Etke Jej Aikuji Bok in Mormon eo

Kōmeļeļe jen Bryan Beach; video capture eo © 2001 IRI

Jet armej remaron̄ kajjitōk ippam̧ etke jej aikuji Bok in Mormon eo n̄e ewōr ippād kadede Baibōļ eo. Ilo m̧ool, Jisōs Kraist eaar kam̧ool bwe menin enaaj kar waļo̧k (lale 2 Nipai 29:3). Elōn̄ un ko etke Bok in Mormon eo ej aorōk ilo tōre in ad (n̄an waanjon̄ak, lale 2 Nipai 29:7–11). Ijin rej jet iaan un ko etke ej aorōk.

Bar juon Kam̧ool kōn Jisōs Kraist

Jeje ko rekwojarjar rej kwaļo̧k n̄an kōj juon jon̄ak kōn kōjerbal ruo kam̧ool ko n̄an kajutak m̧ool eo ilo Kabun̄ eo an Kraist. Bok in Mormon ej kobaik tok kam̧ool eo kein karuo n̄an Baibōļ eo āinwōt juon naan in kam̧ool kōn Kraist. Elder Mark E. Petersen (1900–84) jen Doulul eo an Jon̄oulruo Rijilōk ro juon iien eaar ba, “Un leplep eo an wōr ippād Bok in Mormon eo ej bwe ilo lo̧n̄iin ruo ak jilu rikōnnaan renaaj kapen naan otemjej rikam̧ool ro aolep men ko rej ejaak. (Lale 2 Kor. 13:1.) Ewōr ippād Baibōļ eo, ewōr barāinwōt Bok in Mormon eo ippād. Rej ejake ruo ainikien ko—ruo bok in jeje ko rekwojarjar—jān ruo kumi in armej ro rejeno̧lo̧k jān doon, jim̧or kwaļo̧k naan in kam̧ool n̄an kwojarjar eo an Irooj Jisōs Kraist.”¹ Būreejtōn Ezra Taft Benson (1899–1994) eaar kakobaba, “Jej aikuj jab meļo̧kļo̧k bwe Irooj E make eaar letok Bok in Mormon eo āinwōt kam̧ool eo eļap An.”²

Tarlep in Ko̧jpeļ eo

Jejeļā bwe “men ko realikkar im reaorōk … kar bōk jān er” Baibōļ eo ilo aolepān tōre ko (1 Nipai 13:40). Bok in Mormon eo ej kalikkar katak eo an Kraist im ej bōktok tarlep in ko̧jpeļ eo n̄an laļ in bar juon alen (lale 1 Nipai 13:38–41). N̄an waanjon̄ak, Bok in Mormon eo ej jipan̄ kōj jeļā bwe peptaij aikuj kōm̧m̧an kōn tulo̧k (lale 3 Nipai 11:26) im bwe ajri ro reddik rejjab aikuj in peptaij (lale Moronai 8:4–26).

Ioļapļap n̄an Kabun̄ eo kar Kōjepļaaktok

Joseph Smith eaar kam̧ool bwe Bok in Mormon eo ej “dekā in jabōn em̧ n̄an tōmak eo ad.”³ Jān ad jeļā menin, ejjab āinwōt jide bwe Kabun̄ eo an Jisōs Kraist im Armej ro Rekwojarjar ilo Raan-ko Āliktata eaar ejaak ilo Eprōļ 6, 1830, 11 raan ālkin an Bok in Mormon eo kar jino wia kake n̄an jabdewōt ilo M̧aaj 26, 1830. Kabun̄ in eaar jab ejaak m̧ae iien dekā in jabōn em̧ an jeje ko rekwojarjar kar pād n̄an membōr ro an.

