O Le Ki i le Puipuiga Faaleagaga
E mafai ona oo mai le toafilemu i loto o tagata taitoatasi o e liliu atu i tusitusiga paia ma tatalaina folafolaga o le puipuiga ma le togiola.
I se taimi e le’i mamao atu, sa ou faamauina ai se ulugalii talavou i le malumalu. O lenei ulugalii sa tausisia lo laua agavaa ina ia taunuu atu i le aso matagofie lea e tuua ai e se atalii ma se afafine aiga o lo latou talavou ae avea ma tane ma ava. I lenei sauniga paia, sa paia ma mama i la’ua. I le aluga o le taimi, o le a amata ona laua tausia ni a laua lava fanau, e ogatasi ma le mamanu ua faavaeina e lo tatou Tama oi le Lagi. O lo laua fiafia, ma le fiafia o augatupulaga i le lumanai, e faalagolago lea i le ola ai i na tulaga faatonuina ua faatulagaina e le Faaola ma faamalamalama mai i Ana tusitusiga paia.
Ua mafaufau mātua i aso nei pe o i ai se nofoaga saogalemu e tausi ai le fanau. O loo i ai se nofoaga saogalemu. O loo i ai i totonu o se aiga e faaogatotonu i le talalelei. Tatou te taulai atu i le aiga i le Ekalesia, ma tatou te fautuaina mātua i soo se mea ia tausi a latou fanau i le amiotonu.
Na vavalo ma lapatai mai le Aposetolo o Paulo e faapea “o ona aso e gata ai e oo mai ai aso faigata.
“Aua e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i matua, o e le faafetai, o e amio leaga,
“O e le lotoaiga, o e tuumavaega, o e faatuaupua, o e le taofi manao o le tino, o e faasaua, o e le alolofa i tagata amio lelei,
“O e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua;
“O e ua peiseai ua amio Atua, a o le mana ua i lea mea ua latou teena: ia e alo ese lava i tagata faapena.”1
Na valoia foi e Paulo, “A o tagata amio leaga ma e taupelopelo, e alualu pea lava lo latou leaga, o loo faasese atu, ua faaseseina foi i latou.”2
O nei fuaiupu ua avea o se lapataiga, ua faaalia ai ia mamanu ia alo ese mai ai. E tatau ona tatou matuai mataala ma filiga. E mafai ona tatou iloiloina taitasi nei valoaga ma tuu i ai se faailoga faasa’o i autafa e faailoa ai ua i ai i le taimi nei ma o se popolega i le lalolagi i aso nei:
Taimi faigata—ua i ai. Ua tatou ola i taimi ua sili ona matautia.
O e mananao i tupe, o e loto vii, o e faamaualuga—ua i ai uma ma o loo i ai ia i tatou.
O e upuleaga, o e le faalogo i matua, o e le faafetai, o e amio leaga, o e le loto aiga—o nei mea uma ua taatele.
O e tuumavaega, o e faatuaupua, ma isi mea faapena—o ia mea uma e mafai ona faailoga faasa’o ua i ai e fua i faamaoniga uma ua siomia ai i tatou.
Sa saunoa foi Moronae i le amioleaga o o tatou aso ina ua ia lapatai mai:
“Pe a outou vaai ua oo mai nei mea i totonu ia te outou … o le a outou feala mai i se lagona o lo outou tulaga leaga matautia. …
“O le mea lea, na poloaiina ai a’u, o Moronae, ia ou tusia nei mea, ina ia aveesea le leaga, ma ina ia oo mai ai le taimi e le mafai ai e Satani ona toe maua se mana i loto o le fanauga a tagata, ae ina ia mafai ona faatauanauina o i latou ia latou faia le lelei e le aunoa, ina ia mafai ona latou o mai i le puna o le amiotonu uma ma faaolaina i latou.”3
O faamatalaga ua tuuina mai e Paulo ma Moronae e uiga i o tatou aso e matuai sa’o lava e le mafai ai ona le amanaiaina. Mo le toatele atonu e fai si atuatuvale, ma faavaivailoto. E ui i lea, a ou mafaufau i le lumanai, e faagaeetia a’u i lagona o le mautinoa o le a lelei mea uma.
