O Le Malosi e Tutumau Ai
O lo tatou gafatia e tumau seia oo i le iuga i le amiotonu, o le a faatatau tonu lava i le malosi o a tatou molimau ma le loloto o lo tatou liua.
O taeao uma pe a tatou alausu a’e, tatou te feagai ai ma se aso fou e tumu i luitau o le olaga. O nei luitau e tele ituaiga e oo mai ai: luitau faaletino, faigata o mea tautupe, faafitauli i mafutaga, tofotofoga faalelagona, faapea foi ma tauiviga ma le faatuatua o se tagata.
O le tele o luitau tatou te feagai i le olaga e mafai ona foiaina ma faatoilaloina; ae peitai, o isi e ono faigata ona malamalama i ai ma e le faigofie ona faatoilalo, ma o le a i ai pea ia i tatou seia oo ina tatou laasia le isi olaga. A o tatou onosaia mo se taimi le tumau ia luitau e mafai ona tatou foiaina, ma a o faaauau ona tatou onosaia luitau e le mafai ona tatou foiaina, e taua ona manatua, o le malosiaga faaleagaga tatou te atiaeina, o le a fesoasoani ia i tatou e onosaia ai ma le manuia ia luitau uma tatou te feagai ai i le olaga.
Uso e ma tuafafine, ua i ai so tatou Tama Faalelagi agaalofa, o lē ua mamanuina lo tatou ola ai i le lalolagi, ina ia mafai e i tatou taitoatasi ona aoaoina lesona e manaomia ona tatou aoaoina ia agavaa ai mo le ola e faavavau i Lona afioaga.
O se tala mai le soifuaga o le Perofeta o Iosefa Samita, ua faaalia ai lenei mataupu faavae. Na faafalepuipuiina le Perofeta ma nisi o ana soa i Liperate, Misuri, mo ni masina. A o mafatia ai i le falepuipui, sa aioi atu le Perofeta o Iosefa i le Alii i le tatalo faamaualalo ina ia mafai ona faamafanafanaina le Au Paia mai o latou puapuaga sa i ai i le taimi lea. Sa tali mai le Alii e ala i le aoaoina o le Perofeta o Iosefa, ma i tatou uma lava, e faapea, o luitau tatou te feagai, afai e onosaia lelei, o le a mo lo tatou lava manuia atali. O le tali lenei a le Alii i le aioiga a Iosefa:
“Lo’u atalii e, ia filemu lou agaga; o lou tiga ma ou puapuaga o le a nao sina minute laitiiti;
“Ma ona oo lea, afai e te talitalia lelei, o le a faaeaina oe e le Atua i luga.”1
Ua fuafuaina e le Tama Faalelagi la tatou malaga i le olaga ia avea o se suega o o tatou uiga faaletagata. Tatou te oo uma i aafiaga lelei ma aafiaga leaga ma ua faapea foi ona tuuina mai le faitalia e filifili ai mo i tatou lava po o le fea le ala o le a tatou uia. E pei ona aoao mai le perofeta anamua o le Tusi a Mamona o Samuelu, “Ua outou saoloto; ua faatagaina outou tou te fai mo outou lava; aua faauta, ua tuuina mai e le Atua ia te outou se malamalama ma ua ia faia outou ia outou saoloto.”2
Ua silafia lelei foi e le Tama Faalelagi ona o lo tatou olaga i la le tino, o le a tatou le faia ai i taimi uma ni filifiliga sa’o pe amiotonu. Ona tatou te le atoatoa ma ona tatou te faia mea sese, tatou te manaomia ai le fesoasoani i le toe foi atu i Lona afioaga. O le fesoasoani e alagatatau ua tuuina mai e ala i aoaoga, faataitaiga, ma le taulaga togiola a Iesu Keriso. O le taulaga togiola a le Faaola e mafai ai ona faaolaina ma faaeaina i tatou i le lumanai e ala i le mataupu faavae o le salamo. Afai tatou te salamo moni ma faamaoni, e mafai ona fesoasoani le Togiola ia i tatou ia mama, sui o tatou natura, ma onosaia ai ma le manuia o tatou luitau.
