O Mea Laiti ma Faatauvaa
Ia tatou aapa atu i isi ma le faatuatua ma le alofa.
Ou uso e ma tuafafine pele, i nai vaiaso talu ai sa ou i ai i le nofoaga autu e aoao ai faifeautalai i le Aai o Mekisiko e faasoa atu se savali i faifeautalai. Sa ma taunuu ma lou toalua ma le iloaina o nai itula ua ma vave ai. A o ma matamata ai i togalaau matagofie ma auala mama ma tausia lelei o le NAF, sa faigofie lo ma iloaina o le fiafia sa faaalia i fofoga o le faitau selau o alii ma tamaitai faifeautalai talavou, a o taulai atu faifeautalai taitoatasi i le mauaina o tomai o gagana fou ma aoaoina ia talisapaia atili ona faamoemoega o se faifeautalai.
A o ou faaaluina se taimi e matauina lelei ai lenei vaaiga matagofie , sa ou mafaufau i upu a Alema ina ua ia poloaiina lona atalii o Helamana ia tausia se talafaasolopito a ona tagata e avea ma vaega o faamaumauga lea sa atofa atu ia te ia ma tausia nei faamaumauga uma i le paia ina ia i ai se aso o le a latou o atu ai i atunuu, ma ituaiga, ma gagana, ma nuu uma.
Ona tau atu lea e Alema ia te ia:
“O lenei atonu e te manatu ua ou valea i lenei mea; ae faauta ou te fai atu ia te oe, o mea laiti ma faatauvaa e faataunuu ai mea tetele; ma o auala laiti i le tele o taimi, e faamaasiasia ai e popoto.
“Ma e galue le Alii le Atua i auala e faataunuu ai ona faamoemoega tetele ma faavavau; ma o auala laiti lava e faamaasiasi ai e le Alii e popoto, ma aumai ai le olataga o agaga e toatele” (Alema 37:6–7).
O le taumamaina ma le talavou o o tatou faifeautalai ua avea ma faataitaiga lelei o le ala a le Alii—ma o i latou o e lotomaualalo e mafai ona “valaaulia isi e o mai ia Iesu Keriso e ala i le fesoasoani atu ia i latou ia maua le talalelei toefuataiina e ala i le faatuatua ia Iesu Keriso ma Lana Togiola, salamo, papatisoga, mauaina o le meaalofa o le Agaga Paia, ma tumau e oo i le iuga” (Tala’i La’u Talalelei: O Se Taiala mo le Galuega Faafaifeautalai [2004], 1).
I le avea ai ma tagata o le Ekalesia, ua mafai e i tatou, e ala i mea laiti ma faatauvaa, ona “[faatalitonu] le toatele i le sese o o latou ala” ma fesoasoani e aumai “i latou i le malamalama o lo latou Atua mo le olataga o o latou agaga” (Alema 37:8).
I se tasi taimi sa matou o ai ma se peresitene o se siteki ma le epikopo e asiasi i se tagata ua le o toe toaga mai. Sa matou aoaoina o ia, i se auala faigofie lava, e uiga i faamanuiaga o le Aso Sapati. Sa matou faailoa atu ia te ia lo matou alolofa faamaoni. Sa ia tali mai, “Pau lava le mea sa ou manaomia o le i ai o se tasi e sau ma tuu mai ia te au se abrazo,” po o se opo. Sa vave ona ou tu i luga ma opoina o ia. O le aso na sosoo ai o le Aso Sa. Sa malaga mai le uso lea i le sauniga faamanatuga ma lona aiga atoa.
A o faia se asiasiga faafaiaoga asiasi, sa tau atu e Mareta, o se tasi o la matou uarota, i lo’u toalua ma lana soa ia aua lava nei toe foi atu. Sa ia filifili e le toe sau i le lotu. Sa fai atu se tasi o faiaoga asiasi ia Mareta pe mafai ona latou lagiina faatasi se viiga i lena asiasiga mo le taimi mulimuli, ma sa ia malie i ai. A o latou pepese, sa tupu se mea faapitoa. Sa faasolosolo ona amata faatumulia le potu i le Agaga. Sa latou taufai lagonaina uma. Sa amata ona faamalūlūina le loto o Mareta. Faatasi ai ma ona fofoga sa faatumulia i loimata, sa ia faailoa atu ai i ana faiaoga asiasi lagona o lona loto. I lena taimi, sa ia iloaina ai e moni le talalelei. Ua ia faafetai nei i ana faiaoga asiasi ma faailoaina se manao ia la toe foi atu. E amata mai i lena aso, na te talileleia lava i laua ma le olioli.
