Sau, Auai faatasi ma i Matou
Po o a lava ou tulaga, lou talafaasolopito patino, po o le malosi o lau molimau, o loo i ai lava se avanoa mo oe i lenei Ekalesia.
Sa i ai se alii sa fai sana miti e faapea sa i ai o ia i se fale faafiafia tele na potopoto ai uma ekalesia mai le lalolagi atoa. Sa ia iloaina o lotu taitasi na tele mea na i ai na foliga mai sa manaomia ma taua.
Sa ia feiloai atu i se ulugalii lelei sa fai ma sui o Le Ekalesia a Iesu Keriso o le Au Paia o Aso e Gata Ai ma fesili atu, “O a mea tou te manaomia mai o outou tagata?”
“Matou te le manaomia se mea mai ia i latou,” sa la tali atu ai. “Ae ua poloai mai le Alii ia matou faapaiaina mea uma.”
Sa faaauau ai le faamalamalamaga a le ulugalii e uiga i valaauga a le Ekalesia, faiaoga o aiga ma faiaoga asiasi, misiona faamamaluina, afiafi faaleaiga i vaiaso taitasi, galuega faalemalumalu, uelefea ma auaunaga alofa, ma tofiga e faiaoga.
“E totogi tou tagata mo galuega uma latou te faia?” sa fesili ai le tagata.
“Oi e leai,” sa faamalamalama atu e le ulugalii. “Latou te ofo fua atu o latou taimi.”
“Ma le isi,” sa faaauau ai le ulugalii, “e tai ono masina, ma faaalu e tagata a lo matou Ekalesia se faaiuga o le vaiaso e auai pe maimoa ai i le konafesi aoao mo le 10 itula.”
“Sefulu itula o tagata e lauga mai?” sa le talitonu le tagata.
“Ae ā tou sauniga lotu faalevaiaso? O le a le umi?”
“Tolu itula, i Aso Sa uma!”
“Oka,” sa fai mai ai le tagata. “E fai uma lava e tagata o la outou ekalesia mea ua e fai mai ai?”
“O mea na ma isi. Ma te lei tau atua talafaasolopito o aiga, tolauapiga a le autalavou, faigalotu, suesuega o tusitusiga paia, aoaoga mo taitai, gaoioiga a le autalavou, seminare i vaveao, faamama fale o le Ekalesia, ia ma le tulafono a le Alii o le soifua maloloina, o le anapogi i masina taitasi e fesoasoani ai i e matitiva, ma le sefuluai.”
Sa fai mai le alii lea, “Ia ua ou le mautonu la. Aisea o le a fia auai ai se tasi i se ekalesia faapena?”
Sa ataata le ulugalii ma fai atu i ai, “Faapea ma’ua e te le fesili mai.”
Aisea O Le A Fia Auai ai se Tasi i se Ekalesia Faapena?
I se taimi ua feagai ai le tele o ekalesia i le lalolagi atoa ma le faaitiitia naua o le faitau aofai, o Le Ekalesia a Iesu Keriso o le Au Paia o Aso e Gata Ai—e ui e laitiiti pe a faatusatusa atu i le tele o isi ekalesia—ae o se tasi lea o ekalesia aupito sili ona saoasaoa le faatupulaia i le lalolagi. E oo mai ia Setema 2013 ua silia ma le 15 miliona tagata o le Ekalesia i le lalolagi.
E tele lava mafuaaga mo lenei mea, ae e mafai lava ona ou tuu atua na o ni nai mea?
O Le Ekalesia a le Faaola
Muamua, o lenei Ekalesia na toefuatai mai i o tatou aso e Iesu Keriso lava Ia. O iinei e te maua ai le pule e galue ai i Lona suafa—e papatiso ai mo le faamagaloina o agasala, e faaee atu ai le meaalofa o le Agaga Paia, ma faamau ai i le lalolagi ma i le lagi.1
O i latou e auai i lenei Ekalesia e alolofa i le Faaola o Iesu Keriso ma naunau e mulimuli ia te Ia. Latou te olioli i le malamalama e faapea ua toe fetalai mai le Atua i tagata. A latou mauaina sauniga paia o le perisitua ma osi feagaiga ma le Atua, e mafai ona latou lagonaina Lona mana i o latou olaga.2 A latou ulufale atu i le malumalu paia, latou te lagonaina o loo latou i ai i Lona afioaga. A latou faitau i tusitusiga paia3 ma ola i aoaoga a Ana perofeta, latou te ola latalata atili i le Faaola ua latou alolofa tele i ai.
O Se Faatuatua Ola
O se isi mafuaaga ona e maua i le Ekalesia ia avanoa e fai ai mea lelei.