O le tutumau o se mataupu faavae taua e maua i totonu o le aoaoga faavae a Iesu Keriso. E taua ona o le tulaga lelei o lo tatou lumanai e faavavau e faatatau lea i lo tatou gafatia e tutumau ai i le amiotonu.
I le 2 Nifae 31 o loo aoao mai ai i tatou e le perofeta o Nifae e faapea, a uma ona tatou maua ia sauniga faaola o le papatisoga lea foi na maua e Iesu Keriso, ona maua lea o le meaalofa o le Agaga Paia, e tatau ona tatou “fetaomi atu i luma, ma taumamafa fiafia i le afioga a Keriso, ma tumau e oo i le iuga, [ma] faauta, ua faapea ona fetalai mai o le Tama: O le a [tatou] maua le ola e faavavau.”3
O le mea lea, ina ia maua le meaalofa silisili o meaalofa uma a lo tatou Tama Faalelagi, o le ola e faavavau lea, e tatau ona tatou faamaeaina ia galuega talafeagai mo sauniga ona faaauau pea lea ona tausia feagaiga e faatatau i ai. I se isi faaupuga e tatau ona tatou tutumau lelei.
O lo tatou gafatia e tumau seia oo i le iuga i le amiotonu, o le a faatatau tonu lava i le malosi o a tatou molimau ma le loloto o lo tatou liua. A malolosi a tatou molimau ma tatou liua moni i le talalelei a Iesu Keriso, o le a musuia a tatou filifiliga e le Agaga Paia, o le a totonugalemu ia Keriso, ma o le a latou lagolagoina lo tatou naunau e tutumau i le amiotonu. Afai e vaivai a tatou molimau ma papa’u lo tatou liua, o le a sili atu le tulaga lamatia o le a faatosinaina ai i tatou e faiga masani sese a le lalolagi e fai ni filifiliga le lelei.
Ou te fia faasoa atu se aafiaga e faailoa ai le taumafaiga e manaomia ina ia tutumau ai faaletino ona faatusatusa lea i le taumafaiga e manaomia e tutumau ai faaleagaga. I lo’u foi mai mai la’u misiona, sa ou maua le avanoa e taalo pasiketipolo ai mo se faiaoga ma se tusitala faaaloalogia i se kolisi i Kalefonia. O le faiaoga lenei sa matuai naunau lava i ana tama taaalo ia malolosi faaletino a o le’i amataina le vaitau o le pasiketipolo. O se tasi o mea e muai manaomia a o le’i mafai e se tasi o i matou ona papai i se polo pasiketi i luga o le malae e koleni ai, o le tamoe malosi lea i se auala tamoe e i tua i mauga e latalata i le aoga ia itiiti ifo ma le taimi patino faatapulaaina. Ou te manatua la’u uluai taumafaiga e tamoe i lenei auala tamoe i tua, ae faatoa ou foi mai lava mai le galuega faamisiona: Sa ou faapea lava o le a ou oti.
E tele ni vaiaso o toleniga malolosi ina ia mafai ona maua ai le taimi na faatulagaina e le faiaoga e fai ma sini. Sa o se lagona maoae e le gata o le mafai ona tamoe i le auala ae faapea foi ona saoasaoa atili a o latalata atu i le tini.
Ina ia faamanuiaina i le taalo pasiketipolo, e manaomia ona e maua le malosi lelei faaletino. O le maua o le malosi lelei faaletino e i ai ma lona tau, ma o lena tau o le tuuto, onosai, ma le loto pulea o le tagata lava ia. O le malosi faaleagaga e i ai foi lona tau. O le tau lava lena e tasi: tuuto, onosai, ma le loto pulea o le tagata lava ia.
