Ewi wāween Aō Jeļā
Kūr eo Aō n̄an Lo̧mo̧o̧r
Kōmeļeļe jen Roger Motzkus
Āinwōt juon likao, iaar loļo̧k elōn̄ kabun̄ ko im ko im kar pok kōnke kajjojo iaer raar kōmeļeļeik katak ko roktak an jeje ko rekwojarjar katakin oktak in meļeļe an jeje ko rekwojarjar. Eaar jab em̧m̧an aō mour kōn jab kautiej eo iaar lo ilo jet iaer, kōn menin iaar bōjrak in kajieon̄ pukōt juon m̧ōn jar n̄an etal n̄an e.
Jet iiō ko tokālik juon m̧ōtta, Cleiton Lima, eaar peptaij n̄an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Eaar jab kwaļo̧k menin n̄an eō em̧ool men̄e kōm kar lukkuun m̧ōttā, bōtaab ilo an iien eļļaļo̧k, iaar jino lo oktak ko ilo e. Ilo Jabōt ko ikōn etal n̄an m̧weo im̧ōn ilo jibon̄ bwe kom̧ maron̄ ikkure football, bōtaab ijjab maron̄ kar lo e ilo m̧weo im̧ōn. Menin eaar waļo̧k ruo ak jilu Jabōt ko kajju. Āliktata Cleiton eaar jiron̄ eō bwe ejjab maron̄ ikkure football ilo Jabōt ko kōnke eaar kautiej raan eo an Irooj. Iaar jiron̄ e, “Kabun̄ en ej kabwebweik eok ej kōm̧m̧an bwe kwon udieakeak.”
Innām Cleiton eaar karuwaineneik eō n̄an etal n̄an jar. Iaar leļo̧k n̄an e jekpen ņae kōnke iaar jab errā kōn kabun̄. Ium̧win 10 allōn̄ ko, Cleiton eaar bōktok mijenede ro n̄an katakin eō, bōtaab iien otemjej iaar jekpen ņae eō make ak jiron̄ er iaar lukkuun poub. Bōtaab eaar jab ebbweer.
Juon raan ilo Juun, eaar karuwaineneik eō n̄an etal n̄an juon iien eb an Kabun̄. Iaar kōm̧m̧an kōjak ippān, “Enaaj ke wōr m̧ōn̄ā ejjeļo̧k wōņāān im būjin leddik ke?” Ettōn̄, eaar ba aaet!
Ij aikuj kwaļo̧k bwe iaar po kōn an lojiō kar kwōle. Iaar etal n̄an m̧ōn jar eo im kar iakwe. Iaar ruawinene jen aolep, iaar kanooj m̧ōn̄ā, im iaar jino erom itok limo ilo pād ilo juon kweilo̧k. Ke iaar jikrōkļo̧k ilo m̧ōn jar eo ilo Jabōt, iaar ioon elōn̄ armej ro im kar ron̄jake naan in kam̧ool ko aer. Iaar jab jeļā kōn Bok in Mormon eo, bōtaab iaar en̄jake Jetōb eo an Irooj ke elōn̄ membōr ro an Kabun̄ in raar kam̧ool, “Ijeļā bwe Bok in Mormon eo ej m̧ool, bwe en̄in ej Kabun̄ eo an Jisōs Kraist, im bwe Joseph Smith eaar juon rikanaan kar kūr jen Anij.” Ijjan̄in kar en̄jake em̧m̧an. Iaar jab wōt kōņaan ioon mijenede ro, bōtaab kweilo̧k in kwaļo̧k naan in kam̧ool in eaar un̄ur eō.
Wiik eo tok juon, Cleiton eaar bar karuwaineneik eō n̄an etal n̄an jar. Iaar jab maron̄ kōnke eaar bar wōr men eo iaar kōm̧m̧ane. Iaar maron̄ lo būrom̧ōj eo ilo turin mejān ke iaar jiron̄ e ijjab jeļā eļan̄n̄e imaron̄ etal.
Mekarta, ilo jibon̄ in Jabōt eo iaar ruj kōn juon ikdelel n̄an etal n̄an jar. Iaar ruj ilo 6:50, eo eaar kanooj pen n̄an eō, im iaar kōppopo im kōttar n̄an an Cleiton itok. Eaar bwilōn̄ ke eaar lo eō nuknuk mouj im kōttar. Jabōt jab in bisop eo eaar katakin kōn priesthood eo. Iaar en̄jake Jetōb an kajoor im kar wōr im̧we bwe ij aikuj bōk katak ko an mijenede ro. Ilo jem̧ļo̧k in ļo̧k kweilo̧k eo an Doulul eo an Likao ro, iaar jeļā bwe inaaj kar peptaij.
Ke jar eaar jem̧ļo̧k, iaar jiron̄ Cleiton, “Iaar kōņaan peptaij!”
Eaar ļōmņak iaar kōjak. Bōtaab innām eaar ba, “Eļan̄n̄e ij kūr tok elder ro, kwonaaj ke ioon er?” Iaar uwaak aaet.
Kar katakin eō jen elder ro. Ke iaar ron̄ kōn ennaan eo an Jepļaaktok eo, eaar ļapļo̧k ilo n̄a n̄an kapen eo bwe ij aikuj peptaij. Bōtaab iaar kōņaan jeļā kōn n̄a make tarlep in m̧ool eo an Bok in Mormon. Elder ro raar kōkaļļeik Moronai 10:3–5 ilo Bok in Mormon eo aō im karuwaineneik eō n̄an jar im kajjitōk ippān Anij eļan̄n̄e ej m̧ool.
Joten eo juon iaar kememej bwe ijjan̄in kar riiti Bok in Mormon eo. Ke iaar jino riiti, iaar en̄jake juon jetōb elukkuun in kajoor. Iaar jar, im m̧okta jān aō kar kadedeļo̧k, iaar jeļā bwe Bok in Mormon eo ej m̧ool. Ij kam̧oolol n̄an Anij kōn an kar uwaake jar eo aō. Iaar peptaij ilo Juļae 2006.
Tokālik iaar jerbal āinwōt juon mijenede ilo Brazil Cuiabá Mijen, im eo m̧ōtta Cleiton eaar jerbal ilo Brazil Santa Maria Mijen. Kōm̧ ar kōm̧m̧ane ta eo Cleiton eaar kōm̧m̧an e n̄an eō: karuwaineneik armej n̄an itok n̄an Kraist im jipan̄ er bōk ko̧jpeļ eo kōjepļaaktok kōn kōjerbal tōmak ilo Jisōs Kraist, ukweļo̧k, peptaij, im bōk menin letok eo an Jetōb Kwojarjar. Menin ej m̧ool in iaļ eo n̄an lo̧mo̧o̧r.
Jen iien otemjeļo̧k karuwaineneik ro m̧ōttad im nukid n̄an katak kōn ko̧jpeļ in, bwe Rilo̧mo̧o̧r eo eaar kūr aolep ke Eaar ba, “Itok n̄an Ippa” (Matu 11:28). Ijeļā bwe en̄in ej Kabun̄ eo an Jisōs Kraist im bwe kiiō ej iien eo n̄an karuwaineneik aolep n̄an itok n̄an E.