2013
O Filifiliga mo le Faavavau
Novema 2013

O Filifiliga mo le Faavavau

Saunia e Elder Russell M. Nelson

O Le Korama a Aposetolo e Toasefululua

O le faaaogaina ma le poto o lou saolotoga e fai ai a oe lava filifiliga, e taua i lou tuputupu ae faaleagaga, i le taimi nei ma mo le faavavau.

O’u uso e ma tuafafine pele, o aso taitasi o se aso o faiga filifiliga. Ua aoao mai i tatou e Peresitene Thomas S. Monson e faapea “o filifiliga e fuafua ai taunuuga.”1 O le faaaogaina ma le poto o lou saolotoga e fai ai a oe lava filifiliga, e taua i lou tuputupu ae faaleagaga, i le taimi nei ma mo le faavavau. E le mafai ona faapea, ua e laitiiti tele e aoao, pe ua e matua tele mo se suiga. O lou naunautaiga ina ia aoaoina ma suia e sau mai se taumafaiga e musuia faalelagi mo le alualu i luma e faavavau.2 O aso taitasi e aumai ai se avanoa mo filifiliga mo le faavavau.

O i tatou o tagata e faavavau—o fanau agaga a ni matua faalelagi. O loo tusia i le Tusi Paia e faapea “Ona faia lea e le Atua o le tagata i lona faatusa, … na faia e ia o i laua o le tane ma le fafine.”3 Lata mai nei na ou faalogo ai i se aufaipese a tamaiti na usuina le pese faapelepele “O A’u o se Atalii o le Atua.”4 Sa ou mafaufau, “Aisea na ou le faalogo ai i lena pese o usu soo e ni tina po o ni tamā faamaoni?” Pe le o tatou uma ea o fanau a le Atua? O le mea moni, e leai se tasi o i tatou e mafai ona taofia le avea ma atalii o le Atua!

I le avea ai ma fanau a le Atua, e tatau ona tatou alolofa ia te Ia ma o tatou loto ma agaga atoa, ia sili atu nai lo lo tatou alolofa i o tatou matua faalelalolagi.5 E tatau ona tatou alolofa i o tatou tuaoi o ni uso ma ni tuafafine. E leai se isi poloaiga e sili atu nai lo o nei.6 Ma e tatau ona tatou faaaloalo pea i le taua o le ola o le tagata, e ala i vaega taitasi o ona vaega e tele.

O loo aoao mai tusitusiga paia e faapea, o le tino ma le agaga o le tagata lea.7 I le avea ai ma se tagata itulua, ua mafai ai e outou taitoatasi ona faafetai i le Atua mo Ana meaalofa tautele o lou tino ma lou agaga.

O Le Tino o le Tagata

O ou tausaga faalematata o se fomai na ou maua ai se faaaloaloga loloto mo le tino o le tagata. Na foafoaina e le Atua e avea o se meaalofa ia te oe, e matuai ofoofogia lava! Mafaufau i ou mata e vaai ai, taliga e faalogo ai, ma tamailima e tagotago ai i mea ofoofogia uma o loo siomia ai oe. O lou faiai ua mafai ona e aoao ai, mafaufau, ma fetuunai ai. O lou fatu e tata ma le le faavaivai i le ao ma le po, e toetoe lava aunoa ma lou iloa.8

O lou tino e puipuia o ia lava. O tiga e oo mai o se lapataiga e faapea ua i ai se mea o faaletonu ma e manaomia ona gauai atu i ai. O faama’i pipisi e oo mai i lea taimi ma lea taimi, ma a oo mai, e fatufatu ni porotini puipui o le tino lea e faateleina ai lou puipuiga e tetee atu i siama e mulimuli mai.

O lou tino na te toe faaleleia o ia lava. O lavelavea ma totolia e toe te’a lava. O ponaivi gaui e mafai ona toe malolosi. Ua ou ta’ua na o se faataitaiga laitiiti mai le tele o uiga e maofa ai i lou tino ua tuuina mai e le Atua.