I le faaaliga a Paulo, e faaopoopo atu i le lisi o luitau ma faafitauli, ua ia ta’u mai foi ia i tatou mea e mafai ona tatou faia e puipuia ai i tatou lava:
“A o oe ia e tumau i mea ua aoaoina ai oe, ma ua mautinoa ia te oe, ina ua e iloa o ia na aoao atu ai ia te oe;
“Talu foi ina o e tama itiiti ua e iloa Tusi Paia, e mafaia ona faapoto ai ia te oe e iu ai i le ola i le faatuatua ua ia Keriso Iesu.”4
O tusitusiga paia o loo i ai ki i le puipuiga faaleagaga. O loo i ai aoaoga faavae ma tulafono ma sauniga o le a faapea ona aumaia ai fanau taitoatasi a le Atua i se molimau ia Iesu Keriso o le Faaola ma le Togiola.
Faatasi ai ma le tele o tausaga o tapenapenaga, sa i ai se taumafaiga tele ina ia maua tusitusiga paia i gagana uma, faatasi ai ma vaefaamatalaga ma mau e faasino i ai. Matou te taumafai ia maua e i latou uma o e mananao ia aoaoina. E aoao mai ia i tatou po o fea e o i ai ae o a foi mea e fai. Latou te tuuina mai le faamoemoe ma le malamalama.
I tausaga ua mavae, sa aoao mai ia te a’u e Elder S. Dilworth Young o le Fitugafulu se lesona e uiga i le faitauina o tusitusiga paia. Sa tauivi se siteki ma feteenaiga ma faigata i ona tagata auai, ma sa manaomia ona tuuina atu i ai se fautuaga.
Sa ou fesili atu ia Peresitene Young, “O le a sa’u tala e tatau ona fai atu?”
Na pau lava lana tali, “Ta’u atu ia i latou e faitau tusitusiga paia.”
Sa ou fesili, “O le fea tusitusiga paia?”
Na fai mai o ia, “E le afaina tele. Ta’u atu ia i latou e susue i le Tusi a Mamona, mo se faataitaiga, ma amata ona faitau. O le a le pine ae oo mai lagona o le toafilemu ma musumusuga, ma o le a oo mai ai lava se tali.”
Ia fai le faitauina o tusitusiga paia ma se vaega o lau fuafuaga masani, ma o le a mulimuli mai ai faamanuiaga. O loo i ai i totonu o tusitusiga paia se leo o le lapataiga, ae o loo i ai foi le tele o faamalosiauga.
Afai o le taimi muamua e foliga mai ia te oe e ese lava le gagana a tusitusiga paia, ia faitau pea. O le a le pine ae e iloa le matagofie ma le mana e maua i na itulau.
Fai mai Paulo, “O Tusi Paia uma lava e mai le Agaga o le Atua ia, e aoga foi ia e aoao ai, e aoai ai, e faatonu ai, e faapoto ai foi i le amiotonu.”5
E mafai ona e tofotofoina lenei folafolaga mo oe lava.
Ua tatou ola i taimi faigata; ae ui i lea, e mafai ona tatou maua le faamoemoe ma le filemu mo i tatou lava ma mo o tatou aiga. O i latou o e nonofo i le faanoanoa, lagona o le leai o se faamoemoe i le avanoa e laveai mai ai fanau mai le mea ua ave atu i ai e le lalolagi i latou, e le tatau ona fiu. “Aua e te mata’u, tau lava ina e faatuatua.”6 O le amiotonu e sili atu le malosi nai lo o le amioleaga.
