Ke Teiti pe ʻIkai Teiti
ʻOku nofo ʻa e tokotaha naʻá ne faʻú ʻi Nevata, USA.
ʻOku tokolahi ha tamaiki ʻi hoku ʻapiakó ʻoku nau faikaumeʻá. ʻI hoku ʻuluaki ʻaho he foomu uá, ne u feʻiloaki ai mo ha tamasiʻi ko Paula. Ne ma feohi lelei. Ne hoko ʻa Paula ko ha kaungāmeʻa lelei.
ʻI he ʻaho hono hokó he tuku ʻa e akó naʻá ne kole mai ke ma teiti. Ne u talaange kiate ia he ʻikai te u lava, pea naʻá ne ʻeke mai hono ʻuhingá. Ne u talaange ki ai ko ha mēmipa au ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní pea ʻoku ʻikai totonu ke mau teiti kae ʻoua ke hoko homau taʻu 16. Ne ʻeke ʻe Paula hono ʻuhingá, pea ne u ʻiloʻi ʻoku ʻikai ke u fuʻu iloʻi pau hono ʻuhingá.
Ne u foki ki ʻapi he pō ko iá pea fakakaukauloto ki he fehuʻi ʻa Paulá. Ne u kumi he LDS.org mo lau ʻeku folofolá. Ne u maʻu ha lea ʻa Palesiteni Kōtoni B. Hingikelī (1910–2008): “Kuo ngaohi kitautolu ʻe he ʻEikí ke tau fetokangaʻaki koeʻuhí ko ha taumuʻa maʻongoʻonga. Ka ʻoku hoko e fetokangaʻaki ko ʻení ko ha meʻa fakatuʻutāmaki ʻo kapau he ʻikai ke mapuleʻi lelei. … Ko hono ʻuhinga ia ʻoku faleʻi ai ʻe he Siasí ke ʻoua naʻa fai kei iiki e teití.”1
Ne u toe sio foki ʻi he Ki Hono Fakamālohia ʻo e Toʻu Tupú. ʻOku talamai ai ko e teití ʻe “lava ia ʻo tokoni atu ke ke ako peá ke fakaʻaongaʻi e ngaahi poto fakasōsialé, fakatupulaki ʻa e anga fakakaungāmeʻá, fai ʻa e fakafiefia ʻoku fakatupulakí, pea iku ki hano kumi ʻo hao hoa taʻengatá.”2
ʻI he ʻaho hono hokó ne u fakaʻaliʻali kia Paula e kiʻi tohitufa Ki Hono Fakamālohia ʻo e Toʻu Tupú. Ne sio mo e tamaiki kehé ki hono lau ia ʻe Paulá, pea tokoni hoku kaungāmeʻa Siasí kiate au ke tali e ngaahi fehuʻi hoku kaungāakó. Ne u fiefia ke maʻu ha tali ki he fehuʻi ʻa Paulá.
ʻOku pehē ʻe he Ki Hono Fakamālohia ʻo e Toʻu Tupú ko e teiti ko ia kimuʻa he taʻu 16 mo fakahoko ha vā fetuʻutaki fakamātoato ʻi heʻetau kei talavoú ʻe lava ke iku ia ki he angaʻulí mo fakangatangata ai e tokolahi ʻo e kakai te tau fetaulakí. ʻOku talamai foki heʻeku fineʻeikí ʻoku ʻikai totonu ke tau teiti kimuʻa he taʻu 16 koeʻuhí he te ne toʻo ai e tokanga ki he akó mo e ngaahi faingamālie ʻe lava ke mahuʻinga ki he lavameʻa he kahaʻú. Ne u sio ki haku kaungāmeʻa taʻu 13 kuo nau fuʻu loto-mamahi fakaeloto koeʻuhí ko e ngata ʻa e vā fetuʻutakí.
Ne u fiefia ke lava ʻou ʻiloʻi e ʻuhinga ʻoku ʻikai totonu ai ke tau teiti kimuʻa he taʻu 16 mo fai ha tali kia Paulá ʻo ʻikai ke ne loto mamahi ai. Kuó u hoko ko hano kaungāmeʻa lelei, pea ʻoku ou ʻamanaki te ma kaungāmeʻa fuoloa. ʻOku ou fakamālō ki he ngaahi kaungāmeʻa kuo ʻomi ʻe he ʻEikí maʻatautolú mo e faingamālie ke teiti ʻi he taʻu totonú koeʻuhí ke tau lava kotoa ʻi ha ʻaho ʻo maʻu hatau hoa angatonu mo taʻengata.