“Ou Te Le Tuua Lava Oe, Ou Te le Tuulafoai Lava ia te Oe”
O lo tatou Tama Faalelagi … ua Ia silafia foi tatou te aoao ma tuputupu ae ma malosi atili ao tatou fetaiai ma manumalo mai tofotofoga ia e tatau ona tatou pasia.
I lau api talaaga i lenei po, o le a ou tusi ai, “O se tasi lenei o sauniga aupito sili ona musuia o soo se konafesi aoao ua ou auai. O mea uma e faatatau i ai ua sili atu ma maoae le natura faaleagaga.”
Uso e ma tuafafine, i le ono masina talu ai ao tatou mafuta faatasi i la tatou konafesi aoao, sa faataotolia ai si au manamea pele, o Frances i le falemai, na mafatia i se pa’ū matuia i nai aso na muamua atu. Ia Me, i le mavae ai o ni vaiaso o tauiviga ma le lototele e faatoilalo ona manuaga, sa ia mou atu ai i le faavavau. Ua matuai ou misia lava o ia. Sa ma faaipoipo i le Malumalu o Sate Leki i le aso 7 o Oketopa , 1948. O taeao semanu e atoa i ai le 65 tausaga o le ma faaipoipoga. O ia o lo’u ola atoa, o la’u soa faatuatuaina, ma la’u uo mamae. I lo’u fai atu ai ua ou misia lava o ia, e le o amata ai ona ou faamatalaina le loloto o ou lagona.
O le konafesi lenei ua faailogaina ai le 50 tausaga talu ona valaauina au i le Korama a Aposetolo e Toasefululua e Peresitene Tavita O. MaKei. I le aluga o nei tausaga uma e leai lava se isi mea na ou lagonaina ae ua na o le lagolagosua atoatoa ma le faamalieina a si a’u manamea pele. E le mafaitaulia osigataulaga na ia faia ina ia mafai ai ona ou faataunuuina lo’u valaauga. Ou te lei faalogo lava i se upu faitio mai ia te ia ao faatele ona ou faaaluina ia aso ma o nisi taimi o vaiaso e tuua ai na o ia ma le ma fanau. O ia moni lava o se agelu.
Ou te fia faailoa atu lo’u faafetai, faapea ai ma le faafetai a lo’u aiga, mo le faailoaga silisili o le alofa lea na oo mai ia i matou talu le maliu o Frances. E faitau selau kata faamaisega ma tusi na auina mai le lalolagi atoa e faailoa mai ai le faamemelo mo ia ma faamafanafanaga mo lo matou aiga. Sa matou mauaina le anoanoai o teufugalaau matagofie. Matou te faafetai tele mo saofaga na foai atu i lona igoa i le Tupe mo Faifetautalai Lautele a le Ekalesia. E avea ai ma sui o i matou ua ia tuua, ou te faailoa atu se agaga faafetai tele mo lo outou agalelei ma faailoaga ootia o le alofa.
O le faamafanafanaga sili ia te au i lenei taimi faamomoiloto o le valavala ai, o la’u molimau o le talalelei a Iesu Keriso ma le malamalama o ia te au o loo ola pea la’u pele o Frances. Ou te iloa o le ma valavala ai e le tumau. Sa faamauina i maua i le maota o le Atua e se tasi na umiaina le pule e fusifusia ai mea i le lalolagi ma i le lagi. Ou te iloa o le a toe faatasia i maua i se aso ma o le a le toe valavala ai lava. O le malamalama lea o loo lagolagoina ai au.
Uso e ma tuafafine, atonu e manatu ma le saogalemu e faapea e leai se tasi ua ola e saoloto atoa mai puapuaga ma faanoanoaga, po o se vaitaimi i le talafaasolopito o tagata sa lei maua ai sona vaega atoa o le vāvāō ma faanoanoaga.
