Eddōkļo̧k ilo Bwidej eo Ekōņ: Jodikdik ro Retiljek ilo Uganda
Cindy Smith eaar jokwe ilo Uganda ke ļeo pāleen eaar jerbal ijo, im rej kiiō jokwe ilo Utah, USA.
Ke raar bōk im mour kōn ko̧jpeļ eo an Jisōs Kraist, jodikdik ro ilo Uganda rej lo tōmak im kōjatdikdik eo ej eddōkļo̧k ipeļaakier aolep.
Ilo ioļapļap in East Africa, laļ eo eaiboojoj an Uganda ej jeram̧m̧an kōn bat ko kōn to̧o̧ im binana—im kōn jodikdik ro repojak n̄an bōk im mour kōn ko̧jpeļ eo an Jisōs Kraist.
Stake eo kein kajuon ilo Uganda eaar ejaak ilo 2010. Kabun̄ in em̧ōkaj an eddōkļo̧k, ippān elōn̄ likao ro im jiron̄ ro ilo kajjojo ward im branch.
Kajuatak juon Kōkaļļe, Erom juon Waanjon̄ak
Jiron̄ ro ilo juon ward raar im̧we jān katak ko an Sister Elaine S. Dalton, būreejtōn eo eutiej an Doulul eo an Jiron̄ ro, kōn wānōk: “Kiiō ej iien eo n̄an kajjojo iaad n̄an jerkak im kōpālpel juon kōkaļļe n̄an laļ in kūr n̄an bar ro̧o̧l n̄an wānōk.”1 Jiron̄ ro raar tallōn̄ lōn̄ļo̧k ioon juon bat rej lo aolepān bukwōn eo im kajutak kōkaļļe ko reko̧o̧ļ kōkaļļein kallim̧ur eo aer n̄an juon waanjon̄ak an wānōk. Ippān doon raar al “Jabān Tol Eo Uteij” (al, nō. 5).
Jiron̄ rein raar kajutak jon̄an ko aer make an jim̧we. Pokake eo aer eaar kōkajoorļo̧k naan in kam̧ool ko aer im kareel ro jet. Sister Dalton eaar ba, “Jab pere kajoor eo an kareel jim̧we eo ami.”2 Im āinwōt juon kōkaļļe, waanjon̄ak eo an jiron̄ rein rej ejopelpel n̄an aolepān laļ in.
Sandra
Āinwōt elōn̄ jiron̄ ro ilo Uganda, Sandra ej etetal laļ eļapļo̧k jān juon m̧aiļ n̄an m̧ōn jar eo, jipan̄ karreoik im̧ōn kweilo̧k eo ilo aolep Bōļaide, im pād ilo jemenere ilo aolep Jādede. Ilo wiik eo, ej ruj m̧okta jān 5:00 a.m. n̄an riiti bok in jikuuļ ko an, innām ej etetal laļ n̄an jikuuļ, bar ro̧o̧l n̄an kapijuknen eo an m̧okta ālkin 6:00 p.m. Eaar jab jikuuļ juon iiō in jikuuļ kōnke kōn apan̄ ko kōn jāān bōtaab jelm̧ae apan̄ ko an kōn juon m̧wil em̧m̧an: “Ko̧jpeļ eo eaar lukkuun jipan̄ eō n̄an ba dim im pen wōt.”
Sandra ej e wōt membōr in Kabun̄ in ilo m̧weo im̧ōn, bōtaab ro jinen im jemen rej rejtake an leļo̧k jerbal in jipan̄ eo an Kabun̄ in, āinwōt jipan̄ n̄e ward eo ej karreo peļaak ko im̧ōn kōkkaajriri ijo jokwe ie. Baam̧le eo an rej lo ekōjkan an ko̧jpeļ eo kar jipan̄ kōkajoorļo̧k er kajoor, em̧ool n̄e ej jelm̧ae jorrāān ko jab lo mejļaer. Kejōkļo̧kjeņ kōn kein jipan̄ eo an kajoor jab in, Sandra ej ba, “N̄e ij etal n̄an jar, ij en̄jake aō likūt kein tariņae an Anij” (lale Epesōs 6:11–17).
Juon rioktak eo ejjab etto, Susan, ej iakwe Kabun̄ in. Ej lukkuun in itok jān South Sudan, baam̧le eo an eaar ko jān apan̄ ko im kar jeram̧m̧an n̄an ioon mijenede ro ilo Uganda. Āinwōt juon riko, eaar lo aenōm̧m̧an im kōjparok ilo ko̧jpeļ eo. Ilo Jabōt ko ekōn bōktok ajri ro jatin n̄an jar, barāinwōt jet bar 10 ajri ro me rejjab membōr in Kabun̄ in. Ālkin baj juon mej ejjeļo̧k kōtmene kake eo an juon uwaan membōr in baam̧le eo an, eaar bar jepļaakļo̧k n̄an South Saudan, ijo eaar kōttar an Kabun̄ in kar ejaak ilo eria eo an. Jim̧or Susan im Sandra kar jelm̧ae idajon̄jon̄ ko, bōtaab raar pedped ioon Anij im lem̧ōņōņō kōn kōjeram̧m̧an ko an mour kōn ko̧jpeļ eo an Jisōs Kraist (lale Alma 32:6–8, 43).
Kaarmejet n̄an Jerbale juon Mijen
Ļikao ro ilo Uganda rej jino ikkure football ke raar ļaddik jiddik, kōjerbal ra ko lukōj ippān doon n̄an juon bo̧o̧ļ. Jān tore eo ke eaar lukkuun dik, Dennis eaar wōr juon an menin letok kōn ikkure, im aijkuuļ eo an eaar leļo̧k n̄an e juon jikaļorjep n̄an ikkur n̄an kumi eo aer. Ālkin an kar kadedeļo̧k aijkuuļ, juon kumi in ikkure an ro rejeļā eaar kōļļāik e, ruum̧, im m̧ōn. Eaar juon ettōņak eaar kūrm̧ool, bōtaab Dennis eaar jeļā bwe menin enaaj kar bōbrae kōn karōk ko an n̄an etal n̄an juon mijen tok ālik ilo iiō eo.
