From Wanem Yumi Nidim Buk blong Momon
Pikja i kam long Braean Bij; oli tekem wetem vidio © 2001 IRI
Sam pipol i save askem yu from wanem yumi nidim Buk blong Momon taem we yumi gat Baebol finis. Wanem i tru, Jisas Kraes i bin testifae se samting ia bae i hapen (luk long 2 Nifae 29:3). I gat plante risen from wanem Buk blong Momon i impoten long dei blong yumi (eksampol, luk long 2 Nifae 29:7–11). Hemia sam nomo long ol risen from wanem hem i impoten.
Wan Narafala Witnes blong Jisas Kraes
Ol skripja oli soem long yumi wan fasin blong yusum plante witnes blong stanemap trutok long Jos blong Kraes. Buk blong Momon i mekem nambatu witnes long Baebol olsem wan testemoni blong Kraes. Elda Mak E. Pitason (1900–84) blong Kworom blong Olgeta Twelef Aposol i bin talem wan taem, “Stamba risen we yumi gat Buk blong Momon hem i from long maot blong tu o tri witnes bae evri trutok i save kamaot. (Luk long Seken Korin 13:1.) Yumi gat Baebol; yumi gat tu Buk blong Momon. Tugeta tufala i mekem tu voes—tu buk blong skripja—we i kam long tu defren pipol blong bifo we i stap wanwan, tugeta i serem testemoni abaot tabu trutok ia blong Lod Jisas Kraes.”1 Presiden Esra Taf Benson (1899–1994) i bin ademap, “Yumi no mas fogetem se Lod Hemwan i givim Buk blong Momon olsem stamba witnes blong Hem.”2
Ful Gospel
Yumi save se “ol samting we i klia mo gudgudfala … oli bin tekemaot long” Baebol truaot long taem (1 Nifae 13:40 Buk blong Momon i kliarem doktrin blong Kraes mo i karem fulnes blong gospel i kam long wol bakegen (luk long 1 Nifae 13:38–41). Ekampol, Buk blong Momon i helpem yumi save se baptaes i mas hapen long fasin blong draonem man andanit long wota 3 Nifae 11:26) mo we ol smol pikinini oli no nid blong kasem baptaes (luk long Moronae 8:4–26).
I Stap long Medel blong Jos we I Kambak
Josef Smit i bin testifae se Buk blong Momon i “ki ston blong bilif long God blong yumi.”3 From yumi save finis hemia, hem i no wan mistek se Jos blong Jisas Kraes blong Ol Lata-dei Sent i bin oganaes long 6 Epril 1830 hemia 11 dei stret afta we Buk blong Momon i kamaot blong fastaem blong oli salem long pablik long 26 Maj 1830. Jos i no bin oganaes kasem taem we ki ston skrijpja blong hem i bin kamaot long ol memba blong hem.
Wan Blesing long Ol Laef blong Yumi
Abaot Buk blong Momon, Josef Smit i bin tijim se “wan man bae i kam moa klosap long God sapos hem i folem ol tijing blong hem, bitim eni narafala buk.”4 Hem i gat paoa blong jenisim ol laef—wetem blong yu mo olgeta we yu serem Buk blong Momon wetem olgeta. Presiden Henri B. Aering, Fas Kaonsela long Fas Presidensi, i bin testifae, “Paoa blong Buk blong Momon long fasin blong yu, long paoa mo strong tingting blong yu, blong stap wan witnes blong God i mas hapen. Doktrin mo ol gudfala eksampol insaed long buk ia, bae oli leftemap yu, oli lidim yu, mo mekem tingting blong yu i strong. … Taemyu stadi wetem prea long Buk blong Momon, bae i bildimap fet long God Papa, long Pikinini blong Hem we Hem i lavem, mo long gospel blong Hem. Bae i bildimap fet blong yu long ol profet blong God, blong bifo mo blong naoia. … I save tekem yu i kam kolosap long God bitim eni nara buk. I save jenisim wan laef blong kam moa gud.”5
Ol Sandei Lesen
Topik blong Manis ia: Apostasi mo Restoresen