Pe a tatou oo i tulaga leaga o le olaga, o loo i ai le faaosoosoga e fai le fesili “Aisea ua oo ai ia te au?” E i ai taimi e foliga mai ai ua leai se mutaaga o o tatou puapuaga, ua leai se laveai i o tatou tofotofoga. Ua tatou lagonaina le siomia i le le fiafia ona o manaoga le faamalieina ma le faanoanoa ona o faamoemoega ua mou ese atu. Tatou te auai i le faaleoina o le faatoga o i le tusi paia, “E leai ea ni pulu pāsama i Kiliata?”1 Tatou te lagonaina le tuulafoaiina, lotonutimomoia, ma le tuua toatasi. Ua tatou masani lava i le tagai i o tatou lava tulaga le manuia patino e ala i se vaaiga faanenefu o le masalosalo. Tatou te oo ina le onosai mo se vaifofo i o tatou faafitauli, ma faagaloina soo ai le manaomia pea o lena amio mama faalelagi o le onosai.
O faigata ia e oo mai ia i tatou ua tatou maua ai le tofotofoga moni o lo tatou gafatia e tumau ai. E tumau pea se fesili autu ia taliina e i tatou taitoatasi: Pe o le a ou faavaivai ea, pe o le a ou faamaeaina ea? O nisi e faavaivai pe a latou iloaina ua latou le mafai ona faatoilaloina o latou faigata. O le faamaeaina e aofia ai le tumau e oo i le iuga o le olaga lava ia.
A o tatou mafaufau loloto i mea ia e mafai ona tutupu ia i tatou lava, e mafai ona tatou faapea faatasi ma Iopu o anamua, “Ua fanau mai le tagata ia tigaina.”2 O Iopu o se tagata na “sa’o le amio … ma le amiotonu” o le na “mata’u foi … i le Atua ma ‘alo‘alo ese i mea leaga.”3 Sa amiotonu ona uiga, uluola i lona tamaoaiga, ae sa fetaiai ia Iopu ma se tofotofoga lea e mafai ona faaumatia ai soo se tasi. Sa aveesea ana meatotino, faatauemu i ai ana uo, mafatia i ona puapuaga, faavauvau i le tuua o ia e lona aiga, sa faatauanauina o ia e “faifai … [i] le Atua, ma … oti ai.”4 Sa ia tetee atu i lenei faaosoosoga ma tautino atu i le taele o lona agaga malualii:
“Faauta, o i le lagi lē molimau ia te au, o i lugā foi lē ua i ai le mau ia te au.”5
“Ua ou iloa, o loo soifua lē na te togiolaina a’u.”6
Sa tumau Iopu i le faatuatua. Pe o le a tatou faia foi lea mea e tasi pe a tatou fetaiai ma o tatou luitau?
Soo se taimi lava e oo ai ia i tatou le lagona o le mamafatu o faigata o le olaga, ia tatou manatua na uia foi e isi lea lava ala e tasi, na onosaia, ma manumalo ai.
O le talafaasolopito o le Ekalesia i lenei tisipenisione o le atoaga o taimi, ua faatumulia i aafiaga a i latou na tauivi ma faigata ae na tumau pea ma le mausali ma le fiafia. O le a le mafuaaga? Aua ua latou avea le talalelei a Iesu Keriso ma taulaiga o o latou olaga. O le mea lea o le a tatou onosaia ai soo se faigata e oo mai. O le a tatou oo pea i luitau faigata, ae o le a mafai ona tatou taulimaina, faafetaia’ia ma le lototele, ma o ese mai ai ma le manumalo.
Mai tofaga o tiga, mai aluga o loimata, e siitia i lugā i le lagi i tatou e lena famautinoaga ma le folafolaga taua: “Ou te le tuua lava oe, ou te le tuulafoai lava ia te oe.”7 O sea faamafanafanaga e lemafaatauina.
Ao ou faimalaga ai i le salafa o le lalolagi e faataunuu ia tiutetauave o lo’u valaauga, ua ou iloa ai le tele o mea—e aofia ai le mea moni e faapea e oo i tagata uma le faanoanoa ma mafatiaga. E le mafai ona ou amata fuatiaina ia lototiga uma ma faanoanoaga ua ou molimauina ao ou asiasi atu ia i latou o loo feagai ma faanoanoaga, aafia i gasegase, feagai ma le tatalaga o faaipoipoga, tauivi ma se atalii po o se afafine faalogogata, po o ua puapuagatia i taunuuga o agasala. E le uma le lisi, aua e le mafaitaulia ia faafitauli e mafai ona tatou oo i ai. Ina ia ta’ua na o se faafitauli faigata se tasi, ma soo se taimi lava ou te mafaufau ai i luitau, ou te manatua lava ia Uso Brems, o se tasi o ou faiaoga o le Aoga Sa a o ou tamaitiiti. O ia o se tagata faamaoni o le Ekalesia, o se tamalii e tumu i le alofa. O ia ma lona faletua, o Sadie, e toavalu le la fanau, o le toatele o i latou e tupulaga lava ma ē o lo matou aiga.