O le talitonu i le Atua e tauleleia, ae o le tele lava o tagata e mananao e fai ni mea e sili atu nai lo le faalogo i lauga musuia po o le moemiti i o latou maota i le lagi.4 Latou te mananao e faatino lo latou faatuatua. Latou te mananao e afe i luga lima o o latou ofu ma punouai i lenei galuega tele.
Ma o le mea lena e tupu pe a latou auai faatasi ma i matou—e tele avanoa latou te mauaina e liliu ai a latou taleni, agaalofa, ma taimi i ni galuega lelei. Ona e talu ai e leai ni a matou faifeau totogi i a matou faalapotopotoga i le lalolagi atoa, o lea e faatino ai e o matou tagata lava ia le galuega o le auauna atu. E valaauina i latou e ala i musumusuga. O nisi taimi matou te ofo fua atu; o isi taimi e talosagaina i matou e “galulue fua.” Matou te le vaai i tofiga o ni avega ae o ni avanoa e faataunuu ai feagaiga ua matou osia ma le fiafia e auauna atu i le Atua ma Ana fanau.
O Faamanuiaga Silisili
O se mafuaaga lona tolu i le mea e ala ai ona auai tagata i le Ekalesia ona o le savali ai i le ala o le avea ma soo e taitai atu ai i faamanuiaga silisili.
Matou te vaai atu i papatisoga o le vaega amata lea i la matou malaga i le avea ai ma soo. O la matou savaliga i aso taitasi ma Iesu Keriso e taitai atu i le filemu ma faamoemoega i lenei olaga ma le olioli loloto atoa ai ma le faaolataga e faavavau i le lalolagi a sau.
O i latou e mulimuli i lenei ala ma le faamaoni e aloese mai le tele o mea lamatia, faanoanoaga, ma mea sese o le olaga.
O e lotomaualalo ma faamaoni i le loto latou te mauaina oa sili o le malamalama iinei.
O e mafatia pe faavauvau latou te mauaina le faamalologa iinei.
O e ua pologa i le agasala latou te mauaina le faamagaloga, saolotoga, ma le malologa.
Ia i Latou o E ua O Ese
O le sailiga mo le upumoni ua taitai atu ai le faitau miliona o tagata i Le Ekalesia a Iesu Keriso o le Au Paia o Aso e Gata Ai. Peitai, ua i ai nisi ua tuua le Ekalesia sa pele ia i latou.
Atonu e fesili se tasi, “Afai e matagofie tele le talalelei, aisea la o le a alu ese ai se tasi?”
O nisi taimi tatou te manatu ai ona ua faamanualiaina o latou loto po o le paie, po o le agasala. Ae, e le o se mea faigofie. O le mea moni, e le na o se tasi se mafuaaga e faatatau i le tele o tulaga eseese.
O nisi o o tatou tagata pele o loo tauivi mo le tele o tausaga ma le fesili, pe tatau ona vavaeese i latou lava mai le Ekalesia.
I lenei Ekalesia lea e matua malosi ai le faamamaluina o le faitalia o le tagata lava ia lea na toefuatai mai e se alii talavou na fesiligia ni fesili ma saili ai ni tali, tatou te faaaloalogiaina i latou o loo saili atu ma le faamaoni mo le upumoni. Atonu e ono nutimomoia o tatou loto pe a aveesea i latou mai le Ekalesia tatou te alolofa i ai ma le upumoni ua tatou mauaina, ae tatou te faamamaluina a latou aia tatau e tapuai ai i le Atua Silisili Ese e tusa ai ma o latou lava loto fuatiaifo, e pei lava ona tatou mauaina lena lava avanoa mo i tatou lava.5
Fesili e Lei Taliina
O nisi e tauivi lava ma ni fesili e lei taliina e uiga i mea na faia pe na tautalagia i le tuanai. Tatou te faailoa atu ma le faamaoni e faapea i le latalata i le 200 tausaga o le talafaasolopito o le Ekalesia—faatasi ai ma se laina le mafaalavelaveina o mea musuia, mamalu, ma mea paia na tutupu—o loo i ai nisi o mea na tautalagia ma faia ua mafua ai le tuu fesili o tagata.
O nisi taimi e tulai mai ni fesili ona ua tatou le mauaina faamatalaga uma ma ua tatou manaomia ai tau lava o sina onosai teisi. Pe a iu ina iloaina le upumoni atoa, o mea sa tatou lei malamalama muamua i ai o le a talafeauga ma lo tatou loto malie.