O se molimau, e pei foi o lou tino, e manaomia foi ona malosi pe afai e te manao ia tutumau. E faapefea la ona tatou faatumauina le malosi o a tatou molimau? E le mafai ona maua e o tatou tino le malosi lelei e taalo pasiketipolo ai e ala i le na o le matamata pasiketipolo i luga o le televise. E faapena foi, e le mafai ona tatou faamalolosia a tatou molimau i le na o le matamata i le konafesi aoao i luga o le televise. E manaomia ona tatou suesue ma aoao mataupu faavae autu o le talalelei a Iesu Keriso, ona tatau lea ona tatou faia le mea sili tatou te mafaia e ola ai. O le ala lena e avea ai i tatou ma soo o Iesu Keriso, ma o le ala lena tatou te fausia ai se molimau mausali.
A tatou feagai ma faigata i le olaga, ma o lo tatou manao ia faataitai i uiga o Iesu Keriso, e taua la le saunia faaleagaga. O le saunia faaleagaga o lona uiga ua tatou atiaeina le malosiaga po o le malosi faaleagaga—o le a tatou tino malolosi faaleagaga. O le a tatou matuai au malolosi faaleagaga ma o le a tatou filifili ai e le aunoa le mea sa’o. O le a tatou le masii ese i lo tatou naunau ma le gafatia e ola i le talalelei. E pei ona ta’ua e se tasi o tusitala e le mailoa, “E tatau ona avea oe ma papa e le mafai e le vaitafe ona tafiesea.”
Ona tatou te feagai ma luitau i aso uma, o lea e taua ai ona tatou galulue i lo tatou malosiaga faaleagaga i aso uma. A tatou atiina ae le malosiaga faaleagaga, o uputuu sese a le lalolagi, faapea ai foi ma o tatou luitau patino i aso uma, o le a itiiti so latou aafiaga le lelei i lo tatou gafatia e tutumau ai i le amiotonu.
O faataitaiga maoae o malosiaga faaleagaga e sau mai i o tatou lava talafaasolopito faaleaiga. Faatasi ai ma le tele o tala mai i o tatou augatuaa, o le a mafai ai ona tatou maua ni faataitaiga e faaalia ai uiga lelei o le tutumau.
O se tala mai le talafaasolopito o lo’u lava aiga ua faaalia ai lenei mataupu faavae. O le tamā o lo’u tamamatua o Joseph Watson Maynes sa soifua i le 1856 i Hull, Yorkshire, Egelani. Na auai lona aiga i le Ekalesia i Egelani, ona latou agai mai ai lea i le Aai o Sate Leki. Sa faaipoipo o ia ia Emily Keep i le 1883, ma na avea i laua o ni matua o se fanau e toavalu. Sa valaauina Joseph e faia se misiona ia Iuni o le 1910, a o 53 ona tausaga. Faatasi ai ma le lagolago a lona faletua ma le fanau e toavalu, sa toe foi atu ai o ia i lona atunuu o Egelani e auauna ai i lana misiona.
Ina ua maea ona auauna ma le faamaoni pe a ma le lua tausaga, sa vili atu a la’ua uila ma lana soa i sauniga o le Aoga Sa i Gloucester, Egelani, ae pa ai le pa’u o lana uila. Sa oso ese o ia mai le uila e siaki po o le a se tele o le leaga. Ina ua ia vaaia sa leaga tele ma o le a fai si umi e toe fai ai, sa ia faapea atu i lana soa, e muamua o ia e amata le sauniga o le Aso Sa, ae o le a le umi ona alu atu lea. E fetaui lava le uma atu o lana tala, ae solovi ifo loa i lalo i le eleele. Sa maliu ai lava i le taimi lena ina ua pe faafuasei lona fatu.