Ae ui i lea, e foliga mai i totonu o aiga uma, pe afai e le o totonu o tagata taitoatasi uma, e i ai ni tulaga faaletino e manaomia ai le tausiga faapitoa.9 O se mamanu mo le taulimaina o se luitau faapena ua uma ona tuuina mai e le Alii. Na Ia fetalai, “Ou te avatu i tagata ia vaivaiga ina ia faalotomaualalalo ai i latou; … aua afai latou te faalotomaualalaloina i latou lava … ma faatuatua mai ia te a’u, ona ou faia lea o mea vaivai ia avea ma mea malolosi ia te i latou.”10

O agaga faapitoa e masani ona faofale i totonu o tino lē atoatoa.11 O le meaalofa o se tino faapena e mafai moni ona faamalosia ai se aiga, a o fausia ma le loto i ai e matua ma fanau o latou olaga faataamilo i lena tamaitiiti ua fanau mai ma ni manaoga faapitoa.

O le faagasologa o le soifua matutua o le isi lea meaalofa mai le Atua, e faapena foi i le oti. O le iu o lou tino faaletino i le oti e taua lea i le fuafuaga sili o le fiafia a le Atua.12 Aisea? Aua o le oti o le a mafai ai e lou agaga ona toe foi atu i le aiga ia te Ia.13 Mai se vaaiga e faavavau, e na o i latou e le o saunia e fetaiai ma le Atua e mafaufau e faapea ua vave oo mai le oti.

O le avea ai o lou tino ma se vaega sili ona taua o le fuafuaga e faavavau a le Atua, e le o se mea e faateia ai le faamatalaina e le Aposetolo o Paulo [o le tino] o se “malumalu o le Atua.”14 O taimi taitasi e te tagai ai i le faaata, ia tagai i lou tino o lou malumalu. O lena upumoni—tatou te lagona ai le agaga faafetai i aso taitasi—e mafai ona faatosina ai mo le lelei au filifiliga i le auala o le a e tausia ai lou tino ma le auala o le a e faaaogaina ai. Ma o na filifiliga o le a fuafua ai lou taunuuga. E mafai faapefea lenei mea? Aua o lou tino o le malumalu mo lou agaga. Ma o le auala e te faaaoga ai lou tino e aafia ai lou agaga. O nisi o filifiliga o le a fuafua ai lou taunuuga e faavavau e aofia ai le:

  • O le a faapefea ona e filifili e tausi ma faaaoga lou tino?

  • O a ni uiga faaleagaga o le a e filifili e atiina ae?

O Le Agaga o le Tagata

O lou agaga o se tagata e faavavau. Na fetalai le Alii i Lana perofeta o Aperaamo: “Sa filifilia oe ae e te le’i fanau mai.”15 Sa fetalai foi le Alii i se fetalaiga faapena ia Ieremia16 ma le toatele o isi tagata.17 Ua Ia fetalai mai ai foi ia te oe.18

Ua loa ona silafia oe e lou Tama Faalelagi. O oe, o Lona atalii po o le afafine, sa ia filifilia ia e sau i le lalolagi i le taimi tonu lava lenei, ia avea ma se taitai o Lana galuega maoae i le lalolagi.19 Sa filifilia oe e le ona o tulaga o lou tino ae ona o ou uiga faaleagaga, e pei o le toa, lototele, loto faamaoni, o se galala mo le upumoni, o se naunau mo le poto, ma se manao e auauna atu i isi.

Sa e atiina ae nisi o nei uiga i le muai olaga. O isi e mafai ona e atiina ae iinei i le lalolagi20 pe a e saili ma le filiga i ai.21

O se uiga faaleagaga aupito taua o le pulea e le tagata o ia lava—o le malosiaga e fai ai filifiliga e faavae i mafuaaga ae le o manao. O le pulea e le tagata o ia lava e fausia ai se loto fuatiaifo malosi. Ma o lou loto fuatiaifo e fuafua ai au tali faamaoni i tulaga faigata, faatosina, ma tofotofoina. O le anapogi e fesoasoani i lou agaga e atiae ai le pulea o ou manaoga faaletino. O le anapogi e faateleina ai foi lou mauaina o le fesoasoaniga faalelagi, a o ia faalolotoina au tatalo. Aisea e manaomia ai le loto pulea? Ua tuuina e le Atua ni manaoga malolosi i totonu o i tatou mo le faafaileleina ma le alofa, e taua mo le aiga o tagata ona faaauau pea ona i ai.22 A tatou pulea o tatou manaoga i totonu o tuaoi o tulafono a le Atua, e mafai ona tatou fiafia i se olaga faafualoa, alofa faateleina, ma le fiafia atoatoa.23