O fanau e vave aoaoina i le olaga i se malamalamaaga o tusitusiga paia, o le a oo ina iloa le ala e tatau ona latou savavali ai ma o le a matele le lilifa atu ia tumau i lena ala. O i latou e se ese o le a i ai le gafatia e toe foi mai ai ma, faatasi ai ma le fesoasoani, e mafai ai ona latou toe maua lo latou ala e foi mai ai.
Sa tau faasaga atalii o Mosaea i le Ekalesia mo se taimi, ae na mulimuli ane salamo ma uia se suiga tele. I le Alema tatou te faitau ai, “O atalii nei o Mosaea … sa latou matua malolosi i le malamalama o le upumoni; ona o i latou o ni alii mafaufau lelei ma sa latou suesue i tusitusiga paia ma le filiga, ina ia latou iloa le afioga a le Atua.”7
O le Peresitene o Iosefa F. Samita sa lima ona tausaga i le taimi na fasiotia ai lona tuaa o Ailama, i le Falepuipui i Karefasi. Mulimuli ane, na sopoia ai e Iosefa laufanua valevalenoa faatasi ma lona tina ua maliu lana tane.
I le 15 o ona tausaga sa valaauina ai o ia i se misiona i Hawaii. Sa ia lagona le le mautonu ma le tuua toatasi ma faapea mai: “Sa matuai ou popole lava. … Sa ou lagonaina sa pei na matuai faalumaina a’u i lo’u tulaga o le mativa, leai o se atamai ma se poto, ae ua na o se taulealea, ua tau le mafai ona ou tilotilo sa’o i foliga o [soo se tasi].”
A o mafaufau loloto i se tasi po i ona tulaga faigata, sa fai ai se miti a Iosefa e faapea, sa alu o ia i se malaga, sa nanati solo i le vave sa na mafaia. Sa ia feaveaia se afifi laitiiti. Mulimuli ane, na tau atu ai o ia i se maota matagofie, lea sa avea ma ona taunuuga. A o latalata atu i ai o ia, sa ia vaaia ai se faailo na faitauina, “Faamālū.” Sa telea’i o ia i totonu e faamālū. Sa ia tatalaina lana afifi laitiiti ma maua ai, ni laei papae. “o se mea,” na ia fai mai ai, “ou te le’i vaaia mo se taimi umi lava.” Sa ia faamauluina ma nanati atu loa i le faitotoa o le maota.
“Sa ou tuitui i ai,” o lana tala lea, “ma na tatala mai le faitotoa, ma o le tagata sa tu ai iina o le Perofeta o Iosefa Samita. Sa tagai mai o ia ia te a’u ma si aoaiga, ma o upu muamua lava sa ia saunoa mai ai [o le]: ‘Iosefa, ua e tuai.’ Ae sa ou fai atu ma le to’a:
“‘Ioe, ae ua ou mamā—ua ou mamā!’”8
Ma e mafai foi ona faapena mo i tatou taitoatasi.
Afai o e malaga i se ala o le faatuatua ma malosi i le Ekalesia, ia tumau i le ala ma tausi au feagaiga. Ia agai pea i luma seia oo i le taimi o le a oo atu ai faamanuiaga a le Alii ia te oe, ma o le Agaga Paia o le a faaali atu o se malosiaga faatosina i lou olaga.
Afai o loo e i ai nei i se ala e agai ese mai le ala ua faatulagaina i tusitusiga paia, ou te faamautinoa atu ia te oe, o loo i ai se auala e toe foi mai ai.
Ua tuuina mai e Iesu Keriso se auala e sili ona manino mo i tatou ia salamo ma maua ai le faamalologa i o tatou olaga. O le fofō mo le tele o measese e mafai ona maua e ala i le sailia o le faamagaloga e ala i tatalo faaletagata lava ia. Ae peitai, o loo i ai ni gasegase faaleagaga ua mautinoa, ae maise lava e faatatau i le solia o tulafono o le ola mama, lea e matuai manaomia ai le fesoasoani ma togafitiga a se fomai agavaa faaleagaga.
