Ta meļeļe in juon Mōttā eo Em̧ool?

Elaine S. Dalton

Būreejtōn eo Eutiej an Doulul eo an Jiron̄ ro

Meļeļe eo an juon mōttā em̧ōj an kar oktak ilo kein kapeel ko rej kobaik laļ in rainin. Rainin jemaron̄ ļōmņak elōn̄ ro “ro mōttad.” Em̧ool: jej lem̧ōņōņō kōn maron̄ eo n̄an karon̄ im jeļā men ko rekāāl kōn ta eo ej waļo̧k ilo mour ko elōn̄ ro jejeļā kajier barāinwōt ro m̧ōttad kiiō im kar m̧okta im em̧ool armej ro jejjan̄in ioon er kōj make me jej ņa etaer ro mōttad.

Ilo jekjek eo an jikin bwebwenato ko an intōrnet, naan eo “m̧ōttā” emakijkij kōjerbale n̄an kōmeļeļeik armej ro jej kōnono ippāer ijello̧kin jemjerā ko. Ewōr ippāmi maron̄ eo n̄an jilkinļo̧k n̄an “ro m̧ōttami” juon ennaan, bōtaab menin eoktak jān n̄e ewōr ad jemjerā ko ippān juon armej juon ilo̧k juon.

Jet iien n̄urbōktak eo ad ej ilo an mōttad. Bōlen jej aikuj pedped ioon erom juon m̧ōttā.

Ekanooj lōn̄ meļeļe ko an ta meļeļe in erom juon m̧ōttā. Ij jamin meļo̧kļo̧k ron̄jake an Elder Robert D. Hales jen Doulul eo an Jon̄oulruo Rijilōk ro ekōnono kōn ta meļeļe in n̄an erom juon m̧ōttā im kareel eo ekajoor an ro m̧ōttad ilo mour ko ad. Meļeļe eo an eaar wōr meļeļe in aitok kitien ilo mour eo aō. Eaar ba, “Ro m̧ōttad rej armej ro me rej kapidodo n̄an mour kake gospel eo an Jisōs Kraist.”¹ Ilo jeļā in, n̄ūrbōktak kōn wemourur eo an bar juon armej ej meļeļe eo an m̧ōttā em̧ool. Ej likūt em̧m̧an eo an bar juon m̧okta. Ej lukkuun m̧ool, ettā, im erreo ilo aolep m̧akūtkūt. Bōlen en naan eo kallim̧ur me ej kōpeļļo̧k lukkuun meļeļe eo an jemjerā.

Ke leddik eo nejū, Emi, eaar 15 iiō dettan, eaar kōm̧m̧ane juon jokālet kōn kain ro m̧ōttan enaaaj aikuj kappok. Juon jibbon̄ Iaar kile bwe kape in Bok in Mormon eo an eaar peļļo̧k n̄an Alma 48. Eaar kōkaļļeik eoon ko me Kapen Moronai ej kōmeļeļeik: Moronai eaar juon em̧m̧aan ekajoor im pen; eaar juon armej in meļeļe eweppān. … Aaet, im eaar juon em̧m̧aan eo eaar pen ilo tōmak ilo Kraist” (eoon ko 11, 13). Ilo tōrerein eaar je, “Ikōņaan jerā im m̧areik juon em̧m̧aan āinwōt Moronai.” Ilo aō kar mijōk Emi im kain likao ro eaar iaio ippāer im tok ālik jerāik er ke eaar tōpar 16, imaron̄ kar lo bwe eaar kajion̄ bōk m̧wil kein e make im jipan̄ ro jet n̄an kakūrm̧ool jerbal eo aer āinwōt ļaddik ro nejin Anij, rikabwijer priesthood ro, im baba ro im ritōl ro ilju im jekļaj.

M̧ool in m̧ōttā ej kaareel ro me rej iaio ippāer n̄an “ļōn̄jak utiej ļo̧k jidik [im] erom em̧m̧anļo̧k jidik.”² Komaron̄ jipan̄ doon, eļaptata likao ro, m̧aanjappopo n̄an im jerbali mijen ko rem̧m̧an. Komaron̄ ke jipan̄ ro jet pād wōt ilo erreo. Kareel eo ami ejim̧we im jemjerā eo emaron̄ wōr juon jelet indeeo ejjab wōt ilo mour ko an ro me komij iaio ippāer ak barāinwōt epepen ko rej itok wōt.

Rilo̧mo̧o̧r eaar kūr rikaļoor ro An ro M̧ōttan. Eaar ba:

“En̄in ej kien eo Aō, bwe ren iakwe doon, āinwōt Iaar iakwe kom̧.

“Iakwe eo me ejjeļo̧k armej eļapļo̧k jān menin, bwe juon armej en ajeļo̧k mour eo an n̄an ro m̧ōttan.

“Kom̧ ro m̧ōtta, eļan̄n̄e ko̧mij kōm̧m̧an men ko Ij jiron̄ kom̧.

“Ij jamin bar ņaetami ro jera, bwe ri karijer e jaje men eo irooj eo an ej kōm̧m̧an; a Iaar ņaetami ro jera, bwe men otemjej Iar ron̄ jān Jem Iar kwaļo̧k n̄an kom̧.” (Jon 15:12–15; kalikkar kar kakobaba).

Ilo ami mour im kwaļo̧k ko̧jpeļ eo an Jisōs Kraist, kom̧ naaj kan̄ōltok armej n̄an kom̧ ro renaaj kōņaan erom ro m̧ōttami—ejjab juon eo kwon kōnono ippān ilo jikin bwebwenato an internōt ak kain eo m̧ōttam̧ eo Rilo̧mo̧o̧r ej kwaļo̧ke jān naan ko An im waanjon̄ak eo An. Ilo ami kajieon̄ n̄an erom m̧ōttā n̄an ro jet im n̄an kōromaak ami meram, kareel eo ami enaaj kōjeram̧m̧an mour ko an elōn̄ ro kom̧ij iaio ippāer. Ijeļā bwe ilo ami pedped ioon erom juon m̧ōttā n̄an ro jet, āinwōt kōmeļeļeik jān rikanaan ro im waanjon̄ak ko ilo jeje ko rekwojarjar, kom̧ naaj m̧ōņōņō im kom̧ naaj juon kareel n̄an em̧m̧an ilo laļ in im naaj juon raan bōk kallim̧ur eo eiaboojoj kar kōnono kake ilo jeje ko rekwojarjar kōn jem̧jerā em̧ool. Kallim̧ur [in ilo jeje ko rekwojarjar] jiron̄ kōj bwe ejja iaio ippān doon in me ej pād ilubwilijid ilo mour in naaj waļo̧k ibwilijid ilo mour eo juon, bōtaab [iaio ippān doon in] enaaj ripālele kōn aiboojoj indeeo. (lale D&C 130:2).