Faalatalata Atili i le Atua
E finagalo lo tatou Faaola ia tatou alolofa moni ia te Ia e oo i le tulaga tatou te faaogatasi ai o tatou loto ma Lona finagalo.
O le atalii o le ma tama teine e ono tausaga, o Oli, o le e valaauina ma le agaalofa au ia “Poppy,” sa alu e aumai se mea mai le taavale . Sa tu lona tama ma matamata mai totonu o le fale, e aunoa ma le iloaina e Oli, sa ia tatalaina le faitotoa o le taavale i le tamai masini faatonutonu (remote) a o latalata atu i ai Oli, ma toe lokaina ina ua uma. Ona momoe mai lea o Oli i totonu ma se ataata tele!
Sa fesili atu uma le aiga ia te ia, “Sa faapefea ona e faia ia matala le faitotoa o le taavale mo oe, ma toe lokaina?” Sa na ona ia ataata.
Sa fai mai lo ma afafine, o lona tina lea, “Atonu e pei ona faia e Poppy, e matala le taavale e aunoa ma le pa’i i ai—leiloa pe i ai ni au mana faamaneta e pei o ia!”
Ina ua faalua ona tupu i ni nai minute mulimuli ane, o lana tali i isi fesili e uiga i ona tomai fou ua maua o le: “E ofoofogia! Ou te manatu ona e alofa Poppy ia te au ma o se tasi o au uo mamae, ma na te tausia au!”
Ua faamanuiaina au i le iloaina o mea moni faavavega sa tutupu i olaga o Au Paia faatuatua i Aferika, Papua Niu Kini, Ausetalia, Niu Sila, ma atumotu o le Pasefika. Ou te ioeina faatasi ma Oli—Ou te manatu ona e lagona e na tagata faatuatua le auala e tasi e uiga i le Tama Faalelagi ma le Faaola e pei ona lagona e Oli e uiga ia te au. Latou te alolofa i le Atua e pei o se uo mamae, ma Na te tausia i latou.
O tagata o lenei Ekalesia ua i ai le aia e maua ai, ma e toatele ua mauaina, se molimau faaleagaga ma osia feagaiga e mulimuli i le Alii. Ae e ui i lena mea, o loo agai atu pea nisi ia te Ia ae o isi e leai. O le fea o nei vaega o e i ai?
E tatau ona faatotonugalemu le Atua i o tatou olaga—lo tatou taulaiga moni lava. O Ia? Pe o nisi taimi o mamao mai o tatou mafaufauga ma faamoemoega o o tatou loto? (tagai Mosaea 5:13). Ia matau e le na o mafaufauga o o tatou loto e taua ae o “faamoemoega” foi. E faapefea e a tatou amioga ma faatinoga ona faaali atu le faamaoni o o tatou faamoemoega?
O le ma atalii o Ben, a o 16 ona tausaga ma a o lauga atu i le konafesi a le siteki, sa ia fesili: “O a ni ou lagona pe afai e folafola atu e se tasi ia te oe se mea i vaiaso uma ae le tausiaina lana folafolaga?” Sa ia faaauau faapea, “Pe mamafa ea ia i tatou le folafolaga o loo tatou faia pe a tatou aai i le faamanatuga faapea ma le feagaiga e tausi i Ana poloaiga ma manatua pea o Ia?”
Ua tuuina mai e le Alii ia i tatou auala e fesoasoani ai ia tatou manatua o Ia ma Lona mana e lagolago ai tatou. O se tasi o auala o le vaega taatele lea tatou te oo uma i ai—o puapuaga (tagai Alema 32:6). A ou toe manatu i tofotofoga sa ou feagai ai, e manino lava o mea ia ua ou taunuu ai i lou tuputupuae, malamalama, ma le agaalofa. O mea ia ua ou latalata atili ai i lou Tama Faalelagi ma Lona Alo faatasi ma aafiaga ma le faamamaina ua avea ma se vaega loloto ia te au.
O taitaiga ma faatonuga a le Alii e taua. Sa ia fesoasoani i le uso faatuatua o Iareto e ala i le foiaina o se tasi o ona luitau e lua ina ua Ia tau atu ia te ia le ala e maua ai le ea fou i totonu o vaa sa fausiaina ma le usiusitai (tagai Eteru 2:20). Ae, o le mea taua, sa le gata ina tuua e le Alii o latou faafitauli e le foiaina mo se taimi le tumau e uiga i le auala e maua ai le malamalama [i totonu o vaa], ae sa Ia faamanino atu e faapea o Ia, o le Alii, o le a faatagaina faigata ma tofotofoga e manaomia mo le foiaina o na luitau. O le Alii lava o le a Ia auina atu matagi, o uaga, ma lologa (tagai Eteru 2:23–24).