E le o se mea la e faateia ai, o le tele o faaosoosoga ia o ese mai le fuafuaga o le fiafia a le Atua e oo mai e ala i le faaaoga sese o na manaoga taua, ua tuuina mai e le Atua. O le puleaina o o tatou manaoga e le o taimi uma e faigofie ai. E leai se tasi o i tatou na te puleaina ma le atoatoa.24 E tutupu mea sese. E i ai sasi. E solia agasala. O le a la se mea e mafai ona tatou faia? E mafai ona tatou aoao mai ai. Ma e mafai ona tatou salamo faamaoni.25

E mafai ona tatou suia a tatou amioga. E mafai ona sui o tatou lava manaoga. E faapefea? E na o le tasi lava le auala. O le suiga moni—suiga tumau—e na o le faamaloloina, faamamaina ma le mana gafatia o le Togiola a Iesu Keriso e mafai ona oo mai ai.26 E alofa o Ia ia te oe—ia te outou taitoatasi!27 Ua Ia faatagaina oe e maua Lona mana a o e tausia Ana poloaiga ma le naunautai, faamaoni, ma le a’ia’i. O lona faigofie lena ma le mautinoa. O le talalelei a Iesu Keriso o se talalelei o suiga!28

O se agaga malosi o le tagata, faatasi ai ma le pulea o manaoga o le tino, o le matai lea o lagona ma faananauga ae e le o se pologa ia i latou. O lena ituaiga o saolotoga e taua i le agaga e pei lava o le okesene i le tino! O le saolotoga mai le faapologaina e le tagata o ia lava o le laveaiga moni lea!29

Ua tatou “saoloto e filifili le saolotoga ma le ola e faavavau … pe filifili le faatagataotauaina ma le oti.”30 A tatou filifilia le ala maualuga e agai atu i le saolotoga ma le ola faavavau, o lena ala e aofia ai le faaipoipoga.31 Ua tautino atu le Au Paia o Aso e Gata Ai o le “faaipoipoga i le va o se alii ma se tamaitai ua faauuina e le Atua, ma o le aiga o le totonugalemu lea o le fuafuaga a lē Foafoa, mo le taunuuga e faavavau a Lana fanau.” Ua tatou iloa foi “o le tulaga tane po o le fafine [o le tagata] o se vaega taua lea o le muai olaga, olaga faitino, ma le faasinomaga e faavavau ma le faamoemoega.”32

O le faaipoipoga i le va o se alii ma se tamaitai o le vaega autu lea o le aoaoga faavae a le Alii ma e taua i le fuafuaga e faavavau a le Atua. O le faaipoipoga i le va o se alii ma se tamaitai o le mamanu lea a le Atua mo le atoatoa o le olaga i le lalolagi ma i le lagi. O le mamanu a le Atua mo le faaipoipoga e le mafai ona tafili saunoa i ai, malamalama sese i ai, pe faaseseina.33 E le mafai pe afai e te manao i le fiafia moni. O le mamanu a le Atua mo le faaipoipoga e puipuia ai le mana paia o le foafoaga ma le olioli o le alofa faamamai moni faaleulugalii.34 Ua tatou iloa o Atamu ma Eva sa faaipoipoina e le Atua a o le’i o laua oo i le olioli o le tuufaatasia o se tane ma se avā.35

I o tatou vaitaimi, ua i ai i faigamalo i le lotoifale se atugaluga faapitoa ma patino i le puipuiga o faaipoipoga ona o aiga malolosi ua i ai auala sili ona lelei mo le soifua maloloina, aoaoga, tulaga manuia, ma le uluola o tupulaga faia’e.36 Peitai o faigamalo i le lotoifale ua malosi le faatosinaina e faiga faaagafesootai ma filosofia faalelalolagi a o latou tusia, ma toe tusia, ma faamalolosia tulafono. Po o a lava tulafono faalemalo e ono faavaeina, o le aoaoga faavae a le Alii e faatatau i le faaipoipoga ma le ola mama e le mafai ona suia.37 Ia manatua: o le agasala, e tusa lava pe ua faatagaina e tagata, o le agasala lava i le silafaga a le Atua!

