Ko Hono Fakamālohia ʻo e Fāmilí mo e Siasí ʻi he Lakanga Fakataulaʻeikí
‘E faitāpuekina e ngaahi mātuʻá, fāmilí mo e fakafoʻituituí ʻi heʻenau ako mo tālangaʻi e ngaahi pōpoaki fakalaumālie ko ʻení.
ʻOku mou manatuʻi nai e ngaahi talaʻofá ni? Mahalo kuo mou fanongo ai ʻi ha ngaahi vitiō ne hulu lolotonga ha fakataha alēlea, fakataha Sāpate nima pe lēsoni ʻa e Fineʻofá pe kōlomu ʻo e lakanga fakataulaʻeikí. Pe mahalo ne mou aleaʻi ia ʻi ha efiafi fakafāmili ʻi ʻapi. Ko e ngaahi talaʻofá ʻeni:
-
ʻE faaitaha e husepānití mo e uaifí.
-
ʻE hoko e tamaí mo e faʻeé ko ha takimuʻa fakalaumālie ʻoku lelei angé ki hona fāmilí.
-
ʻE mateuteu e toʻu tupú ke fakahoko mo tauhi e ngaahi fuakava toputapú pea mo tauhi ki he ʻEikí ʻi heʻenau hoko ko ha faifekau taimi kakato pea ʻi he toenga ʻenau moʻuí.
-
ʻE tokoniʻi e kāingalotu tāutahá, nau maʻu e ngaahi tāpuaki ʻo e lakanga fakataulaʻeikí ʻi honau ʻapí pea mo kau kakato ki hono langa e puleʻanga ʻo e ʻOtuá.
-
ʻE ngāue fakataha e ngaahi kōlomú mo e fakataha alēleá ke tokoniʻi e fānau ʻa e Tamai Hēvaní.
-
ʻE fakamālohia e Siasí.
Naʻe fai e ngaahi talaʻofa ko iá ʻi Māʻasi ʻi hono tuku mai ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻi he foʻi DVD ne ui Ko Hono Fakamālohia ʻo e Fāmilí mo e Siasí ʻi he Lakanga Fakataulaʻeikí. Naʻe fakaafeʻi ai e fakataha alēlea ʻa e uōtí mo e siteikí ke nau fealēleaʻaki ki he founga hono fakaʻaongaʻi iá. ʻI he taimi tatau pē, naʻe fakaafeʻi ai e ngaahi fāmilí ke nau mamata he ngaahi foʻi vitioó ʻi he http://wwlt.lds.org kae pehē ki he ngaahi konga nounou angé, ʻi hono maʻu atú. Naʻe poupouʻi e kau takí mo e kau faiakó ke nau ʻoange ha faingamālie ʻi he ngaahi fakatahá mo e kalasí ke mamataʻi ai ʻe he kau mēmipá ʻa e vitioó pea nau vahevahe ʻenau ngaahi ongó, taukeí mo e fakamoʻoni ʻo fakatatau mo e ueʻi ʻa e Laumālié. Naʻe fakaafeʻi mo e ngaahi mātuʻá ke nau fai e meʻa tatau pē ʻi ʻapi ʻi honau ngaahi fāmilí.
ʻOku pehē ʻe he konga “Founga Hono Fakaʻaongaʻi ʻo e Akó ni,” ʻe “hanga ʻe he Laumālie Māʻoniʻoní ʻo akoʻi e kau mēmipá ki he founga ʻe lava ke fakamālohia ai kinautolu ʻe he lakanga fakataulaʻeikí ʻi honau ngaahi ngafá mo e fatongia.”