Ina ua uma le ma faaipoipoga ma Frances ma malaga ese mai le uarota, lea sa ma vaaia ai ia Uso ma Tuafafine Brems ma tagata o lo latou aiga i faaipoipoga ma maliu, faapea ai ma faatasiga a le uarota.
I le 1968 na maliu ai le faletua o Uso Brems, o Sadie. A o alua’i tausaga sa maliliu foi le isi toalua o lana fanau e toavalu.
I se tasi aso toeitiiti atoa le 13 tausaga talu ai, sa telefoni mai ai le afafine ulumatua o se tasi o fanau a Uso Brem ia te au. Sa ia faamalamalama mai o lona tamamatua ua atoa lona aso fanau lona 105. Sa ia fai mai, “O loo nofo o ia i se tamai fale e tausi ai tagata matutua ae e feiloai ma lona aiga atoa i Aso Sa taitasi, lea na te faia ai se lesona o le talalelei.” Sa ia faaauau, “O le Aso Sa lea na tuanai atu na faasilasila mai ai e Tamamatua ia i matou, “Au pele, o le a ou oti i le vaiaso lenei. E mafai ona outou valaau atu ia Tommy Monson. O le a ia silafia le mea e fai.’”
Sa ou asiasi atu ia Uso Brems i le afiafi lava na sosoo ai. Ua fai si umi ou te lei toe vaai ia te ia. Sa le mafai ona ou talanoa ia te ia, aua ua tutuli. Sa le mafai ona ou tusia se savali mo ia e faitau, ona ua tauaso o ia. Sa tau mai ia te au e talanoa atu le aiga ia te ia, i le tago o le tagata uu le tamailima o lona lima taumatau ma tusi ai i luga o lona alofilima agavale le igoa o le tagata o loo asiasi atu. Soo se feau lava e ao ona faia i lea lava ala e tasi. Sa ou mulimuli i le faiga lea i le uuina o lona tamailima ma sipela ai le “T-O-M-M-Y M-O-N-S-O-N,” le igoa lea sa ia iloaina ai lava au. Sa amata ona fiafia ia Uso Brems ma, uu atu ou lima ma tuu i luga o lona ao. Sa ou iloaina lona manao ia maua sona faamanuiaga faaleperisitua. O le avetaavale na avatua au i le nofoaga mo tagata matutua na ma auai faatasi a o tuu o ma lima i luga o le ao o Uso Brems ma tuu atu le faamanuiaga na manaomia. Ina ua maea, na tafe ifo loimata mai ona fofoga tauaso. Sa ia uumauina o ma lima ma le agaga faafetai. E ui sa ia lei lagonaina le faamanuiaga na ma tuu atu ia te ia, ae sa malosi le Agaga, ma ou te talitonu na musuia o ia e iloa sa ma tuu atua le faamanuiaga na ia moomia. O lenei tamalii tausaafia sa le mafai ona toe vaai. Sa le mafai ona ia toe faalogo. Sa taofia o ia i le po ma le ao i se tamai potu i se fale mo tagata matutua. Ae o le ‘ata‘ata mai ona foliga ma upu na ia tautala ai na ootia ai lo’u loto. “Faafetai lava,” sa ia fai mai ai. “E ese le lelei o lo’u Tama Faalelagi ia te au.”
I totonu o le vaiaso, e pei ona sa muai faailoa mai e Uso Brems, na maliu ai o ia. Sa lei mafaufau o ia i mea ua ia le mauaina; ae, sa ia matua lotofaafetai lava e le aunoa mo le tele o ona faamanuiaga.
