Fiefia ‘i he Hisitōlia Fakafāmilí

Ako ʻi he faʻa lotu ʻa e fakamatala ko ʻení ʻo ka feʻunga ke fakahoko, pea aleaʻi ia mo e kau fafine ʻokú ke ʻaʻahi ki aí. Fakaʻaongaʻi ʻa e ngaahi fehuʻí ke tokoni atu ki hono fakamālohia ʻo e kau fafiné pea ʻai ke hoko ʻa e Fineʻofá ko ha konga longomoʻui ʻo hoʻo moʻuí. Ke maʻu ha fakamatala lahi ange, ʻalu ki he reliefsociety.lds.org.

ʻĪmisi

Sila ʻo e Fineʻofá

Tuí, Fāmilí, Fakafiemālié

Naʻe akoʻi ‘e ‘Eletā Lāsolo M. Nalesoni ‘o e Kōlomu ‘o e Kau ‘Aposetolo ‘e Toko Hongofulu Mā Uá ko e Laumālie ‘o ‘Ilaisiaá ko hano “fakahā ia ‘o hono fakamoʻoniʻi ‘e he Laumālie Māʻoniʻoní ‘a e natula fakalangi ‘o e fāmilí.”¹

‘I heʻetau hoko ko e kau mēmipa ‘o e Siasi ‘o Kalaisi kuo toe fakafoki maí, ‘oku ʻi ai hotau fatongia fakafuakava ke tau fekumi ki heʻetau ngaahi kuí pea fakahoko maʻanautolu ‘a e ngaahi ouau fakamoʻui ‘o e ongoongoleleí. He ‘ikai “fakahaohaoa ‘a kinautolu” (Hepelū 11:40), taʻe kau ai ‘a kitautolu, pea “ʻoku ‘ikai lava foki ke fakahaohaoaʻi ‘a kitautolu taʻe kau ai [‘a kinautolu]” (T&F 128:15).

‘Oku teuteuʻi kitautolu ʻe he ngāue hisitōlia fakafāmilí ki he ngaahi tāpuaki ‘o e moʻui taʻengatá pea tokoniʻi kitautolu ke fakatupulaki ‘etau tuí mo ‘etau māʻoniʻoni fakatāutahá. Ko e hisitōlia fakafāmilí ko ha konga mahuʻinga ia e misiona ʻo e Siasí, pea ‘okú ne fakafaingamālieʻi e ngāue ki hono fakamoʻui mo hakeakiʻi ‘o e kakai kotoa pē.

Naʻe pehē ‘e Palesiteni Poiti K. Peeka, ko e Palesiteni ‘o e Kōlomu ‘o e Kau ‘Aposetolo ‘e Toko Hongofulu Mā Uá: “Ko e taimi ‘oku tau fekumi ai ki heʻetau ngaahi kuí, ‘oku ‘ikai ke tau mahuʻingaʻia pē ‘i he ngaahi hingoá. … ʻOku hanga ‘e heʻetau mahuʻingaʻia aí ‘o fakatafoki hotau lotó ki heʻetau ngaahi tamaí—‘oku tau feinga leva ke tau ‘iloʻi kinautolu mo tokoni kiate kinautolu.”²

Mei he Folofolá

Malakai 4:5–6; 1 Kolinitō 15:29; T&F 124:28–36; 128:15

Mei Hotau Hisitōliá

Naʻe akoʻi ‘e he Palōfita ko Siosefa Sāmitá ‘o pehē, “Ko e fatongia maʻongoʻonga taha kuo tuku mai kiate kitautolu ‘e he ‘Otuá ko ʻetau fekumi ki hotau kau pekiá.”³ Te tau lava ‘o fakafofongaʻi ‘etau ngaahi kui kuo pekiá ‘i he temipalé pea fakahoko ‘a e ngaahi ouau ‘oku fie maʻu maʻanautolú.

Naʻe maʻu ‘e Seli Lenitolo ʻo Nāvū, ‘Ilinoisí, ‘a ia naʻe mate hono foha taʻu 14, ha fakafiemalie lahi ‘i he talaʻofa ‘o e ngaahi fāmili taʻengatá. Naʻá ne tohi ki hono kāingá ‘i he hili e papitaiso fakafofonga hono husepānití ki hona fohá, ‘o pehē: “Ko ha meʻa nāunauʻia moʻoni ia ‘oku tau … lava ke papitaiso maʻa [‘etau ngaahi kui] kuo pekiá pea fakamoʻui ‘a kinautolu ‘i he tokolahi taha te tau lava ke ‘iloʻi ai kinautolú.” Hili ia peá ne kole ki hono kāingá ke nau ‘omi kiate ia ‘a e ngaahi fakamatala ki heʻenau ngaahi kuí, peá ne pehē ange, “ʻOku ou fakaʻamu ke fai ‘a e meʻa kotoa pē te u lavá ke fakamoʻui ai [hotau fāmilí].”⁴