E ui e ao ona tatou faataitai i le agalelei ma le agaalofa o lo tatou Faaola, e ui e ao ona tatou faatauaina aia tatau ma lagona o fanau uma a le Atua, ae e le mafai ona tatou suia Lana aoaoga faavae. E le o se tatou matafaioi le suia. O Lana aoaoga faavae ua mo i tatou e aoao ai, malamalama ai, ma tausia.

O le ituaiga soifuaga o le Faaola e lelei. O Lana ala e aofia ai le legavia a o le’i faaipoipoina ma le faamaoni a’ia’i i totonu o le faaipoipoga.38 O le ala a le Alii ua pau lea o le ala mo i tatou e maua ai le fiafia tumau. O Lana ala e aumai ai le mafanafana faifaipea i o tatou agaga ma le filemu faifaipea i o tatou aiga. Ae o le mea sili i lo mea uma, o Lana ala e taitai atu ai i tatou ia te Ia ma lo tatou Tama Faalelagi, i le ola faavavau ma le faaeaga.39 O le ute tonu lava lea o le galuega ma le mamalu o le Atua.40

O’u uso e ma tuafafine pele, o aso taitasi o se aso o filifiliga, ma o a tatou filifiliga e fuafua ai lo tatou taunuuga. O le a i ai se aso, o le a tatou tutu ai taitoatasi i luma o le Alii i le faamasinoga.41 O le a faataunuu taitoatasi sa tatou faatalanoaga patino ma Iesu Keriso.42 O le a tatou tali atu mo filifiliga na tatou faia e uiga i o tatou tino, o tatou uiga faaleagaga, ma auala na tatou faamamaluina ai le mamanu a le Atua mo le faaipoipoga ma le aiga. Tau ina ia tatou filifili ma le poto i aso taitasi ia filifiliga mo le faavavau, o la’u tatalo faatauanau lea i le suafa paia o Iesu Keriso, amene.

Faamatalaga

  1. Thomas S. Monson, “Decisions Determine Destiny” (Church Educational System fireside, Nov. 6, 2005), 3; speeches.byu.edu.

  2. O le aoaoga o le alualu i luma e faavavau sa faamatalaina lelei e W. W. Phelps i upu o le viiga “If You Could Hie to Kolob” (Hymns, no. 284). O le fuaiupu e 4 e faitauina faapenei: “E leai se mutaaga o le mama; / E leai se mutaaga o le malosi; / E leai se mutaaga o le poto; / E leai se mutaaga o le malamalama. / E leai se mutaaga o le tuufaatasiga; / E leai se mutaaga o le talavou; / E leai se mutaaga o le perisitua; / E leai se mutaaga o le upumoni.” E faaiuina i le fuaiupu e 5: “E leai se mutaaga o le mamalu; / E leai se mutaaga o le alofa; / E leai se mutaaga o le tagata; / E leai se oti i luga.”

  3. Kenese 1:27; tagai foi Kolose 3:10; Alema 18:34; Eteru 3:15; Mose 6:9.

  4. “O le Atua Lo’u Tama,” Viiga, nu. 184.

  5. Tagai Mataio 10:37.

  6. Tagai Mareko 12:30–31.

  7. Tagai Mataupu Faavae ma Feagaiga 88:15.

  8. O isi foi gaoioiga ua tuuina mai e le Atua o loo galulue foi i lou tino. O elemene e pei o le sodium [sotiame], potassium [potasiame], ma le calcium [kalisiame], ma elemene tuufaatasi e pei o le vai, suka, ma polōtini e taua mo le ola. O le tino e nafa ma kasa e pei o le okesene ma le karaponi taiokesaita. Na te gaosia homone e pei o le insulin [inisulini], adrenalin [atarelini], ma le thyroxin [tairosini]. O le maualuga po o le tele o nei mea taitasi ma le tele o isi mea o loo maua i totonu o le tino e otometi ona fuafuaina i totonu o tuaoi faapitoa. O le faiā i le va o fatupuipui o le tino e otometi ona taulimaina ma faamatuaiaina. Mo se faataitaiga, o le fatupuipui [pituitary gland] i le pito i lalo o le faiai lea na te gaosia se homone e faamatuā’ia le vaega pito i tua o fatupuipui [adrenal glands] e gaosi ai homone fatupuipui pito i tua [adrenal cortical]. Ma o le faateleina o homone pito i tua [cortical] e lofituina ai le gaosiga e le pituitary o le honome faamatuā’i ma e faapena foi i le isi itu. O le vevela o lou tino ia tausisia lava i se vaega masani o le 98.6˚F po o le 37˚C, e tusa pe o e i le ekueta po o le Pole i Matu.

