Tepa i Luma ma Talitonu
I le silafaga a le Alii, e le o le tele o mea ua tatou faia po o nofoaga ua tatou o i ai ae o le tele naua o mea ua tatou loto e o i ai.
A o ou tamaitiiti ma galue ai i le fanua ma lou tina, sa ia aoaoina au i se tasi o lesona taua o le olaga. Ua leva le taeao, sa i luga le la ma sa ou manatu o se taimi umi tele na ma vele vao ai. Sa ou tu ma tepa i tua i mea sa ma ausiaina ma faapea atu i lou tina, “Vaai i mea uma ia sa ta faia!” E le i tali mai tina. I le manatu ai na te le i lagonaina au, sa ou toe fai atu i sina leotele teisi atu. Sa le i tali mai lava o ia. Sa ou toe fai atu ma siisii i luga lou leo ina ia leotele atu. Mulimuli ane, sa ia liliu mai ia te au ma faapea mai, “Edward, aua nei e toe tepa i tua. Tepa i luma i mea na e tatau ona ta faia.”
Ou uso e ma tuafafine, o le feagaiga sa tatou osia ma le Alii ina ua papatisoina i tatou, “ia tutu o ni molimau a le Atua i taimi uma ma i mea uma, ma i nofoaga uma atonu [tatou] te i ai” (Mosaea 18:9), o se tautinoga o le olaga atoa. Sa fautua mai Peresitene Dieter F. Uchtdorf: “O i latou ua ulu ifo i le vai o le papatisoga ma mauaina le meaalofa o le Agaga Paia ua tutu o latou vae i luga o le ala o le avea ma soo ma ua poloaiina ai e mulimuli ma le mausali ma le atoatoa i tulagaaao o lo tatou Faaola” (“O Le Au Paia Mo Vaitau Uma,” Liahona, Sete. 2013, 5). E valaauina i tatou e le Alii e ala i Ana auauna i valaauga eseese, lea tatou te taliaina ma le tuuto atoa. Pe a tuuina atu se faamalologa ma tuu atu se valaauga i se isi tofiga ese, tatou te taliaina ma le olioli i le iloaina, e pei ona sa iloaina e o tatou augatama, e faapea “i le galuega a le Alii, e le o le tofiga e te auauna ai ae o le auala e te faia ai” (J. Reuben Clark Jr., i le Conference Report, Ape. 1951, 154).
O le mea lea pe a faamaloloina se peresitene o se siteki po o se epikopo, na te taliaina ma le olioli lona faamalologa, ma pe a tuuina atu i ai se valaauga e galue ai i soo se auala ua silafia e le Alii, “e tatau” (Mosaea 3:19), e auala mai i Ana auauna, e le lofituina o ia i ona aafiaga ua tuanai, pe tepa foi i tua ma manatu ua lava lana auaunaga. Na te “le faavaivai i le faia o mea lelei,” aua na te iloaina, ua ia “faataatiaina le faavae o se galuega tele” faatasi ma se vaaiga mamao manino o na taumafaiga e manuia ai olaga mo le faavavau. Ma “o mea iti e tutupu mai ai mea tetele” (MF&F 64:33).
E tatau ona tatou “auai ma le naunautai i se faamoemoega lelei, ma fai mea e tele i lo [tatou] lava loto malie, ma aumai le amiotonu tele” (MF&F 58:27).
Sa fautua mai Elder Jeffrey R. Holland o le Korama a Aposetolo e Toasefululua: “O le tuanai e mo le aoaoina mai ai, ae le o le ola ai. Tatou te vaai i tua e pue mai mea silisili ona lelei mai aafiaga lelei ae le o aafiaga ua uma. Ma afai ua tatou aoaoina mea e manaomia ona tatou aoaoina ma ua tatou aumaia ma i tatou mea sili na tatou aafia ai, ona tatou vaavaai lea i luma ma manatua o le faatuatua e masani lava ona faasino atu i le lumanai” (“O Le a Oo Mai Le Mea Sili,” Liahona, Ian. 2010, 18).
