Fasin blong Gro long Gudfala Graon: Fetful Yut long Yuganda
Sindi Smit i bin stap long Yuganda taem we hasban blong hem i bin stap wok longwe, mo naoia tufala i stap long Yuta, YSA.
Taem oli akseptem mo laef folem gospel blong Jisas Kraes, ol yut long Yuganda, oli stap luk fet mo hop i stap gro raon long olgeta.
Long hat blong Is Afrika, naesfala kantri blong Yuganda i kasem blesing wetem ol plantesen blong suga ken mo banana tri—mo wetem ol yang pipol we oli rere blong akseptem mo laef folem gospel blong Kraes.
Fas stek long Yuganda i bin oganaes long 2010. Jos i gro kwik, wetem plante yang man mo yang woman long wanwan wod mo branj.
Leftemap Wan Flag, Stap Wan Eksampol
Ol yang woman long wan wod oli bin kasem inspiresen tru ol tijing blong Sista Ilein S. Dalton, Yang Woman jeneral presiden, abaot klin fasin: “Naoia hem i taem blong yumi wanwan blong girap mo openem flag ia mo singaot i go long wol from klin fasin.”1 Ol yang woman i bin klaem i go long top blong wan hil mo save luk i go daon long taon blong olgeta mo leftemap golden flag we i wan simbol blong promes blong olgeta blong stap ol eksampol blong klin fasin. Tugeta oli singsing “Antap Antap Tumas” (Hymns, no. 5).
Ol yang woman ia oli bin leftemap stret mo gud standet blong olgeta. Fasin blong olgeta blong obei i bin mekem ol testemoni blong olgeta i kam strong moa mo i tajem ol narafala man.”2 Mo olsem wan flag, eksampol blong ol yang woman ia i bin flae i go long ful wol.
Sandrea
Olsem plante yang woman long Yuganda, Sandra i stap wokbaot moa bitim wan mael blong go long jos, i help blong klinim mitinghaos long Fraedei, mo go long seminari long Satedei. Long wik, hem i girap bifo 5 klok long moning blong ridim ol skul buk, mo afta hem i wokbaot i go long skul, kambak hom afta 6 klok aftenun. Hemi bin mestem wan yia blong skul from problem blong mane be hem i fesem ol jalenj blong hem wetem gudfala tingting: “Gospel i bin helpem mi tumas blong stanap stong mo no muvmuv.”
Sandra, hemwan nomo long hom i memba blong Jos, be papa mo mama blong hem i sapotem hem long Jos seves, olsem blong stap helpem hem taem wod i klinim ol yad blong wan lokol ples blong lukaotem ol pikinini we oli no gat papa mo mama. Ol famle blong hem oli bin luk olsem wanem gospel i bin helpem hem blong stap strong, iven taem hem i fesem ol problem. Taem hem i luklukbak long weaples hem i kasem paoa long hem, Sandran i talem: “Taem mi go long jos, mi filim olsem se mi putum long mi klos blong faet blong God” (luk long Efesas 6:11–17).
Susan, we i jes joenem jos, i lavem Jos. Hem i blong Saot Sudan; famle blong hem i bin ronwe long ol hadtaem mo bin gat blesing blong kasem ol misinari long Yuganda. Olsem wan we i ronwe long ples blong hem, hem i bin faenem pis mo proteksen long gospel. Long ol Sandei, bae hem i tekem ol yangfala brata mo sista blong hem i go long jos, tugeta wetem 10 moa pikinini we oli no memba blong Jos. Afta ded blong wan famle memba, hem i gobak long Saot Sudan, mo wet blong Jos i save stanap long eria blong hem. Tugeta, Susan mo Sandra, i stap fesem ol jalenj, be tufala i dipen long God mo stap glad long ol blesing blong stap laef folem gospel blong Jisas Kraes (luk long Alma 32:6–8, 43).
Stap Sakrifaes blong Go long Wan Misin
Ol yang man blong Yuganda, oli stap plei futbol taem oli ol smol boe, mo yusum ol stik we oli taetem strong blong mekem wan balong. Stat long taem we hem i bin yang, Denis i bin gat wan talen long saed blong spot, mo hae skul blong hem i bin givim hem wan skolasip blong plei blong tim blong olgeta. Afta we hem i komplitim skul, wan profesenol tim i bin wantem givim wan wok long hem, mo bae hem i kasem wan pei, wan ples blong silip, mo kakae. Hem i bin wan drim we i kam tru, be Denis i bin save se hemia bae i save spolem ol plan blong hem blong go long wan misin samtaem afta long yia.