Juon Kōjeram̧m̧an ilo Mour ko Ad

Ikkijien Bok in Mormon eo, Joseph Smith eaar katakin bwe “juon armej enaaj epaakeļo̧k Anij jān an mour ekkar n̄an katak ko ie, jān jabdewōt bok ko jet.”⁴ Eaar juon kajoor n̄an ukōt mour ko—ekoba mour ko ami im ro kom̧wij kwaļo̧k Bok in Mormon ippāer. Būreejtōn Henry B. Eyring, Rikakpilōklōk eo Kein Kajuon ilo Būreejtōnji eo Kein Kajuon, eaar kam̧ool, “Tōprak eo an Bok in Mormon ilo m̧wil eo am̧, kajoor eo, im kōketak n̄an erom juon rikam̧ool n̄an Anij ej m̧ool. Katak eo im waanjon̄ak ko retiljek ilo bok jab in naaj ļōn̄aj, tōl, im kōketak eok. … Lukkuun jar ilo ekkatak kōn Bok in Mormon enaaj kalōk tōmak ilo Anij Jemen, ilo Nejin Jitōn bōro, im ko̧jpeļ eo An. Enaaj kalōk tōmak eo am̧ ilo rikanaan ro an Anij, etto im raan kein. … Emaron̄ kepaakļo̧k eok n̄an Anij jān jabdewōt bok ko jet. Emaron̄ ukōt juon mour n̄an em̧m̧anļo̧k.”⁵

Kakeememej ko

1. Mark E. Petersen, “Evidence of Things Not Seen,” Ensign, Māe 1978, 63.

2. The Teachings of Ezra Taft Benson (1988), 204.

3. Joseph Smith, ilo kadkad in n̄an Bok in Mormon.

4. Joseph Smith, ilo kadkad in n̄an Bok in Mormon.

5. Henry B. Eyring, “A Witness,” Liahona, Nob. 2011, 69–70.

Kam̧ool ko Ruo

“Baibōļ eo ej juon kam̧ool kōn Jisōs Kraist; Bok in Mormon eo ej bar juon. Etke kein kam̧ool in kein karuo ekanooj in aorōk? Waanjon̄ak in emaron̄ jipan̄: Ewōr jete lain ko rejim̧we komaron̄ in jin̄aik ilo juon jikin ioon juon m̧ōttan peba? Uwaak eo ejjeļo̧k jon̄an. Ium̧win jidik iien, ļōmņak bwe jikin eo ej jutak kōn Baibōļ eo im bwe buki in ļain ko rejim̧we kar pijaiki n̄an jikin eo ej jutak kōn ukook ko an Baibōļ eo im bwe kajjojo ukook ko rej jutak kōn kabun̄ ko roktak.

“Ta ej waļo̧k, mekarta, eļan̄n̄e ilo m̧ōttan peba eo ewōr juon jikin ej jutak kōn Bok in Mormon eo? Ewōr jete ļain ko rejim̧we komaron̄ pijaiki ikōtaan jikin kein ruo: Baibōļ eo im Bok in Mormon eo? Juon wōt. Juon wōt ukook in katak ko an Kraist ej pād wōt naan in kam̧ool eo an kam̧ool rein ruo.

“Bar juon alen Bok in Mormon eo ej jerbal āinwōt juon rikam̧ool ej kapen, kalikkar, kobaik katak ko kwaļo̧k katakin ilo Baibōļ eo.”

Elder Tad R. Callister jen Būreejtōnji eo an Jiljilimjuonn̄oul eo, “The Book of Mormon—a Book from God,” Liahona, Nob. 2011, 75.

Koba ilo Bwebwenato eo

Ilo aolepān Eprōļ kom̧ naaj ekkatak kōn Bun̄ Jān Tōmak eo im Jepļaaktok eo ilo doulul ko an priesthood ko ami im kūlaj ko ami an Doulul eo an Jiron̄ ro im Jabōt Jikuuļ (eļan̄n̄e ward ak branch eo ami ewōr an katak ko rekāāl ilo kajin eo ami). Waļoktok eo an Bok in Mormon eo eaar juon m̧ōttan Jepļaaktok eo eaorōk. Ālkin riiti ennaan in, ļōmņak kōn ekōjkan an mour eo am oktak kōnke ewōr ippam̧ Bok in Mormon eo. Komaron̄ jei en̄ajke ko am ilo jōōnōļ eo am̧ im ļōmņak in kwaļo̧ki ippān ro jet kōn kam̧ool ilo kapijuknen eo, ilo m̧ōn jar eo, ak ilo jikin bwebwento ko ilo intōrnet.

Katak ko an Jabōt

Unin Tōl eo an Allōn̄ In: Bun̄ Jān Tōmak eo im Jepļaaktok eo