Faleʻi ʻe ʻEletā Christofferson e Kāingalotu ʻi ʻAmelika Lotolotó
Ne talaange ʻe ʻEletā Toti D. Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ki he kāingalotu ʻo e Siteiki Panamā ʻAlaisaní ʻi he ʻaho 20 ʻo Sānuali 2013, ko e ngāue ʻa e Siasí ʻi he ʻaho ní ko hono teuteuʻi ha kakai te nau mateuteu ke tali mo tokoni ki he ʻEikí ʻi Heʻene hāʻele maí.
Ko e kaveinga ia ne toutou fakaongo atu ʻe ʻEletā Kulisitofasoni lolotonga ko ia ʻene ʻaʻahi ki ʻAmelika Lotoloto mei Sānuali ʻaho 11 ki he ʻaho 20 lolotonga ʻa ʻene lea ki ha ngaahi haʻofanga toʻu tupu, kau tāutaha kei talavou, kau faifekau, kau taki fakalotofonua, pea ki he kāingalotu ʻo e Siasí ʻi ha ngaahi fakatahaʻanga konifelenisi fakasiteiki.
Ne kau atu mo ʻEletā Kulisitofasoni ʻa hono uaifí, ʻa Kefi Kulisitofasoni, pea mo ʻEletā Lisiate J. Meini ʻo e Kau Palesitenisī ʻo e Kau Fitungofulú mo hono uaifí, ʻa Nanasi Meini. ʻI heʻene ʻaʻahí, naʻá ne ʻuluaki ʻalu ai ki Kosita Lika, hoko atu ki Kuatemala, pea fakaʻosí ki Panamā, ne kau fakataha atu mo ʻEletā Kulisitofasoni ʻi ha ngaahi feituʻu kehekehe mo e kau mēmipa ʻo e Kau Palesitenisī Fakaʻēliá: ʻEletā Sēmisi B. Mātino, ko e Palesitení; ʻEletā Kālosi H. ʻĀmato, ko e Tokoni ʻUluakí; pea mo ʻEletā Kēvini R. Tanikeni, ko e Tokoni Uá.
Ne toe folau atu foki mo ʻEletā Meini ki Honitūlasi mo Pelise ke ʻaʻahi ki he kau takí mo e kāingalotu ʻi aí.
Ne lea ʻa ʻEletā Kulisitofasoni ki ha kakai kei talavou ʻe lauingeau ne fakataha hake ki ha ngaahi konifelenisi Ki Hono Fakamālohia e Toʻu Tupú ʻi Kosita Lika mo Panamā; ki ha ngaahi kulupu ʻo ha kau faifekau ʻi Seni Hōsea ʻi Kosita Lika; Kuatemala Siti mo Panamā Siti; pea ki ha ngaahi kulupu tokolahi ʻo ha kau tāutaha kei talavou ʻi ha ngaahi fonua ʻe tolu; pea ki ha ngaahi fakatahaʻanga ʻo e kau taki lakanga fakataulaʻeikí mo e ngaahi houalotú.
Naʻá ne ʻaʻahi foki ki he palesiteni ʻo Kosita Lika mo Kuatemalá ke tokoni ki hono fakamālohia e ngaahi vā fetuʻutaki mo e ongo puleʻanga ko iá.
Ne poupouʻi ai ʻe ʻEletā Kulisitofasoni ʻa e toʻu tupu mo e kakai kei talavou ʻi Kosita Liká ke nau tauhi e ngaahi fekaú, ke manatuʻi ʻoku ʻafioʻi mo ʻofaʻi kinautolu ʻe he Tamai Hēvaní, ke lau ʻa e ngaahi folofolá he ʻaho kotoa pē pea fekumi ke maʻu e meʻa kotoa ʻe lava ke ʻoange ʻe he Laumālié lolotonga ʻenau laukongá.
Naʻá ne fai ha fakamoʻoni mālohi ʻo kau ki he Palōfita ko Siosefa Sāmitá pea mo Sīsū Kalaisi. Naʻá ne pehē, “ʻOku ou tuku ha tāpuaki kiate kimoutolu ke mou lava ʻo maʻu ʻa e fakamoʻoni tatau mo ia ʻoku ou fakahaaʻi atú.” Naʻá ne toe pehē, “ʻOku ʻi ai moʻoni ʻa [Sīsū Kalaisi]. ʻOku ou tuku he pooni ʻa ʻEne ngaahi tāpuakí.”
Naʻá ne fakamamafaʻi ʻi Kuatemala ʻa e mahuʻinga ʻo e fāmilí.
Naʻá ne pehē “ʻI hono faʻu ha fāmilí, ʻoku tau fakahoko ai ʻa ʻetau taumuʻa maʻongoʻonga taha ʻi he māmaní.”
Naʻá ne lea ʻo fakamoʻoni ki he toʻu tupu ʻi Panamaá ʻo pehē, “Ko e taki ʻo e Siasí ni ko hotau ʻEiki ko Sīsū Kalaisí. Ko ha taki Ia ʻoku kau atu pea ʻokú Ne ngāue longomoʻui ʻi hono tataki Hono Siasí.”
Ne hanga ʻe ha fakataha fakatakimuʻa ʻo e lakanga fakataulaʻeikí ʻo fakamamafaʻi e tokanga mo e ngāue ki he ngaahi ola ʻo e tokoni ʻi he lakanga fakataulaʻeikí, kae tautautefito ki he ului fakafoʻituituí kae ʻikai ko e tokanga ki he ngāué mo e femoʻuekiná.
Ne puleʻi ʻe ʻEletā Meini ha ngaahi fakataha kehekehe, kau ai ha fakataha ʻa e kakai lalahi kei talavoú pea pehē ki he kau faifekaú ʻi Pelise mo Honitūlasi, pea fai ha faleʻi mo ha tataki fakalaumālie ki ha toko lauingeau ʻi he ngaahi fonua ko ia ʻi ʻAmelika Lotolotó.
Ko e feʻiloaki ʻa ʻEletā D. Toti Kulisitofasoni mo ha finemui hili ha fakataha ʻi Panamā ʻi Sānuali.
Faitaaʻi ʻe James Dalrymple © IRI