Ngaahi Fehuʻi mo e Talí
Kapau te ke fai ho lelei tahá ke ʻalu ki ai he lahi taha te ke malavá, ʻe hōifua e ʻEikí ʻi hoʻo feingá. ʻI he taimi he ʻikai te ke lava ʻo ʻalu ai ki he temipalé, ʻoku lahi ha ngaahi meʻa te ke fai ke hoko ai e temipalé ko ha konga lahi ange hoʻo moʻuí:
-
Moʻui taau ke hū he temipalé. Ko e ʻuhinga hono moʻui ʻaki e ngaahi tuʻunga moʻui ʻoku fie maʻu ke hū ai ki he fale ʻo e ʻEikí, ʻoku tau mateuteu maʻu pē ke tuʻu ʻi Hono ʻaó.
-
Palani ke maʻu ho ʻenitaumení pea mali ʻi he temipalé. Ko hono fokotuʻu ko ia ha taumuʻa ke maʻu e ngaahi ouau mahuʻingá ni te ne ʻai ke tukutaha ai hoʻo fakakaukaú ʻi he temipalé.
-
Vala taau. ʻE tokoni ʻa e meʻá ni ke teuteuʻi koe ke maʻu ho ʻenitaumení.
-
Ako e ngaahi folofola ʻoku fekauʻaki mo e temipalé (hangē ko ʻení, ʻEkesōtosi 26–29; Levitiko 8; T&F 97; 109; 110; 124:25–42; Mōsese 2–5). Ko e Liahona ʻo ʻOkatopa 2010 naʻe fekauʻaki kotoa ia mo e temipalé.
-
Ako ki hoʻo ngaahi kuí (ʻaʻahi ki he FamilySearch.org) mo sio ʻoku fakahoko e ngaahi ouau faka-temipalé maʻanautolu.
-
ʻEke ki he niʻihi kehé pe ko e hā e ʻuhinga ʻa e temipalé kiate kinautolú pea vahevahe hoʻo fakamoʻoní ko e temipalé ko e fale moʻoni ia ʻo e ʻEikí.
-
Tokoni ke ʻai ho ʻapí ke hangē pē ko e temipalé: “Fokotuʻu ha fale, ʻio ko ha fale ʻo e lotu, ko ha fale ʻo e ʻaukai, ko ha fale ʻo e tui, ko ha fale ʻo e ako, ko ha fale ʻo e nāunau, ko ha fale ʻo e maau, ko ha fale ʻo e ʻOtuá” (T&F 109:8).
Te ke lava ke fili ʻi he faʻa lotu ha fakakaukau ʻe taha pe ua mei he ngaahi fakakaukaú ni ʻo feinga ke fakahoko ia he māhiná ni. Te nau tokoniʻi koe ke ke ongoʻi e Laumālié mo ako lahi ange ai ki he temipalé.
Tauhi e Laumālie ʻo e Temipalé
ʻOku houa ʻe fitu ʻeku ʻalu ki he Temipale Felengifeeti Siamané, pea ʻoku tuʻo ua pē ʻeku ʻalu mo hoku fāmilí ki he temipalé he taʻu ʻi ha uike kakato ʻe taha. Ka ʻi he taimi kotoa pē ʻoku ou toe maʻu ai ha faingamālie kehe ke ʻalú, te u ʻalu koeʻuhí ko ʻeku ʻilo ʻe hoko ia ko ha tāpuaki maʻongoʻonga. ʻOku ou tauhi e laumālie ʻo e temipalé ʻaki hono lau fakaʻaho ʻeku folofolá he ʻaho kotoa pē. ʻOku ou ngāue ʻaki ʻeku lekomeni temipalé ko ha fakaʻilonga tohi. Ko e taimi kotoa pē ʻoku ou sio ai ki heʻeku lekomení, ʻoku ou fai pē ha ngaahi fehuʻi kiate au ke fakapapauʻi ʻoku ou taau ke ʻalu ki he temipalé. ʻOkú ne fakamālohia au mo tokoni ke u ongoʻi e Laumālié. Neongo ʻoku mamaʻo e temipalé mei ʻapi, ʻoku lava pē ke u feinga ke moʻui ʻo hangē pē ka u ka hū he temipalé he ʻaho kotoa pē.
Lisa G., taʻu 17, Falanisē
Fakakaukau ki ha Founga ʻOku Tāpuekina ai ʻe he Ngaahi Temipalé Hoʻo Moʻuí
Kapau ʻoku ʻikai ke tau fakahoungaʻi e ngaahi temipalé, ta ʻoku ʻikai ke tuku ai hotau lotó. ʻOku fie maʻu ke tau fakakaukau ki he ngaahi tāpuaki ʻe lava ke ʻomi maʻatautolu ʻe he temipalé pea tau ʻalu ki ai he taimi ʻoku tau malava aí. Tatau ai pē pe ʻoku ʻikai faʻa lahi hoʻo ʻaʻahi ki aí he taʻú, te ke lava ke ʻai ia ke mahuʻinga mālie ʻaki hano ʻomi ha ngaahi hingoa fakafāmili pe ʻaukai. ʻOku makehe e Laumālie ʻi he fale ʻo e ʻEikí—te ke loto ke ʻaonga hoʻo ʻaʻahi ki he temipalé.