Denis
Denis i wantem tumas blong mekem wanem Papa long Heven i wantem hem blong mekem we i kam strong long hem we i mekem se hem i no bin wantem kasem temtemsen blong stap long tim taem i kam long stret taem blong hem blong go long wan misin. Plante pipol i bin kwestinem joes blong hem, be Denis i sua se hem i mekem stret desisen—blong hem mo ol narafala wan. “Tufala smol brata mo smol sista blong mi, oli jes baptaes,” hem i talem. “Mi neva ting se sista blong mi bae i wantem harem gospel. Taem mi luk God i stap mekem merikel long famle blong mi, i givim mi wan hapi hop blong fiuja blong mi.”
Long wod blong Denis, ol yang man oli stadi long Prijim Gospel blong Mi evri wik. Oli bin kam olsem wan tim; oli stap wok kolosap wetem ol fultaem misinari mo stap tekem ol fren oli go long ol Sandei miting mo ol nara aktiviti, olsem basketbol mo futbol gem long wik. Ol pris oli bin baptaesem ol fren mo ol narawan oli bin help blong tij wetem ol misinari. Afta sam yia, tim ia blong ol yang man i bin mekem ful wod i kam strong moa, mo fo long olgeta, wetem Denis, oli bin kasem leta we oli singaotem olgeta blong go long Kenia Nairobi Misin.
Oli bin folem kaonsel blong Elda Deved A. Bedna blong Kworom blong Olgeta Twelef Aposol blong “kam ol misinari longtaem bifo yu givim ol misin pepa blong yu.”3 Oli bin mekem olsem taem oli bin stap wok tugeta olsem wan kworom, wan tim we i moa gud bitim eni narawan.
Evri fo misinari ia oli bin winim ol jalenj blong mekem se oli save givim seves. Wilbafos i eksplenem: “Kolosap mi lusum hop blong go long wan misin [from mane blong hem], be afta, mi ridim Matiu 6:19–20: ‘I nogud yufala i stap hivimap ol gudgudfala samting blong yufala long wol ya … yufala i mas hivimap ol gudgudfala samting blong yufala long heven.’ Mekem se wetem strong tingting mo komitmen, mi bin save kasem gol blong mi blong go givim seves long wan fultaem misin. Mi lavem misinari wok. I no gat wan samting i moa gud bitim we blong lukaotem fastaem kingdom blong Papa God.”
Hop blong Wan Fiuja
Ol yut blong Yuganda oli stap help blong bildim kingdom blong God long ples ia, wetem bigfala hop long fiuja. Nomata i no gat wan tempol long Is Afrika, ol yut oli stap lukluk fored long taem we bae oli mared long wan tempol longwe. Wan stek aktiviti i bin lukluk moa long fasin blong rere blong go insaed long tempol, mo long en, wan memba blong stek presidensi i bin serem testemoni blong hem: “God i lavem yufala. Yufala i fiuja blong Jos long Yuganda.” Ol yut we oli stret mo gud ia oli stap mekem finis bigfala wok ia.
Ol yang man mo woman blong Yuganda oli stap sakrifaesem ol samting blong wol from ol blesing we bae i stap blong oltaem. Oli bin planem sid blong fet mo oli stap lukaotem mo kea gud long olgeta (luk long Alma 32:33–37). Olsem wan tri we frut i kavremap (luk long Alma 32:42), ol yut oli bin serem glad blong gospel long gudfala graon ia.
Top: Ol Yut oli atendem wan stek faeasaed tugeta.
Antap: Susan (long medel), wan we i ronwe long ples blong hem i kam long Yuganda, i faenem pis long gospel mo hem i bin karem i kam wetem hem ol brata mo sista blong hem mo sam narafala pikinini i go long jos.
Long medel: Ol yang woman blong wod ia oli glad blong wok long Progres blong Miwan.
Raet: Denis i bin livim wan spot blong wan profesenol futbol tim blong prijim gospel. Hem mo ol narafala yang man long kworom blong ol pris, oli bin sakrifaes mo winim ol jalenj blong go long ol misin.
Foto i kam long Sindi Smit