O nisi taimi o loo i ai se eseesega o manatu po o le ā tonu le uiga o “mea moni”. O se fesili e fatu ai le masalosalo i nisi tagata, pe a uma se sailiiliga totoa, e mafai ona fausia ai le faatuatua o isi.
O Mea Sese a Tagata Le Atoatoa
Ma, ina ia faamaoni atoatoa, e i ai taimi e faia ai e tagata po o taitai i le Ekalesia ni mea sese faigofie. Atonu na i ai ni upu po o ni mea na faia ua le ogatusa ma o tatou tulaga faatauaina, mataupu faavae, po o le aoaoga faavae.
Ou te manatu e na o le pau le mea e atoatoa ai le Ekalesia pe ana faapea e taitaia e ni tagata atoatoa. E atoatoa le Atua, ma e mama Lana aoaoga faavae. Ae e galue o Ia ia i tatou—O Lana fanau le atoatoa—ma tagata le atoatoa e faia mea sese.
I le itulau autu o le Tusi a Mamona tatou te faitau ai, “O lenei foi, afai o i ai ni sese, o sese ia o tagata; o le mea lea, aua le ta’uleagaina mea a le Atua, ina ia maua outou i le pona i le nofoa faamasino o Keriso.”6
O le auala lava lea e i ai i taimi uma ma o le a i ai pea seia oo i le aso atoatoa pe a nofotupu ai Keriso lava Ia i le lalolagi.
O le mea e faanoanoa ai o nisi ua tautevateva ona o mea sese e faia e tagata. Ae e ui lava i lenei mea, o le upumoni e faavavau o le talalelei toefuataiina o loo maua i Le Ekalesia a Iesu Keriso o le Au Paia o Aso e Gata Ai e le sese, pe faaitiitia, pe faaumatiaina.
I le avea ai ma se Aposetolo a le Alii o Iesu Keriso ma i le avea ai ma se tasi e vaai tino i aufono ma taualumaga a lenei Ekalesia, ou te tuu atu ai se molimau paia e leai se faaiuga taua o aafia ai lenei Ekalesia po o ona tagata ua faia e aunoa ma le naunautai i le sailiga o musumusuga, taiala, ma le faamaoniga a lo tatou Tama Faavavau. O le Ekalesia lenei a Iesu Keriso. O le a le faatagaina e le Atua Lana Ekalesia e see ese mai ona ala atofaina pe toilalo e faataunuu lona taunuuga paia.
O Loo I Ai se Avanoa mo Oe
Ia i latou ua vavaeeseina i latou lava mai le Ekalesia, ou te faapea atu, au uo pele, o loo i ai lava se nofoaga mo outou iinei.
O mai ma faaopoopo mai a outou taleni, meaalofa, ma malosi ia i matou. O le a tatou lelei uma atili i se taunuuga.
Atonu e fesili nisi, “Ae faafefea ou masalosaloga?”
O se mea masani le i ai o fesili—o sina fatu itiiti o le fesili faamaoni ua tele lava ina tupu ae ma avea ma se laau mafalā o le malamalama. O loo i ai ni nai tagata o le Ekalesia o e, po o le a lava le taimi, e lei tauivi lava ma ni fesili matuia pe maaleale. O se tasi o faamoemoega o le Ekalesia o le faafailele lea ma atiae le fatu o le faatuatua—e oo lava i nisi o taimi i eleele matutu o le masalosalo ma le le mautonu. O le faatuatua o le faamoemoe lea mo mea e le vaaia ae ua moni.7
O le mea lea, ou uso e ma tuafafine pele—au uo pele—faamolemole, ia muamua e masalosalo i ou masalosaloga ae e te lei masalosalo i lou faatuatua.8 Ia le tatau lava ona tatou faatagaina le masalosalo e faapagotaina i tatou ma taofia ai i tatou mai le alofa paia, filemu, ma meaalofa ia e oo mai e ala i le faatuatua i le Alii o Iesu Keriso.
Atonu e fai mai nisi, “E le talafeagai au ma o outou tagata i le Ekalesia.”
Ana mafai ona e vaai i o matou loto, masalo o le a e iloaina e te fetaui lelei e sili atu i mea ua e mafaufauina. Atonu e faateia oe i le iloaina e i ai foi o matou manaoga ma faigata faapea ma faamoemoega e tali tutusa ma oe. O lou talaaga po o lou tuputupu ae atonu e foliga mai e ese mai mea e te vaaia i le tele o tagata o le Au Paia o Aso e Gata Ai, ae e mafai ona avea ma se faamanuiaga. Uso e ma tuafafine, uo pele, matou te manaomia a outou taleni ma manatu tulagaese. O le eseesega o tagata taitoatasi ma tagata e toatele i le salafa o le kelope, o le malosiaga lea o lenei Ekalesia.