O lo tatou Tama Faalelagi, o le o loo tuuina mai ia i tatou le tele o mea e fiafia ai, ua Ia silafia foi tatou te aoao ma tuputupu ae ma malosi atili ao tatou fetaiai ma manumalo mai tofotofoga ia e tatau ona tatou pasia. Ua tatou iloa e i ai taimi o le a tatou lagonaina ai le faanoanoa o le lotonutimomoia, o taimi tatou te faavauvau ai, ma taimi atonu o le a tofotofoina ai i tatou i le mea e gata ai. Peitai, o ia faigata e faatagaina ai i tatou ia suia mo le lelei sili atu, ia toe fausia o tatou olaga i le ala ua aoao ai i tatou e lo tatou Tama Faalelagi, ma ia avea ma se tagata e ese mai le tagata sa tatou avea ai—ia lelei atu nai lo le mea sa tatou i ai, sili atu ona malamalama nai lo le mea sa tatou i ai, sili atu ona tigaalofa nai lo le mea sa tatou i ai, faatasi ai ma ni molimau malolosi atu nai lo a tatou molimau sa i ai muamua.
E tatau ona avea lenei ma a tatou faamoemoega—e le gata ia tumau ma onosai, ae ia faapena foi ona faamamaina atili faaleagaga a o tatou ola i taimi lelei ma taimi leaga. Ana le seanoa mo luitau ia faatoilaloina ma faafitauli ia foiaina, semanu o le a tatou tumau ai lava i le mea e tasi, i sina alualu i luma pe leai foi e agai atu i la tatou sini o le ola e faavavau. Sa faailoa mai e le fatusolo lea lava manatu e tasi i nei upu:
O laau lelei e le tutupu ae i ni tulaga lelei,
O le malosi o le agi o le savili, o le malolosi foi na o laau lelei.
O le maualuga o le lagi, o lo latou tutupu uumi foi lena,
O le tele o matagi, o lo latou malolosi foi lena.
E ala i le la, ma le malulu, le kiona ma uaga,
E maua ai laupapa lelei i laau ma uiga lelei i tagata.8
Ua na o le Matai lava Na te silafiaina le o’oo’o o o tatou tofotofoga, o tatou tiga, ma o tatou mafatiaga. E na o Ia lava tatou te maua ai le filemu e faavavau i taimi o faigata. Ua na o Ia lava e pa’i mai i o tatou agaga ua faamanualia i Lana fetalaiga faamafanafana:
“O mai ia te au, o outou uma o e tigaina ma mafatia i avega, o au foi e malolo ai outou.
“Ia outou amoina la’u amo, ma ia outou faaa’oa’o ia te au, aua o au le agamalu, ma le loto maulalo, ona maua lea e outou o le malologa mo outou agaga.
“Aua e avegofie la’u amo, o la’u avega foi e māmā ia.”9
Pe o ni taimi sili ona lelei po o taimi foi e sili ona leaga, o loo i ai lava o Ia faatasi ma i tatou. Ua Ia folafola mai o le a le suia lava lenei mea.
Ou uso e ma tuafafine, tau ina ia tatou faia se tautinoga i lo tatou Tama Faalelagi e le femoumouai i taimi po o faafitauli o o tatou olaga. E le tau manaomia ona tatou oo i faigata mo i tatou lava ina ia manatua ai o Ia, ma e le tatau ona faamalosia i tatou e lotomaualalo a o lei tuu atua ia te Ia lo tatou faatuatua ma le faalagolago.
Ia tatou taumafai i taimi uma ia latalata atu i lo tatou Tama Faalelagi. O le faia o lea mea, e tatau ona tatou tatalo atu ia te Ia ma faalogo atu ia te Ia i aso uma. Tatou te manaomia moni lava o Ia i taimi uma, e tusa lava pe o taimi lelei po o taimi leaga. Ia tatou manatua e le aunoa Lana folafolaga: “Ou te le tuua lava oe, ou te le tuulafoai lava ia te oe.”10
Faatasi ai ma le malosi uma o lo’u agaga, ou te molimau atu ai o loo soifua le Atua ma e alofa ia i tatou, sa soifua ma maliu Lona Alo e Toatasi na Fanaua mo i tatou, ma o le talalelei a Iesu Keriso o le malamalama lea e susulu i taimi faigata o o tatou olaga. Ia faapena lava, ou te tatalo ai i le suafa paia o Iesu Keriso, amene.