Dennis
Ikdelel eo an Dennis n̄an kōm̧m̧ane ta eo Jemedwōj Ilan̄ eaar kōņaan bwe en kōm̧m̧ane eaar kanooj kajoor jon̄an eaar jab kōņaan pād wōt ilo kumi eo ke iien eo eaar tōkāk tok n̄an e n̄an jerbale juon mijen. Elōn̄ armej raar kajjitikin kālet eo an, bōtaab Dennis eaar jeļā eaar kōm̧m̧ane jokālet eo ejim̧we—n̄an e im ro jet. “Ļaddik ro ruo jatū im leddik eo jatū edik ej kab m̧ōj aer kar peptaij,” ej ba. “Iaar jab ļōmņak sister eo aō enaaj kar ron̄jake ko̧jpeļ eo. Ke Iaar lo an Anij kōm̧m̧ani kabwilōn̄lōn̄ ko ilo baam̧le eo aō, eletok n̄an eō juon kōjatdikdik emeram kōn ilju im jekļaj eo aō.”
Ilo ward eo an Dennis likao ro rej ekkatak Kwaļo̧k Aō Ko̧jpeļ kajjojo wiik. Raar erom ļo̧k āinwōt juon kumi, jerbal epaake doon ippān mijenede ro rej jerbal aolep raan im bōktok ro m̧ōttaer n̄an kweilo̧k ko an Jabōt im m̧akūtkūt ko jet, ekoba ikkure in basketball im football ilowaan wiik eo. Pris eo raar peptaiji ro m̧ōttaer im ro jet raar jipan̄ katakin ippān mijenede ro. Ium̧win jet iiō ko, kumi in an likao ro raar kōkajoorļo̧k aolepān ward eo, emen iaer, ekoba Dennis, raar bōk kūr ko n̄an Kenya Nairobi Mijen eo.
Raar ļoor kapilōk eo an Elder David A. Bednar jen Doulul eo an Jon̄oulruo Rijilōk ro n̄an “erom mijenede ro m̧okta ļo̧k jān aer jilkinļo̧k peba in mijen ko aer.”3 Raar kōm̧m̧ane āindein jān jerbal ippān āinwōt juon doulul, juon kumi em̧m̧anļo̧k jān jabdewōt.
Aolepān mijenede ro emān raar anjo ioon idajon̄jon̄ ko n̄an aer maron̄ jerbal. Wilberforce ej kōmeļeļeik: “Inan̄in kar wōt jidik luuji kōjatdikdik eo n̄an etal n̄an juon mijen [kōnke kōn wōņāān], innām iaar riiti Matu 6:19–20: ‘Kwon jab arōk men ko an laļin … ak kwon ajeļo̧k eok make n̄an menin aorōk ko an lan̄.’ Kōn menin kōn niknik im kallim̧ur, iaar maron̄ kōtōprak menin kōttōpar eo aō n̄an jerbale juon mijen jerbal aolep raan. Ij iakwe jerbal in mijenede. Ejjeļo̧k men em̧m̧anļo̧k jān pukōt m̧okta aelōn̄ in kiin̄ eo an.”
Kōjatdikdik eo an Ilju im Jekļaj
Jodikdik ro an Uganda rej jipan̄ kalōk aelōn̄ in kiin̄ eo an Anij ijin, kōn kōjatdikdik eo eļap an ilju im jekļaj eo. Men̄e ejjeļo̧k tampeļ ilo East Africa, jodikdik ro rej reim̧aanļo̧k n̄an iien eo n̄e renaaj m̧are ilo juon tampeļ ettoļo̧k. Juon m̧akūtkūt an stake eaar pedped wōt ioon m̧aanjappopo n̄an deļo̧n̄e tampeļ eo, im ilo jem̧ļo̧k in, juon member in stake būreejtōnji eo eaar kwaļo̧k naan in kam̧oool eo an: “Anij ej iakwe kom̧. Komij ilju im jekļaj eo an Kabun̄ in ilo Uganda.” Jodikdik ro rejim̧we raar wōr kadede aer juon kareel eo eļap.
Likao ro im jiron̄ ro jān Uganda rej karmejete men ko an laļ in n̄an kōjeram̧m̧an ko me naaj indeeo kitier. Raar katōk ine in tōmak eo im raar najdiki kōn kea (lale Alma 32:33–37). Āinwōt juon wōjke eobrak kōn leen (lale Alma 32:42), jodikdik ro rej kwaļo̧k lan̄lōn̄ eo an ko̧jpeļ eo ilo āne in ekōn̄e.
Itulōn̄: Jodikdik ro rej pād ilo juon nokon in jota an stake ippān doon.
Ilōn̄: Susan (ioļapļap), juon riko in Uganda, lo aenōm̧m̧an ilo ko̧jpeļ eo im kiiō kar bōktok ajri ro jatin im ro jet n̄an m̧ōn jar eo.
Io̧ļapļap: Jiron̄ ro an ward eo rej lem̧ōņōņō in jerbale Personal Progress eo.
Tuanbwijmaron̄: Dennis eaar jab bōk ijo jikin ilo juon kumin football an rim̧ōkade n̄an kwaļo̧k ko̧jpeļ eo. E im likao ro jet ilo doulul eo an pris ro an raar karmejete im anjo ioon idajon̄jon̄ ko n̄an jerbali mijen ko.
Pija ko jen Cindy Smith