Aisea Na te faia ai lena mea? Ma aisea Na te lapataia ai i tatou ia aveesea i tatou lava mai se mafuaaga o le lamatia, ae mafai lava ona Ia taofia le tupu o se faalavelave? Sa faamatala e Peresitene Uilifoti Uitilafi le tala e uiga i le lapataiina faaleagaga e aveese le taavale solofanua sa latou momoe ai ma lona toalua ma le la tama, ma molimauina i se taimi mulimuli ane, le seiina i luga e se asiosio o se laau tele mai le tafue ma palasi tonu i le mea sa tu muamua ai le taavale solofanua. (tagai Aoaoga a Peresitene o le Ekalesia: Wilford Woodruff [2004], 49).
I nei faataitaiga uma e lua, sa ono mafai ona fetuunai le tau e aveese ai faalavelave matautia. Ae o le manatu lenei—nai lo le foiaina o le faafitauli e le Alii lava Ia, ua finagalo ai o Ia ia tatou atiina ae le faatuatua o le a fesoasoani ia i tatou e faalagolago ai ia te Ia, i le foiaina o o tatou faafitauli ma faatuatuaina o Ia. Ona tatou lagonaina pea lea o lona alofa i taimi uma, sili atu ona mamana, sili atu ona manino, ma sili atu ona patino. E oo ina tatou lotogatasi ma Ia, ma mafai ona tatou avea e pei o Ia. O Lona faamoemoega o lo tatou avea lea e faapei o Ia. E moni lava, o Lana galuega ma Lona Mamalu foi (tagai Mose 1:39).
Sa taumafai se tamaitiiti laitiiti e faamafolafola le vaega sa i ai le palapala i tua o lona fale ina ia mafai ai ona ia taalo i ana taavale iina. Sa i ai se maa lapoa sa faalavelave i lana galuega. Sa tulei ma toso e le tamaitiiti ma lona malosi atoa, ae e tusa lava po o le a le malosi na taumafai ai, ae sa le mafai ona minoi le maa.
Sa matamata mai i ai lona tama mo sina taimi ona ia sau lea i lona atalii ma fai i ai, “E manaomia ona e faaaogaina uma lou malosi e aveese ai se maa tele faapea.”
Sa tali le tamaitiiti, “Sa ou faaaogaina uma lou malosi!”
Sa faasaoina o ia e lona tama: “Leai e te le i faaaogaina uma. E te le i mauaina lau fesoasoani!”
Ona la punonou faatasi lea i lalo ma aveese ma le faigofie le maa.
O le tama o lau uo o Vaiba Rome, o le uluai peresitene lea o le siteki i Papua Niu Kini, sa aoaoina foi e mafai ona ia liliu atu i lona Tama i le Lagi i taimi e manaomia ai. Sa mafai e ia ma tagata sa nonofo i le nuu ona ola i mea toto sa latou totoina. I se tasi aso sa ia tutuina se afi e faamama ai lana vaega o le faatoaga a le nuu mo le totoina. Peitai, sa amataina le afi e ala i se vaitaimi o le mugala faaumiumi, ma sa mamago ai laau. O lana afi sa pei o le afi a Peresitene Thomas S. Monson, e pei ona sa faamatalaina e lo tatou perofeta lava ia i le konafesi aoao ua mavae (tagai, “O Le Usiusitai e Aumaia ai Faamanuiaga,” Liahona, Me 2013, 89–90). Sa amata ona sosolo le afi i laufanua vaoa ma laau, ma i upu a lona atalii, sa oo ai i “se afi matautia tele.” Sa ia fefe ma popole mo tagata o le nuu faapea ai ma le ono faaleagaina o a latou mea toto. A faatamaiaina meatoto, o le a faasalaina o ia e le fono a le nuu. O le le mafai ai ona tapeina le afi, o lea sa ia manatua ai le Alii.