Sa le’i toe vaai Joseph Watson Maynes i lana ava ma lana fanau e toavalu i lenei olaga. Sa mafai ona latou toe aumaia lona tino i le Aai o Sate Leki ma faia ai le sauniga o lona falelauasiga i le faletele tuai o le Waterloo Assembly Hall. O se faamatalaga na fofogaina i lona sauniga maliu na saunia e Elder Anthony W. Ivins o le Korama a Aposetolo e Toasefululua ua aoaoina ai i tatou i se lesona taua e uiga i le ola, oti, ma le tumau: “O le mea lenei e aumai e le talalelei ia i tatou—e le o le puipuiga mo le oti, ae o le manumalo ai e ala i le faamoemoe ua tatou maua i se toetutu fiafia. … E faatatau ia [Joseph Maynes]. … O se fiafiaga, ma o se lotomalie ma le olioli i le iloa ua ofo atu e tamalii o latou soifua i le amiotonu, i le faatuatua, e faamaoni ai i le faatuatua.”4
O lenei tala faaleaiga ua musuia ai a’u ia ou taumafai i le mea sili ou te mafaia e mulimuli ai i le faataitaiga o le tutumau ma le malosi faaleagaga na faaalia e le tamā o lo’u tamamatua. E faapena foi ona musuia a’u i le faatuatua o lona faletua, o Emily, o lē o lona soifuaga i le mavae ai o le maliu o lana tane o Iosefa sa mautinoa lava sa o se avega mamafatu na tauaveina. O lana molimau sa malosi ma lona liua sa atoatoa a o ia faaaluina lona olaga atoa na totoe i le faatuatua a o ia tausia na o ia lana fanau e toavalu.
Sa ta’ua e le Aposetolo o Paulo, “Ina tatou tuu ese ia o mea mamafa uma, atoa ma le agasala e faalavelavegofie ai i tatou, ia tatou taufetuli ma le onosai i le ala tanu o i o tatou luma.”5 O le taufetuliga ua tuu mai i o tatou luma i lenei lalolagi o se taufetuliga o le tutumau, e tumu i mea faalavefau. O mea faalavefau i lenei taufetuliga o luitau ia tatou te fetaiai i taeao uma tatou te feala ae ai. Ua tatou iinei i le lalolagi e tamomoe i le taufetuliga, ia faaaoga lo tatou faitalia, ma ia filifili i le va o le sa’o ma le sese. Ina ia mafai ona tini taunuu ma le mamalu ma faamanuia le taufetuliga ma toe foi atu i lo tatou Tama Faalelagi, o le a manaomia ona tatou totogi le tau o le tuuto, tutumau, ma le lotopulea o le tagata lava ia. E tatau ona tatou malolosi faaleagaga. E manaomia ona tatou atiina ae le malosiaga faaleagaga. Tatou te manaomia ni molimau malolosi o le a faapea ona taitai atu ai i le liua moni, ma o le taunuuga o le a tatou maua ai i totonu o i tatou lava le filemu o le loto ma le malosiaga e manaomia e tutumau ai po o a lava luitau tatou te ono fetaiai.
O lea la, po o a lava luitau e te ala a’e i ai i taeao uma, ia manatua—faatasi ai ma le malosi faaleagaga e te atiaeina, faatasi ma le fesoasoani a le Alii, i le iuga o le taufetuliga, o le a mafai ona e olioli i le mautinoa na ta’u mai e le Aposetolo o Paulo ina ua ia saunoa:
“Aua o a’u ua faamaligiina nei lo’u toto, ua lata ona po ou te alu ai.
“Ua ou tau le taua lelei, ua iu ia te au le tausinioga, ua ou taofi i le upu o le faatuatua:
“O lenei, ua teuina mo a’u le pale o le amiotonu, e foaiina mai ia te a’u i lea lava aso o le Alii le faamasino amiotonu.”6
Ou te tuu atu ia te outou la’u molimau ma la’u tautinoga i le moni o se Tama Faalelagi agaalofa ma Lana fuafuaga sili ma faavavau o le fiafia, lea ua aumaia ai i tatou i lenei lalolagi i lenei vaitaimi. Talosia ia musuia i tatou uma e le Agaga o le Alii ia atiina ae i totonu o i tatou lava le malosiaga e tutumau ai, i le suafa o Iesu Keriso, amene.