Tālanga Longomoʻui
Neongo naʻe tukuatu e ngaahi pōpoakí he māhina ʻe tolu kuohilí, ka ʻoku kei hokohoko atu pē he ʻahó ni ʻa e akó mo hono aleaʻí—pea mo e ngaahi tāpuaki ʻoku ō fakataha mo iá, pea ʻoku hanga ʻe he founga foʻou ko ʻení ʻo ʻoatu ha tafaʻaki foʻou ki he natula hono fai ʻo e akó ʻi he Siasí. ʻOku ʻikai hangē ʻeni ia ko e ngaahi ako kimuʻá, ʻa ia naʻe meimei ke fakamafola fakatāutaha atu pē ki he kau taki ʻo e uōtí mo e siteikí, he ʻoku fakataumuʻa ʻeni ia ke fai hokohoko pē. Ko e ʻuhinga ia ʻoku fakahū ai ki he ʻinitanetí ʻa e ngaahi foʻi vitioó ki he wwlt.lds.org. ʻOku ʻi ai foki mo e uepisaiti meimei tatau pē ko e, leadershiplibrary.lds.org, ʻoku ʻi ai ha ngaahi fehokotakiʻanga vitiō ai kae pehē ki ha maʻuʻanga tokoni makehe ke tokoni ki he ngaahi fāmilí, fakafoʻituituí, kōlomú, kalasí mo e ngaahi fakataha alēleá ke fakaloloto ʻenau mahinó mo fakaʻaongaʻi e meʻa ʻoku nau akó.
ʻOku fakatefito e foʻi vitiō takitaha ʻi ha tafaʻaki kehekehe ʻo e lakanga fakataulaʻeikí. Kuo hanga ʻe he kau mēmipa ‘o e Kau Palesitenisī ʻUluakí mo e Kōlomu ‘o e Kau ‘Aposetolo ‘e Toko Hongofulu Mā Uá, mo e Kau Taki Māʻolunga mo e kau ʻōfisa māʻolunga kehé, ‘o ʻomi ha fakahinohino fakalaumālie fekauʻaki mo e:
-
Founga ‘e maʻu ai ‘e he fāmilí ha ivi mo ha melino tuʻunga ‘i he mālohi ‘o e lakanga fakataulaʻeikí.
-
Founga ki hono tokoniʻi ‘o e fāmili kotoa pē ke nau aʻusia e ngaahi tāpuaki ‘o e lakanga fakataulaʻeikí.
-
Founga ‘oku fakamālohia ai e ‘apí mo e fāmilí ‘e kinautolu ‘oku nau maʻu ‘a e ngaahi kī ‘o e lakanga fakataulaʻeikí.
-
Anga hono fakahoko e ngāué ‘i he founga ‘oku faka-Kalaisí.
-
Founga ki hono ʻohake ‘o e fānaú ‘i he māmá mo e moʻoní.
Ko e konga lahi ʻo e ngaahi tefitoʻi moʻoni ʻoku hā ʻi he Ko Hono Fakamālohia ʻo e Fāmilí mo e Siasí ʻi he Lakanga Fakataulaʻeikí ʻoku toe akoʻi atu pē foki ia ʻi he Tohi Tuʻutuʻuni Fika 2: Ko Hono Puleʻi ʻo e Siasí, ko ia ʻe ala tokoni hano vakaiʻi ʻo e fakamatala mei he tohi tuʻutuʻuní, lolotonga hono akó mo aleaʻí. ʻE tokoni lahi foki mo hano toe fakamanatu ʻo e “Ko e Fāmilí: Ko ha Fanongonongo ki Māmani.”
Naʻe fakamatalaʻi ʻe Palesiteni Henelī B. ʻAealingi, Tokoni ʻUluaki ʻi he Kau Palesitenisī ʻUluakí, ʻo pehē “ʻoku fakataumuʻa e ngaahi pōpoaki ʻi he Ko Hono Fakamālohia ʻo e Fāmilí mo e Siasí ʻi he Lakanga Fakataulaʻeikí ke tokoniʻi kitautolu ke tau ako ʻi he mālohi ʻo e Laumālie Māʻoniʻoní, ki he founga ʻoku finangalo ʻa e Tamai Hēvaní ke tau tokoni aí, tautautefito ki he ngaahi fāmilí.” Ko e konga mālohi taha ia ʻo e akó—ʻo ʻikai ko e meʻa ʻoku leaʻaki he vitioó, ka ko e meʻa ko ia ʻoku akoʻi mai ʻe he Laumālie Māʻoniʻoní ʻi heʻetau fakalaulauloto mo aleaʻi e ngaahi tefitoʻi moʻoni kuo akoʻí.