E ui o le lesona a lou tina o le tepa i luma na faatatau e agai atu i vao na vaaia sa i ai i le fanua, o lena luitau na itiiti atu se faatusatusaga i mea na oo i ai le Au Paia anamua. Sa lelei tele le faamatalaina e Elder Joseph B. Wirthlin o lenei aafiaga: “I le 1846, e sili atu i le 10,000 tagata sa tuua le aai uluola sa latou fauina i auvai o le Vaitafe o Misisipi. Faatasi ma le faatuatua i taitai faaperofeta, sa tuua ai e na uluai tagata o le Ekalesia lo latou ‘Aai Matagofie’ ma o atu i le vao i tuaoi o Amerika i na taimi. Sa latou le iloa tonu po o fea o latou o i ai, a e pe fia tonu ni maila o i luma atu, a o le a le umi o le faigamalaga, ae pe o le a foi se lumanai o faatali mai mo i latou. Ae sa latou iloa lava sa taitaia i latou e le Alii ma Ana auauna” (“Faatuatua o o Tatou Tama,” Ensign, Iulai 1996, 38).
Sa latou iloaina le uiga o le tepa i luma ma talitonu. O le sefululima tausaga na muamua atu, na i ai nisi o nei au paia i le taimi na maua ai se faaaliga:
“Aua e moni Ou te fai atu ia te outou, amuia lava o ia o le e tausi i a’u poloaiga, pe i le olaga nei po o i le oti; ma o ia o le e faamaoni i puapuaga, ua sili atu le tele o le taui o lea lava tagata i totonu o le malo o le lagi.
“E le mafai ona outou vaaia i o outou mata faalenatura, i le taimi nei, le fuafuaga a lo outou Atua e faatatau i mea o le a oo mai pe a mavae le taimi nei, ma le mamalu e mulimuli mai pe a mavae puapuaga e tele” (MF&F 58:2–3).
E mafai foi ona tatou tepa i luma ma talitonu. E mafai ona tatou taliaina ma le atoatoa le valaaulia a lo tatou Alii, o le ua valaauliaina i tatou faatasi ai ma ona aao o loo faaloaloa mai:
“Ia outou o mai ia te au, o outou uma o e tigaina ma mafatia i avega, o a’u foi e malolo ai outou.
“Ia outou amoina la’u amo, ma ia outou faaa’oa’o ia te au; aua o a’u le agamalu ma le loto maulalo: ona maua lea e outou o le malologa mo outou agaga.
“Aua e avegofie la’u amo, o la’u avega foi e mama ia” (Mataio 11:28–30).
O la tatou perofeta pele, o Peresitene Thomas S. Monson; o ona fesoasoani; ma le Korama a Aposetolo e Toasefululua ua tuuina mai se valaaulia mo i tatou uma ia auai i le galuega o le faaolataga. O tagata fou liliu mai, le autalavou, talavou matutua, o i latou ua litaea mai a latou galuega, ma faifeautalai faamisiona e manaomia ona tau fai amo faatasi e faanatinatia le galuega o le faaolataga.
I se tasi taimi sa auai atu ai Peresitene Boyd K. Packer, o le Peresitene o le Korama a Aposetolo e Toasefululua i se tauvaga tosoga avega mamafa a povi, lea sa ia aoaoina mai ai se lesona. Sa ia saunoa e uiga i lea aafiaga: “O se taavale toso sa faamamafaina i poloka sima: sefulu afe pauna [4,535 kk]—lima tone le mamafa. … O le faamoemoega sa mo le pulu e faame’iina le taavale toso mo le tolu futu [91 sm]. … Sa ou matauina ai se paaga tutusa o manu lapopoa tetele, lanu fefiloi, lanumoana faaefuefu … [o le] pulu tele lanumoana o vaitau ua tuanai.”