Penisimani S., taʻu 18, ʻIutā, USA
Hokohoko Atu he Moʻui Maʻa mo Taau
ʻOku ʻomi ʻe he temipalé ha fiefia ki heʻeku moʻuí he ʻahó ni. ʻI heʻeku ʻalu ki he temipalé, ʻoku ou ako lahi ange ai ʻo kau ki heʻetau Tamai Hēvaní mo Sīsū Kalaisi. ʻOku fakamālohia mo fakaleleiʻi ʻeku tuʻunga fakalaumālié heʻeku ngāue he temipalé. ʻOku ou maʻu ai ha mahino lahi ange ki he taumuʻa ʻo ʻetau moʻuí. ʻOku ʻomi ʻe he temipalé kiate au ha loto-toʻa ʻi he fehangahangai mo e ʻahiʻahí mo e fakatauelé mo ʻomi ha mālohi kiate au ke ikunaʻi ʻaki hoku ngaahi vaivaí. Ko e temipalé pē ʻa e feituʻu te tau lava ke sila fakataha ai ko ha fāmili taʻengata, ko ia te u teuteu ke hū ki he temipalé mo hokohoko atu ʻeku moʻui maʻa mo tāú.
Mikaela B., taʻu 16, ʻOtu Motu Filipainí
Teuteuʻi Koe
ʻOku lelei e ʻalu tuʻo ua pe tuʻo tolu ki he temipalé he taʻu, kae fai ia ʻaki e loto fakamātoato mo maʻa. Te tau lava ʻo poupouʻi hotau kau taki faka-Siasí ke fokotuʻutuʻu ha ngaahi polokalama fononga ki he temipalé. ʻI he taimi ʻoku ʻikai ke tau lava ai ʻo ʻalú, tau feinga ke teuteuʻi kitautolu ki he taimi ʻe lava aí, pea tau ʻalu ʻi he fiefia lahi. ʻOku femoʻuekina ʻetau moʻuí, ka kuo talaʻofa mai e kau palōfitá kapau te tau ʻalu ki he fale ʻo e ʻEikí, ʻe tāpuekina kitautolu.
Kilisitā L., taʻu 16, Palakuai
Fakaʻaliʻali ha Fakatātā ʻo e Temipalé
Feinga ke fakaʻesia e tā ʻo e temipale ʻokú ke saiʻia taha aí ʻaki e ngaahi leá ni [“Te u hū ki loto ʻi ha ʻaho!]” Tuku ia ʻi ho lokí ke ke sio ki ai he ʻaho kotoa pē. Hiki ha lisi ʻo e ngaahi meʻa te ke fai mo ʻikai te ke fai kae lava ke ke moʻui taau ai ke hū he temipalé. Tuku e lisí he tafaʻaki ʻo e fakatātaá.
Kalisitiane J., taʻu 13, ʻAitahō, USA
Lau ʻi Hoʻo Tohinoá ki he Ngaahi ʻAʻahi ne Fai Kimuʻa ki he Temipalé
Hiki ʻi hoʻo tohinoá e ngaahi taimi naʻá ke ʻaʻahi ai ki he temipalé pea lau e ngaahi peesi ko ʻení ʻi hoʻo ʻi apí. ʻE tokoni ʻeni ke ke manatuʻi e ongo naʻá ke maʻú. ʻOku matuʻaki mahuʻinga ke lekooti e fakahā fakatāutahá. ʻI heʻeku ʻalu ki he temipalé, ʻoku ou feinga ke fakafanongo fakalelei ʻaupito ki he Laumālié koeʻuhí he ʻokú Ne mateuteu maʻu pē ke tokoniʻi kitautolu ke tau ako. Ko e taimi kotoa pē ʻoku ou fakafanongo aí, ʻoku ou ʻilo ha ngaahi moʻoni foʻou kau kia Sīsū Kalaisi mo e Tamai Hēvaní pea pehē foki ki he ngāue fakatemipalé. ʻI hono tukutaha ʻeku fakakaukaú he ngaahi meʻa fakalaumālié ʻi heʻeku ʻi he temipalé, ʻoku mahuʻinga ange leva ia kiate au pea hoko e temipalé ʻo mahuʻinga mālie ʻi heʻeku moʻuí.
ʻOlokā Z., taʻu 18, Pelalusi
Fai e Hisitōlia Fakafāmilí
ʻOku ou tui ko hono fai ko ia e ngāue ʻi he hisitōlia fakafāmilí ʻoku meimei ko e ofi taha ia ʻo e ʻi he temipalé neongo ʻoku ʻikai te ke ʻi he temipalé. Te ke lava ke ʻoange e ngaahi hingoa naʻá ke maʻú ki he kakai ʻi ho fāmilí pe uōtí ke nau ʻave ki he temipalé. Kapau te ke fai e hisitōlia fakafāmilí mo tauhi ho ʻapí ke hoko ko ha feituʻu toputapu, ʻe hangē ʻokú ke ofi pē koe ki he temipalé neongo hoʻo fuʻu mamaʻo ʻaupito mei aí.
Keitilini B., taʻu 13, ʻIutā, USA