Ko e Ututaʻú
“Ko e Laumālie Māʻoniʻoní … te ne fakahā kiate kimoutolu ʻa e meʻa kotoa pē ʻoku totonu ke mou faí” (2 Nīfai 32:5).
Ne u loto heʻeku kei tamasiʻi ʻi Siapaní ke u ako e lea faka-Pilitāniá. Ka naʻe fuʻu mamafa hono totongi e ngaahi lēsoni lea faka-Pilitāniá pea ʻikai feʻunga ʻeku paʻangá ki hono totongi ʻo e ngaahi kalasí.
Ne ʻi ai ha ʻaho ʻe taha ne u sio ai ki ha ongo talavou ʻokú na tufa ha fanga kiʻi pepa tuʻuaki ke fai ha ngaahi lēsoni taʻe totongi he lea faka-Pilitāniá. Ko ha ongo faifekau mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ne u fakamoʻoni he taimi pē ko ia ki heʻena kalasi lea faka-Pilitāniá.
Ne u ongoʻi ha meʻa makehe ki he ongo faifekaú. Naʻá na fofonga fiefia mo tauʻatāina. Ne u ʻeke kiate kinaua ʻo kau ki hona siasí, pea naʻe ongo ia ki hoku lotó. Ne ʻikai ke fuʻu mahino kiate au he taimi ko iá, ka ne u ongoʻi e Laumālié. Ne vave pē ʻeku loto ke u papitaisó.
Ne ʻikai ke loto ʻeku ongo mātuʻá ke u papitaiso ki ha siasi ʻoku kehe mei hona siasí. Ka naʻe haʻu e ongo faifekaú ki hoku ʻapí ʻo talanoa lelei mo ʻeku ongo mātuʻá. Ne ongo e Laumālié ki he loto ʻo ʻeku ongo mātuʻá, pea naʻá na fakangofua leva ke u papitaiso.
ʻI ha Sāpate ʻe taha ʻi ʻOkatopa, ne vahe mai ke u kau ki ha konga ʻo ha polokalama mahuʻinga ʻi he lotú. Ka ʻi ʻOkatopá kuo pau ke ngāue e taha kotoa ia he fāmilí ki hono taʻaki ʻo e laisé mei he ngoue laise ʻeku tangataʻeikí. Ne kau ai mo e ngāue he ʻaho Sāpaté.
Ne u lotu ki he Tamai Hēvaní, pea ʻomi ʻe he Laumālié ha fakakaukau kiate au. Te u lava ʻo feinga ke ʻosi hono tuʻusi e laisé kimuʻa he Sāpaté. Ne u ʻā hengiheingi he pongipongi kotoa pē kimuʻa pea kamata e akó. Pea ʻi he hoʻatā kotoa pē ne u ngāue he tuku ʻa e akó ʻo aʻu ki he poʻulí.
Ka ʻi he pō Tokonakí ko e vaeua pē ʻo e laise ne ʻosi tuʻusí. Ne u ʻalu ʻo mohe mo e loto foʻí he kuo ʻikai lavaʻi ʻeku taumuʻá. Ne u ʻā hengihengia he pongipongi Sāpaté ke ʻalu ki he ngoueʻangá. Ne hū mai ʻeku tangataʻeikí ki hoku lokí, pea naʻá ne malimali pē mo ʻeke mai pe ko e hā e ʻuhinga ʻoku ʻikai te u ʻalu ai ki he lotú. Ne u fuʻu fiefia, he te u lava ke ʻalu ki he lotú pea tauhi e Sāpaté ke māʻoniʻoni!
ʻOku hounga kiate au ke ʻiloʻi ʻi heʻetau fakafanongo ki he leʻo ʻo e ʻEikí mo muimui kiate Iá, te Ne tāpuekina mo tataki maʻu pē kitautolu.