Миссурид тохиолдсон хүнд сорилтууд

Женнифер Мадди

Сүмийн түүхэн дэх нэг чухал газрыг бидэнтэй хамт судална уу!

Огайогийн Көртландаас Миссурийн Индепенденс рүү хийсэн аялал Иосеф Смитийн хувьд урт удаан, хүнд бэрх байлаа. Тэр морин тэргээр, завиар, эцэст нь өртөөний сүйх тэргээр явжээ. Сүүлчийн 402 километр газрыг явган явсан гээд бод л доо! Гэвч Их Эзэн түүнд Сионыг байгуулахын тулд Миссури рүү яв гэж хэлсэн учраас Иосеф Смит дуулгавартай дагасан юм.

Сүмийн бусад гишүүд Миссурид 1831 онд ирж эхэлсэн юм. Тэд газар хагалж, орон гэрээ барин, тариа тарьж, ургацаа хураан авчээ.

Сүмийн улам олон гишүүд Миссурийн Индепенденсэд ирэхэд тэнд өмнө нь амьдарч байсан зарим хүмүүс тэдэнд сэжиглэнгүй хандаж, уурлах болжээ. Танхайрагч бүлгүүд Гэгээнтнүүдийн гэр орныг дайрч, тэднийг тэндээс явахыг шаардах болжээ.

Либерти шорон

1838 оны өвөл Иосеф Смит Сүмийн өөр таван удирдагчийн хамт хилс хэргийн учир баривчлагдаж, Либерти шоронд хоригджээ. Уг шорон харанхуй, бохир, маш хүйтэн байснаас гадна хоригдлуудад дулаан хөнжил байсангүй, тэднийг сайн хооллодоггүй байв. Либерти шорон зузаан чулуун ханатай байв. Дээд өрөөнд шоронгийн хуяг болон түүний гэр бүл амьдардаг бол доод өрөө нь хоригдлуудын “гяндан” байв. Зөвхөн доод давхар л орох, гарах ганцхан хаалгатай байжээ.

Бошиглогчийг шоронд байхад Их Эзэн түүнд хандан, “Хүний хийж чадах юмнаас бүү эмээ, учир нь Бурхан чамтай үүрд мөн мөнхөд хамт байх болно” (С ба Г 122:9) гэжээ.

Сүм уг шоронгийн зарим хэсгийг дахин барьж, зарим чулууг сэргээн, дэргэд нь зочдын төв барьсан билээ. Бурханы бошиглогч шоронд байхдаа тайтгаруулагч олон илчлэлт хүлээн авсан газрыг үзэхээр өнөөдөр олон зочид ирж байна.