Ko Hono ʻOmi ʻo e Palaimelí ki ʻApi
Te u Muimui ki he Palani ʻa e Tamai Hēvaní ʻaki ʻEku Papitaiso mo Hilifakinima
ʻE lava ke ke fakaʻaongaʻi e lēsoni mo e ʻekitivitī ko ʻení ke lahi ange ai hoʻo ʻilo ki he kaveinga ʻa e Palaimelí ki he māhina ní.
ʻOku fakamatala e Tohi ʻa Molomoná ki ha kulupu ʻo ha kakai naʻa nau fakataha mai ki ha vao ʻakau ʻoku ui ko Molomona. Naʻa nau fie fanongo ki hono malanga ʻaki ʻe ʻAlamā e ongoongolelei ʻo Sīsū Kalaisi. Hili hano akoʻi kinautolu ʻe ʻAlamā ʻi ha ngahi ʻaho lahi, naʻá ne fehuʻi kiate kinautolu pe ʻoku nau fie fai ha fuakava ke nau tauhi ki he ʻOtuá mo tauhi ʻEne ngaahi fekaú. Naʻá ne tala kiate kinautolu kapau te nau papitaiso, ʻe ʻiate kinautolu maʻu ai pē ʻa e Laumālie Māʻoniʻoní (vakai, Mōsaia 18:7-10).
Naʻe fiefia ʻa e kakaí ʻi heʻenau fanongo ki aí, “naʻa nau pasipasi honau nimá ʻi he fiefia” (Mōsaia 18:11). Naʻe papitaiso ʻe ʻAlamā ha kakai ʻe toko 200 nai ʻi he Ngaahi Vai ʻo Molomoná. Naʻe lau ʻe he kakai ko ʻení ʻa e vao ʻakau ʻo Molomoná ko ha feituʻu fakaʻofoʻofa, he ko e feituʻu ia naʻa nau ako ai ki he Fakamoʻuí pea nau papitaiso aí (vakai, Mōsaia 18:30).
Hangē ko e kakai ʻo ʻAlamaá, ʻoku tau fiefia ʻi heʻetau nofo ʻamanaki atu pe ko ʻetau manatu ki hotau papitaisó. Hangē ko e kakai ko iá, ko e taimi ʻoku tau papitaiso aí, ʻoku tau fai ai ha fuakava mo e ʻOtuá. ʻOku tau palōmesi ke tau tauhi ʻEne ngaahi fekaú mo tauhi kiate Ia. ʻOku tau toʻo kiate kitautolu ʻa e huafa ʻo Sīsū Kalaisí pea tau hoko ko e kau mēmipa ʻo Hono Siasí. Ko e taimi ʻoku hilifakinima ai kitautolú, ʻoku tau maʻu ai ʻa e meʻaʻofa fakaofo tatau mo ia naʻe maʻu ʻe he kakai ʻo ʻAlamaá, koeʻuhi ke ʻiate kitautolu maʻu pē ʻa e Laumālie Māʻoniʻoní, kapau te tau tauhi ʻa e ngahi fekau ʻa e ʻOtuá.
Tā fakatātaaʻi ʻe Dani Jones