I le talanoaina o le taunuuga o le tauvaga, sa ia faapea mai ai: “O au sa taitasi ma aveesea. … O le pulu lapoa lanumoana e le’i i ai sona tulaga! O se soa o manu laiti ma faatauvaa, sa le i faatusalia le laiti o tino, sa faame’iina faatasi le taavale tosomanu i taimi uma e tolu.”
Ona ia tuuina mai lea o se faamalamalamaga o le taunuuga ofoofogia: “Sa lapopoa atu ma malolosi atu ia povi lanumoana nai lo le isi au. Ae o povi laiti sa lelei atu lo la galulue faatasi o se au ma le faamaopoopoga. Sa la amoina faatasi. O manu uma e lua sa tau fai tuuoso uma i luma i le taimi e tasi ma toso ai i le malosiaga le avega” (“Equally Yoked Together,” lauga sa tuuina atu i le semina a sui lisone, Ape. 3, 1975; in Teaching Seminary: Preservice Readings [2004], 30).
A tatou tepa i luma ma talitonu, tatou te manaomia lenei lava galulue faatasi o se au i le faanatinatiina o le galuega o le faaolataga a o tatou valaaulia isi e o mai ia Keriso. I o tatou gafatia taitoatasi, e manaomia ona tatou mulimuli i le fautuaga a Peresitene Dieter F. Uchtdorf ia “tutu faatasi ma sii i luga mai le mea o loo tatou tutu ai” (“Faamaualuga Le Mea E Te Tu Ai,” Liahona, Nov. 2008, 56). E mafai ona tatou iloaina lo tatou gafatia atoa, e pei ona sa matauina e Elder L. Tom Perry o le Korama a Aposetolo e Toasefululua: “A ou malaga atu i le Ekalesia atoa ou te maofa i mea lelei o loo tutupu. Peitai ou te lagonaina lava, i le avea ai ma se nuu, tatou te le o ola lava e tusa ma lo tatou gafatia moni. Ou te lagona tatou te le o galulue faatasi i taimi uma, o loo tatou fiafia tele i manaoga mo le mamalu ma le manuia faaletagata lava ia, ma faaalia sina fiafia teisi i sini autasi o le fausiaina o le malo o le Atua” (“United in Building the Kingdom of God,” Ensign, May 1987, 35).
Tau ina ia tatou tutu faatasi uma i se faamoemoega autasi “ia aumaia le tino ola pea ma le ola faavavau o le tagata” (Mose 1:39).
O lo tatou Faaola, o Iesu Keriso, o le Na te silasila mai le amataga e oo i le iuga, sa silafia lelei le auala o le a Ia savalia i Ketesemane ma Korokota ina ua Ia folafola mai, “O le tago lona lima i le suotosina, ma tepa i tua, e le tatau ia i le malo o le Atua” (Luka 9:62). I le silafaga a le Alii, e le o le tele o mea ua tatou faia po o nofoaga ua tatou o i ai ae o le tele naua o mea ua tatou loto e o i ai.
O a tatou mataupu faavae taiala sa aoaoina ai i tatou e le Perofeta o Iosefa Samita: “O mataupu faavae autu o lo tatou talitonuga o molimau a le au Aposetolo ma Perofeta, e faatatau ia Iesu Keriso, e faapea Ia maliu, ma tanumia, ma toetu mai i le aso tolu, ma afio ae i le lagi; ma o isi mea uma e faatatau i lo tatou talitonuga ua na o ni faaopoopoga i ai” (Aoaoga a Peresitene o le Ekalesia: Iosefa Samita [2007], 53).
Ou te molimau atu a tatou mulimuli i le faataitaiga a le Faaola, o Iesu Keriso, ma siiina o tatou lima i le sikuea faatasi ai ma le faatinoga i le lagolagoina o lo tatou perofeta pele, o Peresitene Thomas S. Monson, o le a tatou mauaina le filemu, mafanafana, ma le olioli, ma tatou “aia le lelei o le laueleele … i aso nei e gata ai” (MF&F 64:34). I le suafa o Iesu Keriso, amene.