Feituʻu ke Vahevahe Aí
ʻOku totonu ke maʻu ʻe he kau taki, kāingalotu mo e fāmili kotoa pē ha faingamālie ke fanongo mo aleaʻi ai e pōpoaki ʻi he Ko Hono Fakamālohia ʻo e Fāmilí mo e Siasí ʻi he Lakanga Fakataulaʻeikí, ʻo tatau pē ʻi he DVD pe fakahangatonu mei he ʻinitanetí.
ʻOku hanga ʻe he ngaahi pōpoakí ʻo faitāpuekina e ngaahi fāmilí ʻi heʻenau fakaʻaongaʻi ia ʻi he efiafi fakafāmilí mo e ngaahi meʻa fakafāmili ʻoku faí. He ko e moʻoni, ko e husepānití mo e uaifí ko ha ongo hoa ngāue tuʻunga tatau kinaua ʻi hono tataki ʻena fānaú. Naʻe fakamatalaʻi ʻe ʻEletā Lāsolo M. Nalesoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he konga ʻoku ui ko e “Ko ʻEne Ngāué ʻEni,” ʻo pehē, “Mahalo naʻa ʻoku ʻi ai ha tamai pe faʻē te ne fie akoʻi ha tefitoʻi moʻoni pea ʻe lava ke ne fakaʻaongaʻi e maʻuʻanga tokoni ko ʻení ʻi heʻena feinga ke tokoniʻi hona fohá pe ʻofefiné.” Naʻe toe fakamahino mai foki ʻe ʻEletā Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá “neongo pe ko e hā hano mahuʻinga ʻo ha akoʻi ʻoku fai ʻe ha ʻetivaisa ʻo e lakanga fakataulaʻeikí pe Kau Finemuí ʻi he Siasí—pea ʻoku mau fakatauange pē ʻoku tokoni ia—ka he ʻikai lava ke lelei ange ia ʻi he tā sīpinga ʻa e faʻeé pe ko e tamaí.”
ʻI he polokalama ʻa e Siasí, ʻe lava ke fakaʻaongaʻi e ngaahi pōpoakí ia ʻi he fakataha ʻa e kau palesitenisī fakasiteikí pe kau pīsopelikí; fakataha alēlea ʻa e siteikí mo e uōtí; fakataha komiti pule ʻa e lakanga fakataulaʻeikí; fakataha ako ʻa e houalotú ʻi he siteikí; fakataha ʻa e kau palesitenisií, ʻo kau ai e kau palesitenisī ʻo e kōlomu Lakanga Taulaʻeiki Faka-ʻĒloné mo e kau palesitenisī fakakalasi ʻa e Kau Finemuí; fakataha Sāpate nima ʻoku fakatahaʻi ai e lakanga fakataulaʻeikí mo e Fineʻofá; fakataha fakakōlomu he Sāpaté pea mo e ngaahi kalasi ʻa e houalotú; fakataha konifelenisi fakasiteiki pe fakavahefonuá (ʻikai ʻi he fakataha lahi ʻo e Sāpaté); pea mo e ngaahi fakataha ʻo e konifelenisi fakauōtí pe fakakoló (ʻikai ʻi he houalotu sākalamēnití).
ʻE lava ke kau he meʻa ʻoku aleaʻí ʻa e founga ke fakamālohia ai e toʻu tupú pea mo e kau tāutaha kei talavoú. ʻE lava ke vahe ʻe he kau takí e ngāue ke faí ʻo fakatatau mo e ngaahi alēlea ko ia oku faí pea muimuiʻi maʻu pē e ngaahi ngāue ne vahe ke faí ʻi he ngaahi fakataha alēleá.
Ko e taumuʻa ʻo hono ako mo aleaʻi e ngaahi pōpoaki ko ʻení ke tokoni ke fakamālohia e tui ʻa e fakafoʻituituí mo e ngaahi fāmilí, fakatupulaki ʻenau fakamoʻoní pea mo e toe fakaloloto ange ʻenau ului ki he ongoongolelei ʻo Sīsū Kalaisí.
