Pe O Tatou Iloa Ea Mea Ua Tatou Maua?

Saunia e Carole M. Stephens

Fesoasoani Muamua i le Au Peresitene Aoao o le Aualofa

Ua tuuina mai e sauniga ma feagaiga o le perisitua le avanoa tatou te mauaina ai le atoaga o faamanuiaga na folafola mai ia i tatou e le Atua, lea ua mafai ona o le Togiola a le Faaola.

I le “O Le Aiga: O Se Folafolaga i le Lalolagi,” na ta’ua ai e le Au Peresitene Sili ma le Korama a Aposetolo e Toasefululua: “O tagata uma—tane ma le fafine—ua foafoaina i le faatusa o le Atua. O i latou taitoatasi o se atalii po o se afafine agaga faapelepele a ni matua faalelagi, ma, o lea ua tofu ai ma se natura paia ma se taunuuga.”¹ Ina ia ausia lenei faamoemoega paia, e manaomia e atalii ma afafine uma o le Atua ia sauniga ma feagaiga o le perisitua.

Tatou te manaomia le papatiso. A faatofuina i tatou i vai o le papatisoga, ua tatou osifeagaiga e tauave i o tatou luga le suafa o Keriso, manatua pea o Ia, ma tausi Ana poloaiga, ma auauna atu ia te Ia e oo i le iuga, ina ia tatou maua pea Lona Agaga e faatasi ma i tatou.²

Tatou te manaomia le meaalofa o le Agaga Paia. O lena sauniga, e mafai ai ona tatou maua le mafutaga faifaipea ma le Agaga. Na aoao mai e Peresitene Uilifoti Uitilafi: “O alii ma tamaitai uma o e ua ulufale mai i totonu o le ekalesia a le Atua ma papatisoina mo le faamagaloina o agasala e i ai lana aia e maua ai faaaliga, le aia i le Agaga o le Atua, e fesoasoani ia i latou i a latou galuega, i le taitaiina o a latou fanau, i le fautuaina o a latou fanau ma i latou uma o loo i lalo o la latou faamalumaluga. O le Agaga Paia e le faapitoa i alii, po o aposetolo po o perofeta; e i ai i alii ma tamaitai faatuatua taitoatasi, ma tamaiti taitoatasi o le ua lava lona matua e talia ai le talalelei a Keriso.”³

E manaomia ona tatou mauaina ia faaeega paia o le malumalu. Na saunoa mai Elder M. Russell Ballard: “A o atu ia alii ma tamaitai i le malumalu, ua faaee uma mai ia i laua le mana lava e tasi, o lona uiga o le mana o le perisitua. … O le faaeega paia o se meaalofa moni lava o le mana.”⁴

Tatou te manaomia le sauniga o le faamauga, lea e taitai atu ai i le ola e faavavau, “le meaalofa silisili lea o meaalofa uma a le Atua.”⁵ O lenei sauniga o le perisitua ua na o le alii ma le tamaitai ua tuufaatasia e mauaina. Na aoao mai Elder Russell M. Nelson, “Ua toefuatai mai le pule o le perisitua ina ia mafai ai ona faamauina aiga e faavavau.”⁶

Tatou te manaomia le avanoa e faafou ai a tatou feagaiga i vaiaso taitasi ao tatou fetagofi atu i le faamanatuga. Na aoao mai e perofeta ma aposetolo o aso e gata ai e faapea pe a tatou fetagofi atu ma le agavaa i le faamanatuga, e le gata ua tatou faafouina a tatou feagaiga o le papatisoga ae “o feagaiga uma ua osia ma le Alii.”⁷

Ua tuuina mai i nei sauniga ma feagaiga o le perisitua le avanoa tatou te mauaina ai le atoaga o faamanuiaga na folafola mai ia i tatou e le Atua, lea ua mafai ona o le Togiola a le Faaola. Latou te faaauupegaina ia atalii ma afafine o le Atua i le mana,⁸ ma tuuina mai ia i tatou le avanoa e maua ai le ola e faavavau—ina ia toe foi atu i le afioaga o le Atua ma nonofo faatasi ma Ia i Lona aiga e faavavau.

Sa matou o talu ai nei ma taitai perisitua e asiasi i aiga o ni tamaitai se toafa i Honduras. Na manaomia e nei tamaitai ma o latou aiga ia ki ma le pule o le perisitua, sauniga ma feagaiga o le perisitua, ma le mana ma faamanuiaga o le perisitua.

