Seia Tatou Toe Feiloai

Saunia e Peresitene Thomas S. Monson

Tau ina ia tatou faaali atu le agalelei faateleina i le tasi ma le isi, ma tau ina ia maua pea i tatou o faia e le aunoa le galuega a le Alii.

Ou uso e ma tuafafine, ua tumu lo’u loto a o tatou faaiuina lenei konafesi aoao matagofie o le Ekalesia. Ua fafagaina i tatou faaleagaga a o tatou faalogologo atu i fautuaga ma molimau a i latou na saunoa i sauniga taitasi.

Ua faamanuiaina i tatou e feiloai iinei i le Nofoaga Autu ofoofogia mo Konafesi i le filemu ma le saogalemu. Ua i ai a tatou faasalalauga mata’ina o le konafesi, ua oo atu ai i le salafa o konetineta i tagata i soo se mea. E ui matou te vava mamao faaletino mai le toatele o outou, ae matou te lagonaina o outou agaga.

I o tatou uso na faamaloloina i lenei konafesi, ou te faailoa atu le agaga faafetai o’oo’o o le Ekalesia atoa mo le tele o tausaga o la outou tautua tuuto. E le mafaitaulia le anoanoai o tagata ua faamanuiaina i la outou sao i le galuega a le Alii.

Ou te faailoa atu le agaga faafetai i le Aufaipese a le Tapeneko ma isi aufaipese na auai i lenei konafesi. Ua matagofie lava musika ma ua faaopoopo tele ai le Agaga ua tatou lagonaina i sauniga taitasi.

Ou te faafetai atu mo a outou tatalo mo a’u faapea ai ma le Pulega Aoao atoa ma taitai aoao o le Ekalesia. Ua faamalosia i matou e na tatalo.

Ia tumau ia te outou faamanuiaga o le lagi. Ia faatumulia o outou aiga i le alofa ma le feāvata’i faapea ai ma le Agaga o le Alii. Ia outou faafaileleina e le aunoa a outou molimau o le talalelei, ina ia avea ma puipuiga ia te outou e tetee atu ai i tu’iga a Satani.

Ua maea nei le konafesi. A o tatou toe foi atu i o tatou aiga, ia tatou o ma le saogalemu. Tau ina ia tatou faatasi ma le Agaga ua tatou lagonaina iinei a o tatou feoai ma faia na mea ia tatou te faia i aso taitasi. Tau ina ia tatou faaali atu le agalelei faateleina i le tasi ma le isi, ma tau ina ia maua pea i tatou o faia e le aunoa le galuega a le Alii.

Ou uso e ma tuafafine, ia faamanuia outou e le Atua. Ia i ai lona filemu folafolaina ma outou i le taimi nei ma taimi uma. Ou te faatofa atu ia te outou seia tatou toe feiloai i le isi ono masina. I le suafa o lo tatou Faaola, le Alii o Iesu Keriso, amene.