  9. O nisi tulaga e faigofie ona iloa; o isi e punitia. O isi e mafua mai ona o tulaga faakenera; o isi e leai. O isi tagata atonu o le a tele se avanoa e maua ai i le kanesa, o isi e i ai mea e le taliaina e o latou tino, ma isi mea faapena. E mafai e i tatou taitoatasi ona nofouta i ona lava itu e vaivai ai ma aoao ai ma le faamaualalo mea o le a aoao mai e le Alii, ina ia avea le vaivaiga ma se malosiaga.

  10. Eteru 12:27.

  11. O nisi tulaga o le a le faasa’oina atoatoa seia oo i le Toetutu, lea “o le a toefuataia mea uma i o latou autino tatau ai ma atoatoa” (Alema 40:23).

  12. Tagai Alema 42:8.

  13. Na tusia e le Fai Salamo, “E silisili i le manatu o Ieova le oti o ona tagata amio Atua” (Salamo116:15). E silisili le oti ona o le “feiloaiga” a le tagata amio Atua ma le Alii.

  14. 1 Korinito 3:16; tagai foi 6:19.

  15. Aperaamo 3:23.

  16. Tagai Ieremia 1:5.

  17. Tagai Alema 13:2–3.

  18. Tagai Mataupu Faavae ma Feagaiga 138:55–56.

  19. Tagai Alema 13:2–3; Mataupu Faavae ma Feagaiga 138:38–57.

  20. O uiga e pei o le “faatuatua, amio mama, poto, faautauta, onosai, agalelei faaleuso, amioatua, alofa mama, lotomaualalo, [ma le] filiga” (Mataupu Faavae ma Feagaiga 4:6) ua aofia ai i meaalofa faaleagaga e mafai ona tatou atinaeina ma tuuina mai. O le loto faafetai o le isi lea uiga faaleagaga e mafai ona atinaeina. O le loto faafetai e mamanuina ai lagona ma le faamanuiaina. Ma afai ua e “fanauina faaleagaga i la le Atua,” e mafai ona e mauaina ma le loto faafetai Ona foliga i ou mata (tagai Alema 5:14).

  21. Tagai 1 Korinito 12; 14:1–12; Moronae 10:8–19; Mataupu Faavae ma Feagaiga 46:10–29.

  22. O isi ua faaosoosoina ia tausami tele. “O le tino puta ua avea ma faafitauli ogaoga i le lalolagi atoa, ma e le itiiti ifo ma le 2.8 miliona tagata e maliliu i tausaga taitasi ona o se taunuuga o le soona puputa” (World Health Organization, “10 Facts on Obesity,” Mar. 2013, www.who.int/features/factfiles/obesity/en. O isi ua faaosoosoina ia tau le aai. O le ‘ino’ai [anorexia] ma le bulimia [soona’ai ma toe faapua’i] ua faatamaia ai le tele o soifua, faaipoipoga, ma aiga. Ae o isi ua faaosoosoina e tuinanau i faiga faalefeusuai ia ua faasāina e lo tatou Foafoa. O loo i ai i le Tusitaulima 2: Taitaiina o le Ekalesia, le faamaninoga lea o loo faapea mai: “O le tulafono a le Alii o amioga mama e faasaina ai faiga faalefeusuai i fafo o faaipoipoga faatulafonoina ma le faamaoni i le faaipoipoga. … O le mulilua, faitaaga, sootaga faatauatane po o le faaulugalii o tane po o tamaitai foi lava latou, ma isi faiga uma e le paia, e le faalenatura, pe le mama, e tausalaina.” E sii mai pea mai le tusitaulima: “O amioga faatauatane po o le faatauafafine e solia ai poloaiga a le Atua, e feteenai ma faamoemoega o tulaga faalefeusuai o tagata, e aveesea ai faamanuiaga o tagata e mafai ona maua ai le olaga faaleaiga ma sauniga faaola o le talalelei. … A o tetee atu i amioga faatauatane, o loo faapea foi ona aapa atu le Ekalesia ma le malamalama ma le faaaloalo i tagata taitoatasi o e o loo tosina atu i tagata o lana lava itupa” ([2010], 21.4.5, 6).