Na matou asia se uso pele ua faaipoipo ma e toalua lana fanau aulelei. E faamaoni ma malosi o ia i le Lotu, ma o loo ia aoaoina lana fanau e filifili le mea sa’o. E lagolagoina e lona toalua lona auai i le Ekalesia, ae e le o ia o se tagata o le Ekalesia. E malosi le latou aiga, peitai ina ia olioli i le malosi sili atu, latou te manaomia ni faamanuiaga faaopoopo o le perisitua. Latou te manaomia le mauaina e le tama o sauniga o le papatisoga ma le meaalofa o le Agaga Paia ma ia faaee atu i ona luga le perisitua. Latou te manaomia le mana o le perisitua lea e mafai ona oo mai e ala i le faaeega paia ma le faamauga.

O le matou asiasiga na sosoo ai, o le aiga o se auuso nofofua e toalua, o ni tamaitai e maoae le faatuatua. O se tasi o le auuso e i ai sana tama tama o loo sauni mo se misiona. O le isi o loo faia togafitiga mo le kanesa. I taimi o le lotovaivai ma le faanoanoa, na la manatua ai le Togiola a le Faaola ma ua faatumulia i le faatuatua ma le faamoemoe. Ua la manaomiaina uma ia faamanuiaga ma le mana faaopoopo ia o loo maua e ala atu i sauniga o le malumalu. Na matou uunaia i laua e tutu faatasi ma faifeautalai o le lumanai o i lo latou aiga i le sauniaina ina ia maua na sauniga.

O la matou asiasiga mulimuli o le aiga lea o se tamaitai sa maliu talu ai nei lona toalua i se faalavalave matuia. O se tagata faatoa liliu mai i le Ekalesia, sa ia le malamalama e mafai ona ia maua ni ona lava faaeega paia ma faamauina i lana tane. Ina ua matou aoaoina o ia e mafai ona la mauaina ma lana tane ua maliu nei faamanuiaga, na faatumulia o ia i le faamoemoe. O le iloaina o sauniga ma feagaiga o le malumalu o le a mafai ona faamauina ai faatasi lona aiga e faavavau, ua ia maua ai le faatuatua ma le naunautaiga e feagai ai ma luitau o i luma atu.

O loo sauni le tama a le tina ua maliu lana tane ia maua le Perisitua Arona. O le faauuina o ia o le a avea ma se faamanuiaga sili ia te ia ma lona aiga. O le a i ai se tasi e umia le perisitua i lo latou aiga.

Ina ua ou feiloai i nei tamaitai faamaoni i Honduras, na ou iloa lo latou taumafai e faatumau pea le malosi o o latou aiga i le talalelei. Na latou faaalia le faafetai mo tagata tausi feagaiga a le uarota o e na tausia ma le agaalofa i latou ma fesoasoani i le tausiga o o latou manaoga faaletino ma faaleagaga. Peitai, na tofu uma nei tamaitai ma manaoga e lei taulimaina ma le atoatoa.

I aiga taitasi sa matou asia, sa fesiligia e se taitai perisitua atamai ia uso taitasi pe sa ia mauaina se faamanuiaga faaleperisitua. O tali taitasi o le leai. Na talosagaina e uso taitasi se faamanuiaga faaleperisitua ma maua ai i lena aso. Na fetagisi uma i latou ao faaalia e le tagata lava ia le faafetai mo le mafanafana, taitaiga, faamalosiauga, ma musumusuga lea na oo mai lona Tama Faalelagi e ala mai i se tasi o loo agavaa e umia le perisitua.

Na uunaia au e nei uso. Na latou faaalia le faaaloalo mo le Atua ma Lona mana ma le pule. Sa ou faafetai foi mo taitai perisitua o e na matou asia faatasi nei aiga. Ina ua tuua nei aiga taitasi, sa matou fefautuaai faatasi e uiga i le auala e fesoasoani atu ai i nei aiga ina ia maua ia sauniga latou te manaomia e alualu ai i luma i le ala o le feagaiga ma faamalolosia o latou aiga.

O loo i ai i lenei vaitaimi se manaoga sili mo alii ma tamaitai ina ia atiina ae le faaaloalo o le tasi i le isi o ni atalii ma ni afafine o le Atua atoa ai ma le faaaloalo mo lo tatou Tama oi le Lagi ma Lana perisitua—o Lana pule ma le mana.

E i ai Lana fuafuaga mo i tatou, ma a tatou faaaogaina lo tatou faatuatua ma faalagolago i Lana fuafuaga, o le a faamalolosia lo tatou faaaloalo mo Ia ma mo Lana pule ma le mana o le perisitua.