Sa amata ona auai atu ia Mareta ma lana tama teine laitiiti i le lotu. Mo le tele o tausaga sa la auai ai e le aunoa, faatasi ai ma le le aveesea o le faamoemoe o Mareta ia mafai e lona toalua i se taimi ona filifili e faatasi ma i laua. Mulimuli ane sa oo mai le aso na pai atu ai le Alii i lona loto, ma sa amata ai ona ia auai atu ma i laua, e lei pine ae vave foi ona faia faapena e le isi o la afafine. Sa amata ona lagonaina e lenei aiga le olioli moni e oo mai mai le i ai o faamanuiaga o le talalelei i lo latou aiga. Talu mai lena taimi sa galue ai ma le faamaoni Mareta o le peresitene o le Aualofa i la matou uarota, ma sa auauna lelei lona toalua i nisi o valaauga i le siteki. Sa amataina nei mea uma i le usuina o se viiga, o se mea laitiiti ma faatauvaa sa ootia ai le loto o Mareta.
O Naamanu o se taitaiau o le autau a le tupu o Suria, o se alii faamamaluina, o se alii malosi ma lototoa, ae o ia foi o se lepela (tagai 2 Tupu 5:1). Ina ua maea taumafaiga le faamanuiaina i le mauaina o se fofo mai le tupu o Isaraelu mo lona lepela, sa alu atu loa Naamanu i le fale o Elisaia, le perofeta. Sa auina atu e Elisaia se avefeau ia te ia, ua faapea atu:
“Ina alu ia ina taele faafitu i Ioritana, ona toe foi mai ai lea o lou tino tuai ia te oe, ona e mama ai lea.
“Ona ita lava lea o Naamanu ma alu ese, ua faapea ane, Faauta, na ou faapea, e sau lava ia i fafo, ma tu mai, ma valaau i le suafa o Ieova lona Atua, ma talo lona lima i le mea ua i ai le ma’i e faatea ai i le lepela. …
“A ua faalatalata ane ana auauna, ua fai ane ia te ia, ua faapea ane, Sena e, ana fai atu e le perofeta se mea tele ia te oe, e te le faia ea? e te le faia ea ina ua ia fai atu ia te oe, E taele, e te mama ai?
“Ona alu ifo ai lea o ia, ua fufui faafitu i Ioritana, e tusa ma le upu a le tagata o le Atua: ona foi mai ai lea o lona tino tuai pei o le tino o le tamaitiiti, ua mama foi ia” (2 Tupu 5:10–11, 13–14).
Ua valaauliaina i tatou e lo tatou perofeta, Peresitene Thomas S. Monson, ia o atu ma laveai mai o tatou uso ma tuafafine. Sa ia saunoa: “Ua manaomia e le lalolagi la outou fesoasoani. Ua i ai vae ia faamalosia, lima e uu mai, mafaufau e faalototeleina, loto e musuiaina ma agaga e laveai mai. O loo faatalitali mai faamanuiaga e faavavau mo outou” (“Ia Laveaiina,” Liahona, Iulai 2001, 57).
Ou te molimau atu o le toatele o i latou o e manaomia lo tatou fesoasoani o loo faatalitali mai mo i tatou. Ua latou sauni mai mo o latou uso ma tuafafine faatuatua e aapa atu ia i latou ma laveai i latou e ala i ni auala laiti ma le faatauvaa. Ua ou faaaluina patino le tele o itula e asiasi ai i tagata o le Ekalesia ua le o toe toaaga o o latou loto ua uma ona faamalūlūina e le Alii, o e ua saunia nei e mauaina a tatou molimau ma o tatou faailoaga ma le faamaoni o le alofa. Pe a tatou aapa atu ma valaaulia i latou, o le a latou toe foi mai i le Ekalesia e aunoa ma le faatuai.
Ia tatou aapa atu i isi ma le faatuatua ma le alofa. Ia tatou manatua le folafolaga a le Alii:
“Ma afai e faapea lua te galulue i o oulua aso uma i le alagaina o le salamo i lenei nuu, ma aumai, nao se agaga e toatasi ia te a’u, e matua tele lava lo oulua olioli faatasi ma ia i le malo o lo’u Tama!
“Ma o lenei, afai o le a tele lo oulua olioli faatasi ma se agaga e toatasi na oulua aumai ia te a’u i le malo o lo’u Tama, e matua tele atu lo oulua olioli pe afai lua te aumai ni agaga e toatele ia te au!” (MF&F 18:15–16).
Ou te molimau atu i le alofa o le Alii i Ana fanau uma. Ou te iloa o loo Ia soifua ma o Ia o lo tatou Togiola. I le suafa o Iesu Keriso, amene.