Naʻe pehē ʻe Palesiteni ʻAealingi, “Ko e meʻa pē ʻoku fie maʻu ki heʻetau nofo malú mo ʻetau lavameʻá, ko hono ʻai ke fenāpasi hotau lotó mo e finangalo ʻo e ʻOtuá pea mo Hono mālohí. Ko e ngaahi pōpoaki ko ʻení ko ha “fakahinohino pē mo ha fakalotolahi ke fai e fenāpasi ko iá pea tau kau fakataha ai mo e niʻihi kehé.”
ʻOku ʻomi ʻi he konga “Fatongia Tauhi” ha ngaahi sīpinga fisifisimuʻa ʻo e ʻaʻahi ʻa e kau taki lakanga fakataulaʻeikí ki he fakafoʻituituí mo e ngaahi fāmilí, pea fakahaaʻi ai mo e founga ʻe lava ʻe he ngaahi ʻaʻahi peheé ʻo tokoni ki hono fakahaofi ʻo e kāingalotu ʻoku māmālohí.
Naʻe pehē ʻe he Pīsope Pulé ko Keuli E. Sitīvenisoni ʻi he filimi “Ko ʻEne Ngāué ʻEni, “ʻI heʻetau fakakaukau ki he tukupā ʻoku tau maʻu ke tokoniʻi ʻa kinautolu vaivaí, hiki hake ʻa e ngaahi nima ʻoku tautau ki laló pea mo e fakamālohia ʻa e ngaahi tui ʻoku vaivaí, he ʻikai ha founga lelei ange ia ʻe lava ke tau fai ai ia ka ko e ʻaʻahi tonu mo fakatāutaha ki ha ʻapi ʻo ha taha, ʻo fai ʻa e fatongia fakatauhi pea mo e sīpinga naʻe fai ʻe Sīsū Kalaisí. ʻOku ou tui ʻe toki hoko moʻoni mai ʻa hono ʻaongá ʻi heʻetau tālangaʻi mo ako pea tau laka atu ʻo fakahokó.”
Ivi mo e Nonga
ʻI he hokohoko atu hono fai e akó ni ʻi he Siasí, ʻe maʻu ai ʻe he kāingalotú ha ngaahi tāpuaki ʻi heʻenau fakahoko e ngaahi tefitoʻi moʻoni ʻo e ongoongoleleí kuo akoʻí. Naʻe pehē ʻe ʻEletā Pālati, “ʻE faitāpuekina e ngaahi foha mo e ʻofefine kotoa pē ʻo e ʻOtuá ʻo kapau te nau muimui ki he ngaahi akonaki mo e sīpinga ʻoku hā he akó ni.”
ʻOku tokoniʻi e niʻihi kehé ʻe he husepānití mo e uaifí, tamaí mo e faʻeé, toʻu tupú, mēmipa tāutahá, ngaahi kōlomú mo e fakataha alēleá ʻo fakafou he lakanga fakataulaʻeikí, kae pehē ki hono kumi ʻo ha tataki fakalaumālie ʻi heʻenau muimui ki he sīpinga ʻa Sīsū Kalaisí. ʻI heʻenau hokohoko atu hono fai iá, ʻe aʻusia leva e ngaahi talaʻofa ne fai ʻi he Ko Hono Fakamālohia ʻo e Fāmilí mo e Siasí ʻi he Lakanga Fakataulaʻeikí. ʻE mamata e kāingalotú ki hono fakahoko e talaʻofa ʻa Palesiteni ʻAealingi mei he konga fakaʻosi ʻo e vitioó: neongo e ngaahi taimi fakapoʻulí, ʻe lava ke “mālohi mo nonga pē hotau ngaahi fāmilí.”
TĀ FAKATĀTAAʻI ʻO E LAʻI TAÁ ʻE CODY BELL MO CRAIG DIAMOND
Tā valivali ʻo e LAʻI taá ʻE Welden c. Andersen
ʻOku lava ke vahevahe ʻa e ngaahi pōpoaki ʻoku akoʻi ʻi he Ko Hono Fakamālohia ʻo e Fāmilí mo e Siasí ʻi he Lakanga Fakataulaʻeikí ʻi ha ngaahi feituʻu kehekehe hangē ko e fakataha alēlea fakasiteikí mo e fakauōtí.