Ol Kwestin mo Ansa
“Olsem wanem nao bae mi eksplenem long fren blong mi se fasin blong brekem loa blong jastiti i no wan gudfala tingting nating?”
Papa long Heven i wantem yumi blong stap hapi mo klin inaf blong gat Spirit blong Hem, mekem se Hem i givim yumi ol komanmen blong helpem yumi kipim ol tingting, ol toktok, mo ol aksen blong yumi long ol stret ples. Loa blong jastiti i helpem kipim tabu paoa blong mekem pikinini insaed long mared laef nomo. Wan risen Hem i komandem se tabu paoa blong mekem pikinini i tekem ples nomo bitwin hasban mo waef, hem i from “ol pikinini i save bon i kam nomo tru wan man mo woman we tufala i bin mared folem loa olsem hasban mo waef.1
Yu save serem wan kopi blong Blong Ol Yut Oli Kam Strong wetem ol fren blong yu. Hem i givim sam risen from wanem i gud blong kipim loa blong jastiti: “Taem yu klin gud long saed blong seks, rere yuwan blong mekem mo kipim ol tabu kavenan long tempol. Yu rere yuwan blong bildim wan strong mared mo blong karem i kam long wol ol pikinini olsem pat blong wan famle we yu lavem mo we i no save finis. Yu protektem yuwan aot long ol samting we i save spolem yu long saed blong spirit mo tingting we i save kam taem yu gat rilesensip long saed blong seks bifo mared. Yu protektem yuwan tu long ol rabis sik. Kipim yu stap klin gud long saed blong seks i helpem yu gat tras mo hapi mo i mekem se fasin blong yu blong mekem gud desisen naoia mo long fiuja we i kam bae i kam antap gud.”2
Tempol
Papa blong yumi long Heven i gat ol stamba tingting blong yumi evriwan, mo stamba tingting ia i save kamtru long tempol. Yumi mas klin inaf blong go insaed long tempol blong mekem se ol famle blong yumi i save sil blong oltaem. Bae yumi stap wetem Papa blong yumi long Heven bakegen, mo hemia we i moa impoten, bae yumi gat wan glad we i no gat en, we man we i no klin inaf i no save gat.
Alofa M., 18 yia, Samoa
Mared mo Famle
Oli bin leftemap tingting blong yumi blong stap klin gud long saed blong seks blong mekem se yumi save stap klin inaf blong go insaed long tempol mo kipim ol tabu kavenan. Sapos yumi folem loa blong jastiti, yumi save bildim wan strong mared mo famle long fiuja. Setan i stap oltaem blong temtem yumi, be tru prea, ol skripja, mo ol gud fren, yumi save winim samting ia.
Resti M., 16 yia, Filipin
Ol Ansa we Oli No Stret
I gat plante samting we i kamaot we oli no stret taem wan i brekem loa blong jastiti, be i no evriwan we yu lanem abaot olgeta long helt klas. Taem yu brekem loa blong jastiti i save ronem Spirit i aot long laef blong yu, mekem olgeta we i stap kolosap yu oli harem nogud, mo mekem yu filim nogud long yuwan. Mi wantem givim tingting ia blong yu lukluk wan Momon vidio mesej we oli singaotem “Jastiti: Wanem Ol Limit?” [long youth.lds.org long Inglis, Potugal, mo Spanis].
Matiu T., 17 yia, Yuta, YSA
Fasin blong Stap Klin Gud mo Respek
Taem yumi stap folem loa blong jastiti, yumi stap klin gud long ae blong God, yumi respektem yumiwan, mo yumi helpem ol narawan blong respektem yumi tu. Sapos yumi obei loa blong jastiti, yumi soem se yumi ol pikinini blong God mo we yumi sapotem ol hae standet. Bae yumi no akseptem fasin blong stap rigret. Taem yumi obei long Papa blong yumi long Heven, speseli abaot loa ia, laef blong yumi bae i moa hapi long wol ia mo long wol we i stap kam.
Aliana G., 19 yia, Filipin
Wan Tabu Presen
Sapos presen blong tabu paoa blong mekem pikinini i no impoten, spesel presen ia we i kam long God bae oli tritim olsem wan samting nating. Blong givim wan presen bae i no filim olsem se oli presen long yu sapos man we yu givim long hem i no ting se hem i spesel. Wan i mas oltaem tritim tabu paoa blong mekem pikinini olsem wan tabu samting; from yumi evriwan i ol tempol blong God mo i mas stap klin mo klin gud olsem wan tempol.
Jeron Z., 15 yia, Aedaho, YSA
Sprit I Stap Wetem Yumi
Taem yu stap klin aot long sin, bae yu hapi tumas mo bae yu kasem blesing. Ol bodi blong yumi oli olsem ol tempol, mo Papa long Heven “i no stap long ol tempol we oli no tabu” (Alma 7:21). Mekem se taem yumi stap klin long sin, Spirit i save stap wetem yumi.
Marian P., 14 yia, Akansas, YSA
Ol Impoten Kwestin
Ansarem ol kwestin blong fren blong yu taem yu askem sam kwestin ia: “Be olsem wanem sapos fiuja hasban o waef blong yu i stap lukluk yu naoia?” Evri pipol we mi bin harem abaot olgeta we oli bin brekem loa blong jastiti, oli bin rigret. “Be olsem wanem sapos fiuja pikinini blong yu i askem sapos yu bin brekem loa blong jastiti?” Fren blong yu i nidim blong lanem olsem wanem loa blong jastiti i impoten naoia, bifo wan boe o gel i askem kwestin ia. Yu nidim blong kipim yuwan i klin mo klin gud blong lidim wan hapi, helti laef mo no gilti from tabu loa ia we yu bin brekem.
Robin K., 13 yia, Yuta, YSA
Klin Fasin mo Jastiti
Lod i glad long klin fasin mo jastiti, mo evri samting i mas hapen long stret taem blong hem. Loa blong jastiti i wan komanmen we i kam long Lod. Prea mo kampani blong Spirit oli ol samting we oli stret gud evriwan blong save se, blong stap klin, i wan blesing.
Selene R., 18 yia, Nikaragua
Insaed long Mared
Bae mi eksplenem long fren blong mi se, blong brekem loa blong jastiti, i wan nogud tingting from tabu paoa blong mekem pikinini, oli mekem nomo blong ol kapol we oli mared folem loa. Taem yumi brekem loa blong jastiti, yumi lusum Tabu Spirit long laef blong yumi.
Ogustina A., 15 yia, Gana