I le aoaoga mo taitai i le lalolagi atoa i le Faamalolosia o le Aiga ma le Ekalesia e ala i le Perisitua, ua aoao mai ai i tatou e faapea e le tatau ona lagona e tuafafine e le o i ai nisi o umia le perisitua i o latou aiga le tuuatoatasi. Ua faamanuiaina ma faamalolosia i latou e ala i sauniga sa latou mauaina ma feagaiga ua latou tausia. E le tatau ona latou faatuai e aapa atu pe a manaomia le fesoasoani. Sa aoao mai Elder M. Russell Ballard e faapea e tatau ona silafia e tamaitai uma i le Ekalesia o loo i ai sona epikopo, se peresitene o le korama a toeaina, se faiaoga o aiga, ma isi tagata agavaa o loo umiaina le perisitua o e e mafai ona ia faalagolago i ai e sau i le fale ma fesoasoani ia te ia ma “tuuina mai se faamanuiaga.”⁹ e pei ona faaopoopo mai ai Sister Rosemary M. Wixom.

Na aoao mai foi Elder Ballard: “E matamau le Tama oi le Lagi i Lona mana. E maua e alii ma tamaitai uma lenei mana e fesoasoani ai i o latou lava olaga. O i latou uma ua osia ni feagaiga paia ma le Alii ma e e faamamaluina nei feagaiga, o le a agavaa e maua se faaaliga patino, ina ia faamanuiaina ai e le auaunaga a agelu, [ma] talanoa ma le Atua.”¹⁰

Tatou te manaomia uma lava le tasi ma le isi. E manaomia e atalii o le Atua ia afafine o le Atua, ma e manaomia e afafine o le Atua atalii o le Atua.

E eseese a tatou meaalofa ma malosiaga. Ua faamamafa mai e le Korinito Muamua mataupu e 12 le manaomia e atalii ma afafine o le Atua, o i tatou taitoatasi, ona faataunuuina a tatou matafaioi ma tiutetauave taitoatasi e tusa ai ma le fuafuaga a le Alii ina ia manuia ai tagata uma.¹¹

Atalii o le Atua, o outou iloa ea po o ai outou? O outou iloa ea mea ua outou mauaina? O outou agavaa e faaaoga le perisitua ma maua le mana ma faamanuiaga o le perisitua? O outou talisapaia ea a outou matafaioi ma tiutetauave o le faamalolosia o aiga o ni tama, tama matutua, atalii, tuagane, ma tane o aiga? O outou faaalia ea le faaaloalo i tamaitai, tulaga faatamaitai, ma tulaga faatina?

Afafine o le Atua, o tatou iloa ea po o ai i tatou? O tatou iloa ea mea ua tatou mauaina? O tatou agavaa ea ina ia maua le mana ma faamanuiaga o le perisitua? O tatou mauaina ia meaalofa na tuuina mai ia i tatou ma le agaga faafetai, alofa tunoa, ma le malualii? O tatou talisapaia ea a tatou matafaioi ma tiutetauave ia faamalolosia aiga i le avea ai ma ni tina, tina matutua, uso, ma fafine o aiga? O tatou faaalia ea le faaaloalo i alii, tulaga faatamatane, ma tulaga faatama?

I le avea ai ma ni atalii ma afafine o le feagaiga, o tatou maua ea le faatuatua i lo tatou Tama Faalelagi ma Lana fuafuaga e faavavau mo i tatou? O tatou faatuatua ea ia Iesu Keriso ma Lana Togiola? O tatou talitonu ea e i ai so tatou natura paia ma le taunuuga? Ma o tatou taumafaiga ina ia ausia lenei faamoemoega ma maua mea uma ua i ai i le Tama,¹² ua tatou malamalama ea i le taua o le mauaina o sauniga o le perisitua ma osia, tausia, ma toe faafouina a tatou feagaiga ma le Alii?

O i tatou o atalii ma afafine agaga faapelepele o ni matua faalelagi, ma se natura paia ma le taunuuga. Ua lava le alofa o lo tatou Faaola, o Iesu Keriso ia i tatou na foai mai ai Lona soifua mo i tatou, ma ua saunia e Lana Togiola le auala mo i tatou e agai ai i luma i le ala ma lo tatou aiga faalelagi e ala atu i sauniga ma feagaiga paia o le perisitua.

O nei sauniga ma feagaiga o le perisitua na toefuataiina i le lalolagi e ala mai i le Perofeta o Iosefa Samita, ma o loo umia i le taimi nei e Peresitene Thomas S. Monson ia ki uma o le perisitua i luga o le fogaeleele.

Na aoao mai Elder D. Todd Christofferson, “O Le Ekalesia a Iesu Keriso o le Au Paia o Aso e Gata Ai, o loo i ai le pule o le perisitua e faataunuu ai sauniga ia e mafai ona tatou ulu atu ai i feagaiga tumau ma lo tatou Tama Faalelagi i le suafa o Lona Alo Paia. … O le a tausia e le Atua Ana folafolaga ia te oe, pe a e faamamaluina au feagaiga ma Ia.”¹³

Ou te molimau atu ai i nei mea, i le suafa o Iesu Keriso, amene.