  23. Tagai 1 Korinito 6:9–20; Iakopo 1:25–27; Mataupu Faavae ma Feagaiga 130:20–21. Ma e ao ona tatou manatua, “ua i ai le tagata, ina ia latou maua le olioli” (2 Nifae 2:25).

  24. O le olaga faaletino o se vaitaimi o le tofotofoina, e pei ona faamalamalama mai i le mau: “Ma o le a tatou tofotofoina ai i latou, e vaai pe latou te faia mea uma o soo se mea e poloaiina ai i latou e le Alii lo latou Atua” (Aperaamo 3:25).

  25. Tagai Mosaea 4:10; Alema 39:9; Helamana 15:7. Tusitaulima 2 o loo i ai le savali lenei: “O amioga faatauatane e mafai ona faamagaloina e ala i le salamo faamaoni” (21.4.6).

  26. E ala i le Togiola a Iesu Keriso ma pe a usiusitai i mataupu faavae o le talalelei, o le a faaolaina ai tagata uma (tagai Mataupu Faavae ma Feagaiga 138:4; Mataupu Faavae o le Faatuatua 1:3).

  27. Tagai Eteru 12:33–34; Moronae 8:17.

  28. Tagai Mosaea 5:2; Alema 5:12–14.

  29. Tagai Roma 8:13–17; Kalatia 5:13–25; Mataupu Faavae ma Feagaiga 88:86.

  30. 2 Nifae 2:27.

  31. Tagai Mataupu Faavae ma Feagaiga 131:1–4.

  32. “O Le Aiga: O Se Folafolaga i le Lalolagi,” Liahona, Nov. 2010, 129.

  33. Tagai Mataio 19:4–6; Mosaea 29:26–27; Helamana 5:2..

  34. Ua fananau mai tagata taitoatasi ma se faasinomaga, koromasome, ma DNA (deoxyribonucleic acid) maoae. O le DNA o se vaega aupito laitiiti o se elemene na te faamatalaina faatonuga faakenera e faaaoga i le atinae ma le faagaoioia o sela ola. O le DNA o tagata taitoatasi e fatuina pe afai e tuufaatasi le DNA mai se tama ma se tina ina ia fatu ai le DNA o se tino fou—o se faigapaaga i le va o le tama, tina, ma se tamaitiiti.

  35. Tagai Kenese 2:24–25; 3:20–21; 4:1–2, 25.

  36. Na tusia e Dr. Patrick F. Fagan: “O le faavae manaomia lea e faalagolago i ai le tulaga o le tamaoaiga o se aiga ua faaipoipoina matua—ae maise lava o se aiga ua i ai se fanau e tapuai faalevaiaso. … O faaipoipoga uma lava e faatuina ai se aiga fou, se iunite tutoatasi o le tamaoaiga e faapea ona maua ai tupe maua, faalu, sefe, ma faaputu” (“The Family GDP: How Marriage and Fertility Drive the Economy,” The Family in America, vol. 24, no. 2 [spring 2010]: 136.

  37. Tagai Esoto 20:14; Levitiko 18:22; 20:13; Teuterenome 5:18; Mataio 5:27–28; Mareko 10:19; Luka 18:20; Roma 1:26–27; 13:9; Mosaea 13:22; 3 Nifae 12:27–28; Mataupu Faavae ma Feagaiga 42:24; 59:6.

  38. Tagai Gordon B. Hinckley, “This Thing Was Not Done in a Corner,” Ensign, Nov. 1996, 49.

  39. Tagai Mataupu Faavae ma Feagaiga 14:7.

  40. Tagai Mose 1:39.

  41. Tagai 2 Nifae 9:41, 46; Mosaea 16:10.

  42. O le a faamasinoina i tatou e tusa ai ma a tatou galuega ma manaoga o o tatou loto (tagai Mataupu ma Feagaiga 137:9; tagai foi Eperu 4:12; Alema 18:32; Mataupu Faavae ma Feagaiga 6:16; 88:109).