I tausaga ua mavae sa oo mai ai i lo’u ofisa se tamaitai talavou ma lona tamā ua matua. Sa ia aumaia o ia i ni maila se tele e su’e se fofō o le lagona ta’usalaina sa ia lagonaina. A o avea ma se alii talavou, sa ia solia ai se measese ogaoga, ma i lona soifua matua, sa ia toe manatua ai le mea na tupu. Sa le mafai ona ia aveesea le lagona o le tausalaina. Sa le mafai ona toe foi i tua e toe faalelei na o ia le faafitauli o lona talavou, ae sa mafai ona ia amata atu i le mea sa i ai o ia ma, faatasi ai ma le fesoasoani, sa aveeseina ai le lagona tausalaina lea sa taumulimuli ia te ia i na tausaga uma.
Sa ou faafetai ona e ala i le aoaoina o ia i mataupu faavae mai le Tusi a Mamona, sa pei ai na aveesea se avega tele mai ona tauau. Ina ua la toe foi ma lona afafine i le fale i na maila e tele, sa tuua ai e le toeaina le tausalaina o soligatulafono ua mavae.
Afai tou te “feala mai i se lagona o lo outou tulaga leaga matautia”9 ma manao e toe foi i le maloloina atoatoa faaleagaga, vaai lou epikopo. O loo ia umiaina ki ma e mafai ona fesoasoani ia te oe i le ala o le salamo.
O le salamo e mo tagata taitoatasi, e faapena foi i le faamagaloga. E pau le mea e finagalo i ai le Alii, ia liliu ese mai se toatasi mai ana agasala, ma o le a “[Ia] faamagalo i a latou amio leaga, ma … le toe manatua a latou agasala.”10
A maea le faagasologa o le salamo, o le a oo ina e malamalama i le uiga o le folafolaga a Isaia e faatatau i le Togiola: “O loo faapea mai Ieova, o mai ia, ina tatou filifili ia: e ui lava ina pei o ofu mūmū a outou agasala, e sisina ia e pei o le kiona; e ui lava ina mūmū ia e pei o le ie ulaula, e avea e pei o fulufulu mamoe.”11
E pei lava ona mafai ona aveese le sioka mai se laupapa uliuli, faatasi ai ma le salamo faamaoni, e mafai ai ona soloesea taunuuga o o tatou soligatulafono, e ala i le Togiola a Iesu Keriso. O lena folafolaga e faatatau i tulaga uma lava.
E aoao mai e le talalelei i tatou ia fiafia, ia faatuatua nai lo o le mata’u, ia maua le faamoemoe ae faatoilalo le faanoanoa, ia tuua le pouliuli ae liliu atu i le malamalama o le talalelei e faavavau.
Na lapatai mai Paulo ma isi e uiga i tofotofoga o o tatou taimi ma aso o le a oo mai. Peitai e mafai ona oo mai le toafilemu i loto o tagata taitoatasi o e liliu atu i tusitusiga paia ma tatalaina folafolaga o le puipuiga ma le togiola o loo aoaoina ai iina. Matou te valaaulia tagata uma ia liliu atu i le Faaola o Iesu Keriso, i Ana aoaoga e pei ona maua i le Feagaiga Tuai, le Feagaiga Fou, le Tusi a Mamona, le Mataupu Faavae ma Feagaiga, ma le Penina Tau Tele.
E tuuina atu la’u molimau mautinoa e uiga i tusitusiga paia o se ki i lo tatou puipuiga faaleagaga. Ou te molimau atu foi i le mana faamalolo o le Togiola a Iesu Keriso, “ia mafai ona faaolaina e ala ia te ia i latou uma”12 o e o le a laveaiina. Ua toe faatuina le Ekalesia a le Alii i le lalolagi. Ou te molimau atu i le moni aiai o le talalelei. O a’u o se molimau ia te Ia. I le suafa o Iesu Keriso, amene.