Ou te sii mai upu a lona atalii, o la’u uo: “Sa ia tootuli i le maupuepue i le togavao ma amata ona tatalo i le Tama Faalelagi ia taofia le afi. Sa faafuasei lava ona faamalumalu mai i ona luga se ao pogisa tele i le mea sa ia tatalo ai, ma sa matuai timu malosi—ae sa na o le mea lava na sasao ai le afi. Ina ua ia autilo solo, sa manino le lagi i mea uma sei vagana ai le mea sa mumu ai le afi. Sa ia le matalitonuina o le a tali mai le Alii i se alii faatauvaa e pei o ia, ma sa ia toe tootuli ai ma tagitui e pei o se tamaitiiti. Sa ia faapea mai o se lagona aupito sili ona matagofie tele” (tagai Alema 36:3).
E finagalo lo tatou Faaola ia tatou alolofa moni ia te Ia e oo i le tulaga tatou te faaogatasi ai o tatou loto ma Lona finagalo. Ona mafai lea ona tatou lagonaina Lona alofa ma iloa Lona mamalu. Ona mafai lea ona Ia faamanuia i tatou i le ala e finagalo ai o Ia. Sa tupu lenei mea ia Nifae le atalii o Helamana, o le sa oo i le tulaga na matua faatuatuaina atoa ai o ia e le Alii ma, ona o lena mea, sa mafai ona faamanuia o ia e le Alii i mea uma sa ia ole atu ai (tagai Helamana 10:4–5).
I le Life of Pi, le tusi fatu sa tusia e Yann Martel, sa faamatalaina e le toa ona lagona e uiga ia Keriso: “Sa le mafai ona ou aveesea o Ia mai lou mafaufau. Ua le mafai lava. Sa ou faaaluina aso atoa e tolu e mafaufau ai ia te Ia. O le tele lava o lou mafaufau ia te Ia, o le le mafai foi lena ona ou faagalo ia te Ia. Ma o le faatele lava ona ou aoao ia te Ia, o le itiiti foi lena o lo’u fia alu ese mai ia te Ia” ([2001], 57).
O ou lagona moni na e uiga i le Faaola. E latalata mai o Ia i taimi uma, aemaise lava i nofoaga paia ma i taimi o mafatiaga; ma o nisi taimi, pe a ou tau le mafaufau i ai, ou te lagona toetoe lava e pei e pa’i mai o Ia i lou tauau e tau mai ia te au e alofa o Ia ia te au. E mafai ona ou toe faafoi atu lena alofa i ou lava ala le atoatoa e ala i le tuuina atu ia te Ia o lou loto (tagai MF&F 64:22, 34).
I nai masina talu ai, sa ma nofonofo ai ma Elder Jeffrey R. Holland, a o ia tofiaina faifeautalai i a latou misiona. Ina ua ma o ese mai sa ia faatali mo au, ma a o ma savavali sa ia faauouo atu au. Sa ou tau atu ia te ia na ia faia foi lea lava mea e tasi ia te au i se tasi taimi i Ausetalia. Sa ia faapea mai, “O le mafuaaga ona ou te alofa ia te oe!” Ma sa ou iloa e moni lena mea.
Ou te talitonu afai tatou te mauaina le avanoa e savavali faaletino ai ma le Faaola, o le a tatou lagonaina Ona aao i o tatou tauau e faapei lava o lena. E pei o soo a o agai atu i Emau, o o tatou loto o le a “mu i totonu” (Luka 24:32). O Lana savali lenei: “O mai ia, ina matamata” (Ioane 1:39). E patino, faatauanau, ma talileleia i lana valaaulia e feafioai ai ma Ona aao o loo faauouo atu i tatou.
Tau ina ia tatou lagona uma le mautinoa e pei o Enosa, e pei ona atagia mai i le fuaiupu mulimuli o lenei tusi puupuu ae loloto: “Ma ou te olioli i le aso o le a faafouina ai lo’u tino faaletino i le tino ola pea, ma ou tu ai i ona luma; ona ou vaai ai lea i ona fofoga ma le fiafia, ma o le a fetalai mai o ia ia te a’u: Sau ia ia te a’u oe ua faamanuiaina, ua i ai se nofoaga ua saunia mo oe i maota o lo’u Tama” (Enosa 1:27).
Ona o le tele o aafiaga sa ou oo i ai ma le mana lea na molimau mai ai le Agaga ia te au, ou te molimau atu ma le mautinoa atoa o loo soifua le Atua. Ou te lagonaina Lona alofa. O se lagona suamalie tele.Tau ina ia tatou faia mea e manaomia ia ogatasi ai o tatou loto ma Lona finagalo ma alofa moni ia te Ia. I le suafa, o Iesu Keriso, amene.