kam profesenol bae i tekem moa taem. Praktis blong wan profesenol hem i tekem 12 aoa long wan dei mo hem i mas kompit long Sandei.

“Kayak i bin tekem plante taem blong mi,” Soltan i talem. “Mi bin fultaem long hem. From samting ia, mi bin livim plante samting aot long laef blong mi.”

Hem i from wanem Soltan i plan se hem i no save givim hemwan long tugeta samting ia, gospel mo kayak. Long 2004, hem i bin talem long koj blong hem se bae hem i nomo go long kayak bakegen.

Eli long yia ia, ol misinari oli bin stat blong tijim mama blong Soltan. Hem i no bin stap long ol lesen. Sloslo hem i bin akseptem invitesen blong mama blong hem long baptaes blong hem. Be taem hem i bin go insaed long bilding blong jos, wanem hem i bin filim i bin tajem hat blong hem. Soltan i bin agri blong mitim ol misinari, from long wan saed, hem i save luksave se hem i semmak long olgeta.

“Mi intres long ol misinari, from long mi, oli ol nomol pipol nomo, be oli laef long wan standet we i moa hae,” hem i talem.

From hae standet ia nao we Soltan i bin stap long hem finis olsem wan man blong kayak, hem i rere blong akseptem ol tijing blong gospel olsem wan samting we i gat valiu. Hem i bin kasem baptaes tu manis afta.

Long fas taem, hem i bin ting se bae hem i save gohed blong go long kayak, be no go long ol kompetisen long ol Sandei. Be from hem i wan man we, taem hem i komitim hem long wan aktiviti o kos, i wantem mekem gud long samting ia, nao hem i bin jusum blong givap fulwan long kayak.

Hem i bin traem wan taem blong mekem kayak olsem wan samting we hem i laekem blong mekem nomo afta long baptaes blong hem. Taem hem i bin mekem olsem, koj blong hem i bin askem hem blong help blong tijim ol narawan mo oganaesem ol trip from se hem i no wantem kompit. Be hem i no bin wantem komitim hem long kayak—o eni nara aktiviti—we i save spolem hem long wok blong hem olsem wan disaepol.

Mekem se Soltan i hangemap barel blong hem mo i dediketem hemwan long seves long Jos wetem wan desisen we hem i tekem folem tingting we wan Presiden Howod W. Hanta (1907–95) i bin mekem taem hem i bin mared. Presiden Hanta i bin wan sakses man blong miusik bifo, mo i plei plante tul blong miusik. Long naet taem, hem i bin stap plei long wan okestra, be laefstael blong olgeta we hem i plei wetem olgeta oli no folem ol gospel standet. Mekem se Presiden Hanta i putum ol tul blong miusik blong hem i stap, mo karemaot olgeta nomo taem long ol famle aktiviti blong singsing tugeta.¹

Soltan i misim kayak, be hem i luksave se lav blong hem blong kayak i bin strong inaf blong kompit, mo i save winim, lav blong hem blong Lod sapos hem i bin stap kolosap tumas long spot ia.

Semmak prinsipol ia hem i blong eni aktiviti we i tekem yumi longwe long huia nao God i wantem yumi blong kam. Long wanwan long yumi, i gat sam samting we i moa gud blong yumi no gat olgeta, taem yumi go tru laef—nating sapos oli ol gud samting—i no nid blong yumi lusum laef blong yumi we i no save finis blong kasem olgeta samting ia.

“Jos i bin kam laef blong mi,” Soltan i talem. “Afta we mi save se kayak i no wan samting blong laef from sapos mi wantem stap aktiv, be i save stap olsem wan samting we mi laekem nomo blong mekem, nao i mekem i isi blong givap long hem. From, mi wantem mekem Papa long Heven i stamba tingting blong mi.”

Soltan i bin stat blong stadi gospel wetem sem paoa we hem i yusum long ol nara samting we hem i stap wantem kasem long laef. Hem i bin putum wan gol blong go long wan misin. Hem i bin wantem blong stap long kantri blong hem mo tijim ol narafala man.

Hem i bin go long misin long Hungari, mo naoia hem i wok olsem wan hae skul Inglis tija. Hem i gohed blong putum gospel olsem fas samting. “I gat ol samting we yumi nidim blong givap from oli blokem rod blong God,” hem i talem. “Hem i isi blong givap long ol nogud samting taem yumi save se yumi mas mekem. Plante taem yumi no luksave wetaem nao yumi mas givap long ol gudfala samting blong kasem ol samting we oli moa gud. Yumi ting se from oli no ol nogud samting, bae yumi save kipim mo gohed yet blong folem plan blong God.” Be Soltan i save se yumi mas givap ol gud samting sapos oli mekem se yumi no folem plan we God i gat long yumi.

Soltan Suks, blong Seged, Hungari, i bin givap long kayak blong gat moa taem blong gospel.