Atonu e fai mai nisi, “Ou te manatu e le mafai ona ou ola i o outou tulaga faatonuina.”
E anoanoai isi mafuaaga e oo mai. Ua mamanuina le Ekalesia e faafailele tagata le atoatoa, ē o tauivi, ma ē o vaivai. Ua faatumulia i tagata ua naunau ma o latou loto atoa e tausi ia poloaiga, e tusa lava pe latou te lei malamalama atoatoa i ai.
Atonu e fai mai nisi, “Ou te iloa se tagata o la outou Ekalesia e ese le pepelo. E matua le mafai lava ona ou auai i se lotu o loo i ai se tagata faapena.”
Afai e te faauigaina le pepelo o se tagata ua toilalo e ola ma le atoatoa i mea ua ia talitonu i ai, o lona uiga la o tatou uma o tagata pepelo. E leai ma se tasi o i tatou e matuai pei o Keriso e pei ona tatou iloa e tatau ona avea ai i tatou. Ae tatou te mananao ma le naunautai ia faatoilalo o tatou sese ma le tuinanau e fai le agasala. Faatasi ai ma o tatou loto ma agaga tatou te naunau ai ia lelei atili i le fesoasoani a le Togiola a Iesu Keriso.
Afai o ou faanaunautaiga nei, e tusa lava la po o a ou tulaga, lou talaaga patino, po o le malosi o lau molimau, o loo i ai lava se avanoa mo oe i lenei Ekalesia. Sau, auai faatasi ma i matou!
Sau, Auai faatasi ma i Matou!
E ui i o tatou faaletonu faaletagata, ae ou te mautinoa o le a e iloaina i tagata o lenei Ekalesia le tele o agaga sili ona lelei e maua i lenei lalolagi. O le Ekalesia a Iesu Keriso e foliga mai ua tosina i ai ē agalelei ma agaalofa, o ē faamaoni ma ē filiga.
Afai e te faamoemoe e maua iinei ni tagata atoatoa, o le a e le fiafia la. Ae afai e te saili i le aoaoga faavae mama a Keriso, le afioga a le Atua “lea e faamalolo ai le agaga ua manualia,”9 faapea ai ma le uunaiga faapaiaina a le Agaga Paia, o iinei la o le a e maua ai i latou. I lenei vaitau o le faaitiitia o le faatuatua—i lenei vaitau ua anoanoai ai i latou ua mamao ese mai le alofa o le Atua—o iinei o le a e maua ai se nuu e naunau ia iloa ma faalatalata atili atu i lo latou Faaola e ala i le auauna atu i le Atua ma uso a tagata, e pei foi o oe. Sau, auai faatasi ma i matou!
Pe Tou Te Fia O Ese Foi?
Ou te manatua se taimi i le soifuaga o le Faaola ina ua toatele ē na lafoaia o Ia.10 Na fesili atu Iesu i Ona soo e toasefululua:
“Pe tou te fia o ese foi?
“Ona tali mai lea o Simona Peteru ia te ia, Le Alii e, a matou o ea ia te ai? o ia te oe upu o le ola e faavavau.”11
E i ai taimi e ao ona tatou taliina ai lea lava fesili e tasi. Pe tatou te fia o ese foi? Pe o le a tatou piimau i upu o le ola e faavavau, e pei o Peteru?
Afai e te sailia le upumoni, le uiga, ma se ala e liua ai le faatuatua i faatinoga; afai o loo e saili mo se nofoaga e taliaina oe: Sau, auai faatasi ma i matou!
Afai ua e tuua le faatuatua sa e taliaina muamua: Toe sau. Auai faatasi ma i matou!
Afai o loo faaosoosoina oe ia faavaivai: Toe nofo teisi lava. O loo i ai se avanoa mo oe iinei.
Ou te augani atu i tagata uma e faalogoina pe faitauina nei upu: Sau, auai faatasi ma i matou. Sau ma faalogo i le valaau a le Keriso agamalu. Ave lou satauro ma mulimuli ia te Ia.12
Sau, auai faatasi ma i matou! Aua o iinei o le a e maua ai le maa taua le mafaatauina.
Ou te molimau atu o iinei o le a e maua ai upu o le ola e faavavau, le folafolaga o le togiola faamanuiaina, ma le ala o le filemu ma le fiafia.
Ou te tatalo ai ma le faatauanau ina ia avea lau lava sailiga mo le upumoni e vane ai i lou loto le naunautaiga e te sau ma auai faatasi ma i matou. I le suafa paia o Iesu Keriso, amene.